ރާއްޖޭގައި ވޭޕާއެކު ދުންފަތް ނުވަތަ ސިނގިރޭޓްގެ ބާވަތްތައް މަނާ ނުކުރީ އެއްވެސް ބަޔަކަށް ވިޔަފާރީގެ ފައިދާއެއް ހޯދައި ދިނުމަށް ނޫން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
މިކަން ރައީސް ފާހަގަކުރެއްވީ ރ. އުނގޫފާރަށް ކުރެއްވި ދަތުރުފުޅުގައި އެރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ. ރައީސް ވަނީ ދުންފަތުގެ ކޮންޓްރޯލްކުރުމަށް ދާދި ފަހުން ޤާނޫނަށް ގެނެވުނު ބަދަލުތަކާ ގުޅޭގޮތުން އުފެދިފައިވާ ފާޑުކިޔުންތަކަށްވެސް ރައްދުދެއްވާފަ އެވެ.
ރަައީސް ވިދާޅުވި ގޮތުގައި، ދިވެހި މުޖުތަމައުގައި ކުރީއްސުރެ ފެށިގެން ދުންފަތުގެ ބޭނުން ކުރަމުން އަންނާތީ، މިކަން ކުއްލިއަކަށް ހުއްޓުވާލުމަކީ ފަސޭހަ ކަމަކަށް ނުވާނެ އެވެ.
”ދުންފަތް އެއްކޮށް މަނާކޮށްލުމަކީ ދުންފަތުގެ އިސްތިއުމާލުކުރުން ފަދައެއް ނޫން. ދެ ކަންތައް އެއްފަހަރާ ކުރެވޭނެ ކަމަށް އަޅުގަނޑަކަށް ނުވިސްނޭ. ރައްޔިތުން ތިބީ ވަރަށް ބޮޑަށް އާދަވެފައި ދުންފަތުގެ އިސްތިއުމާލުކުރަން“
ރައީސް ވިދާޅުވީ، ދުންފަތުގެ އުފެއްދުންތަކުން ނަގާ ޓެކްސް އިތުރުކޮށްގެން ދައުލަތުގެ އާމްދަނީ މައްޗަށް ޖެއްސުމަށް ބޭނުންފުޅުވެ ވަޑައިނުގަންނަވާ ކަމަށެވެ. އަދި މިފަދަ ޓެކްސްތަކަށް ބަރޯސާވެ، ދައުލަތުގެ އާމްދަނީ ހިސާބުކުރުމަކީވެސް އެދިވަޑައިގަންނަވާ ކަމެއް ނޫން ކަމުގައި ފާހަގަކުރެއްވި އެވެ.
މިއީ ކުރިއަށް އޮތް ޖީލު ސަލާމަތްކުރުމަށް އަޅާ ފިޔަވަޅެއްގެ ގޮތުގައި ރައީސް ފާހަގަކުރެއްވި އެވެ. މީގެއިތުރުން ރަށު ފެންވަރުގައި ރައްޔިތުން އިސްނަގައިގެން، އެ ރަށަކީ ދުންފަތުގެ ވަބާއިން ސަލާމަތްވެފައިވާ ރަށަކަށް ހެދުމަށް މަސައްކަތްކުރުމަށްވެސް ރައީސް ހިތްވަރުދެއްވި އެވެ.
ފާއިތުވި މަހު ގެނެވުނު ޤާނޫނީ އިސްލާހުތަކާއެކު ދުންފަތުގެ ބާވަތްތަކުގެ އަގު މައްޗަށް ޖެހުމާ ގުޅިގެން ގިނަ ފާޑުކިޔުންތަކެއް އަމާޒުވެފައިވާއިރު، މި ބަދަލުތައް ގެނެވިފައިވަނީ ރައްޔިތުންގެ ސިއްހަތަށް އިސްކަންދީގެން ކަމަށް ސަރުކާރުން ވަނީ ތަކުރާރުކޮށް ބުނެފަ އެވެ.
