އިންޑިއާގެ ކްރިކެޓު ޓީމުގެ ކެޕްޓަން ރޯހިތު ޝަރްމާ އޭނާގެ އާއިލާއާއެކު ޗުއްޓީ ހޭދަކުރުމަށް ރާއްޖެ އަތުވެއްޖެ އެވެ.
ރޯހިތާއެކު މި ދަތުރުގައި އޭނާގެ އަންހެނުން ރިތިކާ ސަޖްދޭ އާއި ދަރިފުޅު ސަމައިރާ ބައިވެރިވެ އެވެ.
މައުލޫމާތު ލިބިފައިވާ ގޮތުގައި ރޯހިތުގެ އާއިލާ މިވަގުތު ޗުއްޓީ ހޭދަކުރަމުންދަނީ ވޯލްޑޯފް އެސްޓޯރިއާ ރިސޯޓުގަ އެވެ. ޓުޑޭ އިންޑިއާގެ ރިޕޯޓެއްގައި ބުނެފައިވާ ގޮތުން، މި ދަތުރަކީ އިންޑިއަން ޕްރިމިއަރ ލީގު (އައިޕީއެލް) ފެށުމުގެ ކުރިން އާއިލާއާއެކު ވަގުތު ހޭދަކޮށްލުމަށް ކުރި ދަތުރެކެވެ.
އައިޕީއެލްގެ ކެމްޕެއިން ފެށުމަށް ހަމަޖެހިފައިވަނީ މިމަހުގެ 23 ވަނަ ދުވަހު ޗެންނާއީގަ އެވެ.
ރޯހިތު ރާއްޖެއަށް ޒިޔާރަތްކޮށްފައިވަނީ ރައީސުލްޖުމްހޫރިއްޔާ މުޙައްމަދު މުޢިއްޒުގެ އިރުޝާދުގެ ދަށުން ސަރުކާރުން ސްޕޯޓްސް ޓޫރިޒަމް ކުރިއެރުވުމަށް ގިނަ މަސައްކަތްތަކެއް ކުރަން ފެށި ފަހުންނެވެ. މި ގޮތުން ސަރުކާރުން ވަނީ ދާދި ފަހުން ލިވަޕޫލް ފުޓްބޯޅަ ކްލަބާއެކު އެއްބަސްވުމެއްގައި ސޮއިކޮށްފަ އެވެ. އަދި ވިޒިޓް މޯލްޑިވްސްއިން ވަނީ މަޝްހޫރު ކުޅިވަރު ނޫސްވެރިޔާ ފެބްރީޒިއޯ ރޮމާނޯ ގްލޯބަލް އެމްބަސަޑަރުކަމަށް ހަމަޖައްސާފަ އެވެ.
ރޯހިތު ޝަރްމާގެ މި ޒިޔާރަތަކީ ރާއްޖޭގެ ސްޕޯޓްސް ޓޫރިޒަމް ކުރިއެރުވުމަށް ސަރުކާރުން ކުރަމުންދާ މަސައްކަތްތަކުގެ ނަތީޖާއެއްގެ ގޮތުގައި ބެލެވެ އެވެ. މިފަދަ މަޝްހޫރު ކުޅުންތެރިންގެ ޒިޔާރަތްތަކުން ރާއްޖޭގެ ފަތުރުވެރިކަމަށް އިތުރު ކުރިއެރުންތަކެއް ލިބިގެން ދާނެ އެވެ.
އޭގެއިތުރުން ރާއްޖެއަށް އަންނަ އިންޑިއާ ފަތުރުވެރިންގެ އަދަދު އިތުރުކުރުމަށްވެސް ރައީސްގެ އިރުޝާދުގެ ދަށުން އަންނަނީ ގިނަ މަސައްކަތްތަކެއް ކުރަމުންނެވެ. އޭގެތެރެއިން އިންޑިއާގެ އެކި މަޝްހޫރު ފަންނާނުންނަށް ރާއްޖެއަށް ދައުވަތުތައް ދެމުން އާދެ އެވެ.
މިވަގުތު، ރާއްޖެ އަންނަ އިންޑިއާ ފަތުރުވެރިންގެ އަދަދަށް ކޮންމެވެސް ވަރެއްގެ މަދުކަމެއް އައި ނަމަވެސް، ސަރުކާރުގެ އަމާޒަކީ މި އަހަރުގެ ލޯ ސީޒަންއަށް ރާއްޖެ އަންނަ އިންޑިއާ ފަތުރުވެރިންގެ އަދަދު އިތުރުކުމެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުޅިވަރު ފަތުރުވެރިކަން
