ރާއްޖޭގައި އުޅޭ ވާލާއި ކާޅުގެ އަދަދު ބަލައި ދެނެގަތުމަށް އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ)އިން ދިރޭ ތަކެއްޗާއި ބެހޭ މިނިސްޓްރީއަށް ލަފާދީފި އެވެ.
މި ލަފާ ދީފައިވަނީ ދަނޑުވެރިންނަށް މި ދިރޭތަކެތީގެ ސަބަބުން ލިބޭ ގެއްލުންތަކަށް ހައްލެއް ހޯދުމަށް ބޭއްވި މަޝްވަރާ ބައްދަލުވުމެއްގަ އެވެ.
އީޕީއޭއިން ފާހަގަކޮށްފައިވާ ގޮތުގައި، ރާއްޖޭގައި އުޅޭ ވާލާއި ކާޅުގެ އަދަދު ދެނެގަތުމަށްފަހު، މި ދިރޭތަކެތި ބެލެހެއްޓުމަށް އެންމެ އެކަށީގެންވާ ގޮތްތައް ކަނޑައެޅޭނެ އެވެ. އީޕީއޭއިން ވަނީ މި ދިރޭތަކެތީގެ އުނދަގޫ ބޮޑުވެ، އެހެން ހައްލެއް ނެތް ހާލަތެއްގައި އެންމެ ފަހު ފިޔަވަޅެއްގެ ގޮތުން އެ ތަކެތި ކޮންޓްރޯލްކޮށްގެން މެރުމަށް ލަފާދީފަ އެވެ.
ދިރޭތަކެއްޗާ ބެހޭ މިނިސްޓަރު ޑރ. މަރިޔަމް މާރިޔާ ވިދާޅުވެފައިވަނީ މި މައްސަލައިގައި ގިނަ ވުޒާރާތަކުން މަސައްކަތްތަކެއް ކުރަމުންދާ ކަމަށެވެ. ”މިވަގުތު ކާޅާއި ވާ ވަނީ ޕެސްޓަކަށް ވެފައި. އެކަމަށް ސަބަބުތަކެއް އެބަހުރި،“ މިނިސްޓަރު ވިދާޅުވި އެވެ.
މިނިސްޓަރު އިތުރަށް ފާހަގަކުރެއްވި ގޮތުގައި، މި ދިރޭތަކެއްޗާއެކު ރައްޔިތުން އުޅެން ދަސްކުރަންޖެހެ އެވެ. އަދި މި މައްސަލައަށް ހައްލެއް ހޯދުމަށް ބޭރުގެ ޤައުމުތަކުގެ ކޮންފަރެންސްތަކުގައި މަޝްވަރާކުރަމުންދާކަންވެސް މިނިސްޓަރު ވަނީ ފާހަގަކުރައްވާފަ އެވެ.
މި މައްސަލައަކީ ދަނޑުވެރިންނަށް ދިމާވެފައިވާ ބޮޑު ގޮންޖެހުމަކަށްވެފައި، ސަރުކާރުން މިހާރު އަޅަމުންދާ ފިޔަވަޅުތަކުގެ ތެރެއިން މި ދިރޭތަކެތީގެ އަދަދު ދެނެގަތުމަކީ މުހިންމު ފިޔަވަޅެއް ކަމުގައި ފާހަގަކުރެ ވެއެވެ.
އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) މިނިސްޓަރު ޑރ. މަރިޔަމް މާރިޔާ
