ވެލާނާ އިންޓަނޭޝަނަލް އެއަރޕޯޓުގެ އާ ޓާމިނަލްގައި ޤާއިމްކުރެވިފައިވާ އެންމެ ފަހުގެ ޓެކްނޮލޮޖީ ބޭނުންކޮށްގެން ތައްޔާރުކުރެވިފައިވާ ބެގޭޖް ހޭންޑްލިން ސިސްޓަމަކީ ދިވެހިރާއްޖޭގެ ވައިގެ ބަނދަރުގެ ތާރީޚުގައި މިހާތަނަށް ބޭނުންކުރެވޭ އެންމެ ޒަމާނީ ސިސްޓަމެވެ. މި ސިސްޓަމަކީ މެލޭޝިއާގެ ކުއަލަ ލަމްޕޫރު އިންޓަނޭޝަނަލް އެއަރޕޯޓް އަދި ސިންގަޕޫރުގެ ޗަންގީ އެއަރޕޯޓު ފަދަ ބައިނަލްއަޤްވާމީ ފެންވަރުގެ އެއަރޕޯޓުތަކުގައި ބޭނުންކުރާ ފެންވަރުގެ ސިސްޓަމެކެވެ.
ވީއައިއޭގެ އާ ޓާމިނަލުގައި ބޭނުން ކުރަން ނިންމާފައިވާ ބެގޭޖް ހޭންޑްލިންގ ސިސްޓަމުގެ މައުލޫމާތު އެމްއޭސީއެލްއިން މިއަދު ހާމަ ކޮށްފައިވާއިރު މި ސިސްޓަމާއެކު ޓާމިނަލް ބޭނުން ކުރާ ހުރިހާ ފަސިންޖަރުންނަށްވެސް އެތަށް ފައިދާތަކެއް ވެގެން ދާނެ އެވެ. މީގެ ކުރިން ދިގު ކިއުތަކެއްގައި މަޑުކޮށްގެން ވަރަށް ހާލުގައި މި ހިދުމަތް ހޯދަން ޖެހުނު ނަމަވެސް މިމަހުގެ 26 އިން ފެށިގެން މިކަމަށް ބޮޑު ލުޔެއް ލިބިގެން ދާނެ އެވެ.
އާ ސިސްޓަމްގެ ޚާއްޞަ ކަންތައްތައް
މި އާ ސިސްޓަމްގެ އެންމެ ފާހަގަކޮށްލެވޭ އެއް ޚާއްޞަ ކަމަކީ ގަޑިއިރަކު 1200 ދާގީނާ ނުވަތަ މިނެޓަކު 20 ދާގީނާ ސްކްރީން ކުރެވޭ ވަރުގެ ޤާބިލުކަން ލިބިގެންވުމެވެ. މީގެ އިތުރުން، ރާއްޖޭގައި ފުރަތަމަ ފަހަރަށް ތްރީ-ޑީ ސްކްރީނިން މެޝިންތައް ބޭނުންކުރަން ފެށުމަކީވެސް މުހިންމު ކުރިއެރުމެކެވެ. މި ސިސްޓަމްގެ 80-90 އިންސައްތަ މަސައްކަތް ހިނގަމުންދާނީ އޮޓޮމެޓިކްކޮށެވެ.
މިހާރުގެ ގޮންޖެހުންތަކަށް ހައްލު
މިހާރު ދިމާވަމުންދާ އެތައް ގޮންޖެހުންތަކަކަށް މި އައު ސިސްޓަމުން ހައްލު ލިބިގެންދާނެ އެވެ. މިސާލަކަށް، ކުރިން ޓާމިނަލް ބޭރުގައި ދިގު ކިއުތަކުގައި މަޑުކުރަން ޖެހުމާއި، އެންމެންގެ ކުރިމަތީގައި ދާގީނާ ހުޅުވަން ޖެހުމުގެ ސަބަބުން ގެއްލެމުންދިޔަ ޕްރައިވަސީގެ މައްސަލަ ހައްލުވެގެންދާނެ އެވެ. އާ ޓާމިނަލްގައި 47 ޗެކިން ކައުންޓަރާއި 6 ސެލްފް ޗެކިން ކިއޮސްކް ހުރުމުން ޚިދުމަތް އަވަސްވެ، ތޮއްޖެހުން ކުޑަވެގެންދާނެ އެވެ.
ތިން މަރުހަލާގެ ސަލާމަތީ ނިޒާމް
ފުރަތަމަ މަރުހަލާ: މި މަރުހަލާގައި ބޭނުންކުރެވޭ އެންމެ ފަހުގެ އީޑީއެސް (ސީޓީއެކްސް) މެޝިންތަކުން ތްރީ-ޑީކޮށް ދާގީނާތައް ސްކްރީން ކުރެވޭނެ އެވެ. މިއީ ރާއްޖޭގައި މިފަދަ މެޝިންތަކެއް ބޭނުންކުރާ ފުރަތަމަ ފަހަރެވެ. މިއީ މުޅިން އޮޓޮމެޓިކް މަރުހަލާއެކެވެ. މި މަރުހަލާ އިން އެއްވެސް ކަމެއް ފާހަގަކުރެވިއްޖެ ނަމަ ދާގީނާ ދެން ފޮނުވާލާނީ 2 ވަނަ މަރުހަލާ އަށެވެ.
ދެވަނަ މަރުހަލާ: މިއީ އޮޓަމޭޓެޑް މެޝިނުން ފާހަގަވި ކަންތައް އިތުރަށް ކަށަވަރު ކުރުމަށް ފޮނުވާ މަރުހަލާ އެވެ. މި މަރުހަލާގައި އެވްސެކޮމްގެ 18 މޭޒާއި ކަސްޓަމްސްގެ 22 މޭޒު މެދުވެރިކޮށް އިތުރު ސްކްރީނިންގ ހަދައެވެ. މި މަރުހަލާގައިވެސް ޒަމާނީ ސިސްޓަމްތައް ބޭނުންކުރެވެއެވެ. މި މަރުހަލާ އިން އެއްވެސް މައްސަލައެއް ފާހަގަނުވެއްޖެ ނަމަ ދާގީނާ އަނބުރާ އާންމު ރޫޓަށް ފޮނުވާލެވޭނެ އެވެ. މައްސަލައެއް ފާހަގަވެއްޖެ ނަމަ ދާގީނާ ފޮނުވާލާނީ ތިންވަނަ އަދި އެންމެ ފަހު މަރުހަލާ އަށެވެ.
ތިންވަނަ މަރުހަލާ: މިއީ އެންމެ ފަހުގެ މަރުހަލާއެވެ. މި މަރުހަލާގައި އެވްސެކޮމްގެ އޮފިސަރުން ޑުއަލް ވިއު ސްކްރީނިން މެޝިންތައް ބޭނުންކޮށްގެން އިތުރު ޗެކްތައް ހަދައެވެ. އެކަމަށްޓަކައި 6 ސްޓޭޝަން ހުންނާނެ އެވެ. މި މަރުހަލާގައި ދާގީނާ އިން މަތިންދާބޯޓަށް އަރުވަން މަނާ އެއްވެސް އެއްޗެއް ފެނިއްޖެ ނަމަ ދާގީނާ ހުޅުވާނެ އެވެ. އެކަން ކުރާނީ އެކަމަށް ހާއްސަކޮށްފައިވާ ސަރަހައްދަށް ގެންގޮސްގެންނެވެ. ދާގީނާއެއް ހުޅުވާނީ އެ ދާގީނާއެއް ނިސްބަތްވާ މީހަކު ގެނެސް އޭނާގެ ހާޒިރުގަ އެވެ.
ލިބިގެންދާނެ ފައިދާތައް
މި އާ ސިސްޓަމްގެ ސަބަބުން:
- ފަސިންޖަރުންގެ ވަގުތު ސަލާމަތްވެ، ދަތުރުފަތުރު ފަސޭހަވެގެންދާނެ
- ސަލާމަތީ ފިޔަވަޅުތައް އިތުރަށް ހަރުދަނާވެގެންދާނެ
- ފަސިންޖަރުންގެ ޕްރައިވަސީ ރައްކާތެރިވެގެންދާނެ
- އެއަރޕޯޓުގެ މަސައްކަތްތައް އިތުރަށް ހަލުވިވެ، ހަރުދަނާވެގެންދާނެ
މީގެ އިތުރުން ވެލާނާ އިންޓަނޭޝަނަލް އެއަރޕޯޓަށް އަންނަ ފަސިންޖަރުންނަށް ދިމާވަމުންދާ އެންމެ ބޮޑު އެއް ގޮންޖެހުންކަމަށްވާ ދާގީނާ ލިބުމުގައި ދިމާވާ ލަސްކަމަށްވެސް އާ ޓާމިނަލުން ހައްލު ހޯދާނެ އެވެ. މި މައްސަލައަށް ހައްލެއް ހޯދުމަށްޓަކައި އާ ޓާމިނަލްގައި ވަނީ ޒަމާނީ އަދި ހަލުވި ނިޒާމެއް ޤާއިމްކުރެވިފަ އެވެ.
މިހާރު ބޭނުންކުރަމުންދާ ޓާމިނަލްގައި ދާގީނާ ނެރުމަށް ހުރީ އެންމެ ހަތަރު ބެލްޓެވެ. މީގެ ސަބަބުން އިމިގްރޭޝަން މަރުހަލާ ނިންމުމަށްފަހު ދާގީނާ ލިބެންދެން ފަސިންޖަރުން ގިނަ ވަގުތު މަޑުކުރަން ޖެހެ އެވެ. އަދި ގިނަ ފްލައިޓުތަކެއް އެއްފަހަރާ އައުމުން އެރައިވަލް ހޯލް ތޮއްޖެހި، ފަސިންޖަރުންނަށް ދަތިތަކާ ކުރިމަތިވުމާއި ދާގީނާ ލިބުމުގެ ލަސްކަމަކީ ފަސިންޖަރުންގެ ފަރާތުން އަންނަ ބޮޑު ޝަކުވާއެކެވެ.
އާ ޓާމިނަލްގައި ވަނީ މި މައްސަލަތައް ހައްލުކުރުމަށް ޚާއްޞަ ސަމާލުކަމެއް ދެވިފައެވެ. އެގޮތުން ދާގީނާ ނެރުމަށް 6 ބެލްޓް ގާއިމު ކުރެވިފައިވާއިރު މި މަސައްކަތަށް ބޭނުން ކުރަން ނިންމާފައިވަނީ އެންމެ ފަހުގެ ހައި-ސްޕީޑް މެޝިންތަކެވެ. އަދި އެރައިވަލް ހޯލްގެ ޖާގަވެސް އާ ޓާމިނަލުގައި ވަނީ އިތުރުކޮށްފަ އެވެ.
މި ބަދަލުތަކާއެކު ދާގީނާ ލިބުމަށް މަޑުކުރަންޖެހޭ ވަގުތު މަދުވެ އެރައިވަލް ހޯލްގައި ތޮއްޖެހުން ކުޑަވެގެންދެ އެވެ. އަދި ފަސިންޖަރުންނަށް ލިބޭ ޚިދުމަތުގެ ފެންވަރު މަތިވުމާއެކު އެއްފަހަރާ ގިނަ ފްލައިޓުތަކަށް ޚިދުމަތް ދެވޭނެ ޤާބިލުކަން އިތުރުވެގެންދެ އެވެ.
އާ ޓާމިނަލްގެ އެރައިވަލް ހޯލް ކުރީގެ ޓާމިނަލްއާ އަޅާބަލާއިރު ފާހަގަކޮށްލެވޭ ވަރަށް ބޮޑުވެފައިވުމުގެ ސަބަބުން ފަސިންޖަރުންނަށް ތަނަވަސްކަމާއެކު މަޑުކުރެވޭނެ ޖާގަ ލިބިގެންދާނެ އެވެ. އަދި ދާގީނާ ނަގައި ނިމެންދެން ފަސޭހައިން އިށީނދެ މަޑުކުރެވޭއިރު ޢާއިލާތަކާއެކު އަންނަ ފަސިންޖަރުންނަށް ފަސޭހަވެގެންދާނެ އެވެ.
ވެލާނާ އިންޓަނޭޝަނަލް އެއަރޕޯޓުގެ އާ ޓާމިނަލްގެ ބެގޭޖް ހޭންޑްލިން ސިސްޓަމަކީ ދިވެހިރާއްޖޭގެ ވައިގެ ދަތުރުފަތުރުގެ ދާއިރާއަށް އައިސްފައިވާ އެންމެ ބޮޑު އެއް ކުރިއެރުމެވެ. މި ސިސްޓަމްގެ ސަބަބުން ރާއްޖޭގެ މައި ވައިގެ ބަނދަރު ބައިނަލްއަޤްވާމީ ފެންވަރަށް އަރައި، ފަސިންޖަރުންނަށް ލިބޭ ޚިދުމަތުގެ ފެންވަރު މަތިވެގެންދާނެ އެވެ. އަދި މީގެ ސަބަބުން ރާއްޖެއަށް އަންނަ ފަތުރުވެރިންނަށް މިހާރަށްވުރެ ފެންވަރު ރަނގަޅު ހިދުމަތްތަކެއް ދެވިގެން ދާނެ އެވެ. މިއީ ރާއްޖޭގެ ފަތުރުވެރިކަމުގެ ސިނާއަތަށްވެސް ލިބޭނެ ބޮޑު ކުރިއެރުމެކެވެ.
