އިޒްރޭލް ޕާސްޕޯޓުގައި ރާއްޖެއަށް ނާދެވޭ ގޮތަށް ހެދުމަށް އިމިގްރޭޝަން ގާނޫނަށް ހުށަހެޅި އިސްލާހާއި ގުޅިގެން ކަމާބެހޭ ފަރާތްތަކުގެ ހިޔާލު ހޯދަން ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީން (241 ކޮމިޓީ) ނިންމައިފި އެވެ.
އިމިގްރޭޝަންގެ ޤާނޫނަށް އިސްލާހު ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމެވެ. މި އިސްލާހުގެ މަސައްކަތް ކުރަމުން އަންނަނީ ރައްޔިތުންގެ މަޖިލީހުގެ 241 ކޮމިޓީންނެވެ.
މިއަދު ކުރިއަށްގެންދިޔަ 241 ކޮމިޓީގެ ބައްދަލުވުމުގައި ދިއްގަރު ދާއިރާގެ މެންބަރު އަދި މަޖިލީހުގެ ނައިބުރައީސް އަހުމަދު ނާޒިމް ވަނީ، އިޒްރޭލު ޕާސްޕޯޓުގައި ރާއްޖެ އަންނަނީ ކޮންބައެއް ކަމާއި އެމީހުން ރާއްޖެ އަންނަ ބޭނުން ސާފުކުރުމަށް ކަމާބެހޭ ފަރާތްތަކުގައި އެދުމަށް ހުށަހަޅާފަ އެވެ. އަދި މިކަމުގައި ޓޫރިޒަމް ދާއިރާގެ ފަރާތްތަކުގެ ޚިޔާލު ލިޔުމުން ހޯދުމަށްވެސް ނާޒިމް ހުށަހެޅުއްވި އެވެ.
241 ކޮމިޓީން މީގެކުރިން ވަނީ މި މައްސަލައިގައި ރާއްޖޭގައި އުފެދައިފައިވާ ސިޔާސީ ޕާޓީތަކާއި، ޓޫރިޒަމް ދާއިރާގައި މަސައްކަތްކުރާ މަޓީ އަދި އެހެންވެސް އެންޖީއޯތަކާ ބައްދަލުކުރުމަށް ނިންމާފަ އެވެ.
ކޮމިޓީން މިހާރު ނިންމާފައިވަނީ އިޒްރޭލު ޕާސްޕޯޓް މަނާކުރުމުގެ މަސައްކަތް 2025 ވަނަ އަހަރުގެ ފެބްރުއަރީއަށް ނިންމުމަށެވެ. މީކާއިލް އިސްލާހު ހުށަހަޅާފައިވަނީ އިމިގްރޭޝަން ޤާނޫނުގެ 8 ވަނަ މާއްދާ “ރާއްޖެ އެތެރެވުމުގެ ހުއްދަނެތް މީހުން” މި މާއްދާއަށެވެ. މީކާއިލް ހުށަހަޅާފައިވަނީ އިޒްރޭލުގެ ޕާސްޕޯޓް ގެންގުޅޭ މީހުން އަދި އިޒްރޭލުގެ ޕާސްޕޯޓުގެ އިތުރަށް އެހެން ގައުމެއްގެ ޕާސްޕޯޓް ގެންގުޅޭ މީހުންވެސް ރާއްޖެ އެތެރެވުން މަނާކުރުމަށެވެ.
