ސޯޝަލް މީޑިއާގައި މިހާރު އާންމުވެފައިވާ، ކުންފުނިތަކުން ކަސްޓަމަރުންގެ ކިބައިން މައާފަށް އެދުމުގެ ޓްރެންޑްގައި އުރީދޫ މޯލްޑިވްސްއިންވެސް ބައިވެރިވެއްޖެ އެވެ.
މި ޓްރެންޑަކީ ކަސްޓަމަރުންނާ އެކު މަޖާކޮށް އެންގޭޖްވުމަށް ބޭނުންކުރާ ސްޓައިލެކެވެ. އުރީދޫން މި ޓްރެންޑްގައި ބައިވެރިވެފައިވަނީ މި އަހަރުގެ އުރީދޫ ފަން ރަން ކިޓްތައް އުންމީދުކުރި ވަރަށް ވުރެ ހަލުވިކަމާއެކު ވިކި ހުސްވުމާ ގުޅިގެންނެވެ.
އުރީދޫން ނެރުނު ބަޔާނެއްގައި ބުނެފައިވަނީ، ރަޖިސްޓްރޭޝަން ނިމުމުގެ ކުރިން ކިޓް ނުލިބުމުގެ ސަބަބުން ކަސްޓަމަރުންގެ ކިބައިން މައާފަށް އެދޭ ކަމަށެވެ. މި ޕޯސްޓަށް ގިނަ ބައެއްގެ ސަމާލުކަން ލިބި، ރާއްޖޭގެ އެކި ކަންކޮޅުތަކުގައި ފަން ރަން އަށް ލޯބިކުރާ މީހުންގެ މެދުގައި ވަނީ ވަރަށް ބޮޑު ތަރުހީބެއް ލިބިފަ އެވެ.
އުރީދޫ މޯލްޑިވްސްގެ ޗީފް ކޮމާޝަލް އޮފިސަރު ހުސައިން ނިޔާޒް ވިދާޅުވީ، މި އަހަރުވެސް އުރީދޫ ފަން ރަން އަށް އޮތް ލޯބި ވަރަށް ބޮޑު ކަމަށެވެ. މައާފަށް އެދުމުގެ ޓްރެންޑާއެކު ކަސްޓަމަރުންނާއި އެކު މަޖާ ކޮށް އެންގޭޖް ވެލާނެ މަގެއް ލިބިގެން ދިޔަ ކަމަށެވެ.
އުރީދޫން ބުނީ އާންމުންގެ ޑިމާންޑަށް ބަލައި ފަން ރަން ކިޓްގެ ފްލޭޝް ސޭލް މިއަދު މެންދުރުފަހު 2ގައި ފަށާނެ ކަމަށެވެ. މިއީ ކިޓް ނުލިބުނު ފަރާތްތަކަށް ލިބިގެންދާ އިތުރު ފުރުސަތެކެވެ.
”މިއަދު 2 ޖަހާއިރު އޮންލައިންކޮށް ކުރިއަގެންދާ ފްލޭޝް ސޭލްގެ ސަބަބުން ކަސްޓަމަރުންނަށް އިތުރު ފުރުސަތެއް ލިބުމަކީ އަޅުގަނޑުމެންނަށް ލިބޭ ވަރަށް ބޮޑު އުފަލެއް.“
އުރީދޫ ފަން ރަން އަކީ ރާއްޖޭގައި ބާއްވާ އެންމެ އުފާވެރި ފަސް ކިލޯ މީޓަރުގެ ދުވުން ކަމަށް އެ ކުންފުނިން ސިފަކުރެ އެވެ. އާއިލާ އާއި ރަހުމަތްތެރިން އެއްތަނަކަށް އެއްކޮށްލައިގެން ބާއްވާ މި ހަރަކާތުގައި ފޯމް ޕާޓީތަކާއި، ކަލަރ ތްރޯތަކާއި، އިންފްލޭޓަބަލްސް އަދި ފެސްޓިވަލް ހަރަކާތްތައް ހިމެނެ އެވެ.
އުރީދޫން ބުނި ގޮތުގައި ”އޮފިޝަލް އެޕޮލޮޖީ ސްޓޭޓްމަންޓް“ ޓްރެންޑުގައި އުރީދޫ މޯލްޑިވްސްގެ ބައިވެރިވުމަކީ، ކްރިއޭޓިވް ޑިޖިޓަލް އެންގޭޖްމަންޓާއި މުޖުތަމައާ ގުޅުވާލައިގެން މަޖާކޮށް ކަސްޓަމަރުންނާއި މުއާމަލާތް ކުރުމަށް އެ ކުންފުނިން ދޭ އަހައްމިއްޔަތުކަން ދައްކުވައިދޭ ކަމެކެވެ.
