ރައްޔިތުންގެ މަޖިލީހަށް މިހާރު ހުށަހަޅާފައިވާ އިޒްރޭލް ޕާސްޕޯޓް މަނާ ކުރާ ބިލުގެ މަސައްކަތް އަވަސް ކުރަން ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އިން ފާސްކޮށްފި އެވެ.
ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މީކާއިލް ނަސީމް ހުށަހެއްޅުއްވި މި ބިލުގެ މަސައްކަތް މިވަގުތު އޮތީ 241 ކޮމިޓީގަ އެވެ. ކޮމިޓީން މީގެ ކުރިން ނިންމާފައިވަނީ ޑިސެމްބަރުގެ ނިޔަލަށް ކަމާބެހޭ އިދާރާތަކަށް ބިލާ ގުޅޭ ގޮތުން ސިޓީ ފޮނުވުމަށްފަހު ލިބޭ ޖަވާބަށް ބެލުމަށްފަހު އެ ފަރާތްތައް ކޮމިޓީއަށް ހާޒިރުކޮށް ސުވާލު ކުރުމަށެވެ.
މިއަދު ބޭއްވި 241 ކޮމިޓީގެ ބައްދަލުވުމުގައި ވަނީ މި ބިލުގެ މަސައްކަތް އަވަސް ކުރުމުގެ ގޮތުން މާދަމާއިން ފެށިގެން ވެސް ކަމާބެހޭ ފަރާތްތައް ހާޒިރުކޮށް ސުވާލުކުރަން ފާސްކޮށްފަ އެވެ.
އިޒްރޭލް ޕާސްޕޯޓުގައި ރާއްޖެއަށް އެތެރެވުން މަނާ ކުރުމުގެ ގޮތުން މެންބަރު މީކާއިލް އިސްލާހު ހުށަހަޅުއްވާފައިވަނީ ދިވެހިރާއްޖޭގެ އިމިގްރޭޝަންގެ ގާނޫނަށެވެ.
ރައްޔިތުންގެ މަޖިލީހަށް މިދިޔަ ހަފްތާ ވަނީ އިޒްރޭލް ޕާސްޕޯޓް މަނާ ކުރާ ބިލުގެ މަސައްކަތް އަވަސް ކުރުމަށް ގޮވާލާ ގަރާރެއްވެސް ހުށަހަޅާފަ އެވެ. ނަމަވެސް މަޖިލީހުން ވަނީ މި ގަރާރު ބޭރުކޮށްލާފަ އެވެ.
241 ކޮމެޓީ ރައްޔިތުންގެ މަޖިލިސް އިޒްރޭލު ޕާސްޕޯޓް މެންބަރު މީކާއިލް ނަސީމް
