ރައީސުލްޖުމްހޫރިއްޔާ ޑރ. މުހައްމަދު މުއިއްޒު ށ. އަތޮޅުގެ ރައްޔިތުންނާ ބައްދަލު ކުރެއްވުމަށް ކުރެއްވި ދަތުރުފުޅު ނިންމަވާލައްވައިފި އެވެ.
މި ދަތުރުފުޅުގައި ރައީސް މުއިއްޒު ވަނީ އެ އަތޮޅުގެ މީހުން ދިރިއުޅޭ 14 ރަށަކަށް ވަޑައިގެންފަ އެވެ. އެމަނިކުފާނު ވަޑައިގެންފައިވަނީ ކަނޑިތީމު، ނޫމަރާ، ގޮއިދޫ، ފޭދޫ، ފީވައް، ބިލެތްފަހި، ފޯކައިދޫ، މިލަންދޫ، ނަރުދޫ، މަރޮށި، ޅައިމަގު، ފުނަދޫ، ކޮމަންޑޫ އަދި މާއުނގޫދޫ އަށެވެ.
ރައީސް މުއިއްޒުގެ މި ދަތުރުފުޅުގެ ތެރެއިން ށ. އަތޮޅުގެ ތަރައްގީއަށް ބޮޑެތި މަޝްރޫތަކެއް ފައްޓާފައިވެ އެވެ. އަދި އަންނަ އަހަރުގެ ބަޖެޓުގައި ހިމަނައިގެން ކުރިއަށް ގެންދަން ނިންމާފައިވާ ބޮޑެތި މަޝްރޫތަކަށްވެސް ރައީސް މި ދަތުރުފުޅުގެ ތެރެއިން ވަނީ އަލި އަޅުއްވާލައްވާފަ އެވެ.
ށ. އަތޮޅުގެ ތަރައްގީއަށް ފެށި އެންމެ ބޮޑު 4 މަޝްރޫއަކީ އެ އަތޮޅުގައި މުޅިން އާ ތިން އެއާޕޯޓެއްގެ މަސައްކަތް ފަށާ، މިހާރު ފުނަދޫގައި ހުރި އެއާޕޯޓު އިތުރަށް ތަރައްގީ ކުރުމުގެ މަސައްކަތެވެ. އެގޮތުން ށ. ބިލެއްފަހި އެއާޕޯޓުގެ އެއްބަސްވުމުގައި ސޮއިކޮށް، އެއާޕޯޓު ތަރައްގީ ކުރުމަށް ބިން ހިއްކުމުގެ މަސައްކަތް ފަށާފައިވާއިރު މިލަންދޫ ބިން ހިއްކުމާއި އެއަރޕޯޓް ތަރައްޤީކޮށް އޮޕަރޭޓް ކުރުމަށާއި ކޮމަންޑޫގައި ގާއިމްކުރާ އެއާޕޯޓު ތަރައްގީކޮށް ހިންގުމުގެ މަސައްކަތް ވަނީ އެމްއޭސީއެލްއާ ހަވާލުކޮށްފަ އެވެ. އަދި ފުނަދޫ އެއާޕޯޓުގައި ރޭގަނޑު ފްލައިޓް ޖެއްސޭނެ ގޮތަށް ލައިޓް ޖެހުމާއި، ޒަމާނީ ފެންވަރުގެ ލައުންޖެއް އަދި ރެސްޓޯރެންޓެއް ހެދުމުގެ އިތުރުން ޓާމިނަލްގެ ފެންވަރު މަތިކުރުމުގެ މަޝްރޫއެއްވެސް ވަނީ ފަށާފަ އެވެ.
މި ދަތުރުފުޅުގެ ތެރެއިން ރައީސް މުއިއްޒު ވަނީ ސިއްހީ ދާއިރާ ހަރުދަނާ ކުރުމުގެ ގޮތުން އަންނަ އަހަރުގެ ނިޔަލަށް ރާއްޖޭގެ ހުރިހާ ރަށެއްގައިވެސް އެ ރަށެއްގެ ނިސްބަތުން އެކަށީގެންވާ ވަރަށް ލެބޯޓްރީ ޓެސްޓް ހެދޭނެކަމަށް ވިދާޅުވެފަ އެވެ. މިއީ ރައީސް މުއިއްޒުގެ ވައުދުފުޅެކެވެ.
މީގެ އިތުރުން އަންނަ އަހަރުގެ ބަޖެޓުގައި މުޅިން އާ މަޝްރޫތަކަށް 3 ބިލިއަން ރުފިޔާ ކަނޑައަޅާފައިވާކަމަށް ރައީސް ވިދާޅުވި އެވެ. އޭގެ ތެރެއިން މަދުވެގެން 500 މިލިއަން ރުފިޔާ ހަރަދު ކުރާނީ އަލަށް ފަށާ ތައުލީމީ ދާއިރާގެ މަސައްކަތްތަކަށް ކަމަށާއި މަދުވެގެން 500 މިލިއަން ރުފިޔާ ހަރަދު ކުރާނީ އަލަށް ފަށާ ސިއްހީ ދާއިރާގެ މަޝްރޫތަކަށް ކަމަށް ރައީސް ވިދާޅުވި އެވެ.
ތައުލީމީ ދާއިރާއަށް ރައީސް މުއިއްޒު ދެއްވި އުންމީދުތަކުގެ ތެރޭގައި ހާއްސަ އެހީއަށް ބޭނުންވާ ކުދިންނަށް ތައުލީމު ދެވޭނެ ނިޒާމު ރާއްޖޭގެ ކޮންމެ ރަށެއްގައި ވެސް ގާއިމުކުރުމާއި ރާއްޖޭގެ ތާރީހުގައި މުޅިން އަލަށް ވޮކޭޝަނަލް ހައި ސްކޫލެއް އެޅުން ހިމެނެ އެވެ. މި ދެކަންތައް ހާސިލު ކުރުމަށް އަންނަ އަހަރުގެ ބަޖެޓުގައި ހިމަނުއްވާނެކަމަށް ރައީސް ވިދާޅުވި އެވެ.
ރައީސް މުއިއްޒު ށ. އަތޮޅަށް ކުރެއްވި ދަތުރުފުޅު ނިންމަވާލައްވާފައިވާއިރު ވަރަށް އަވަހަށް އިތުރު އަތޮޅަކަށް ވަޑައިގަންނަވާނެކަމަށް މައުލޫމާތު ލިބެ އެވެ. އެމަނިކުފާނު ވަނީ ރައްޔިތުންނާ ގާތުން މަސައްކަތް ކުރުމަކީ އެމަނިކުފާނު ބޭނުންފުޅުވާ ގޮތްކަމަށް ތަކުރާރުކޮށް ވިދާޅުވެފަ އެވެ.
