ޑޮލަރުގެ މައްސަލައަށް ކުރީގެ ސަރުކާރުތަކުން ދާއިމީ ހައްލެއް ނުހޯދުމަކީ މިހާރު އެކަމަށް ހައްލު ހޯދަން ކުރާ މަސައްކަތަށް ހުރަސް އަޅަންޖެހޭ ސަބަބެއް ނޫން ކަމަށް އެމްޑަބްލިއުއެސްސީގެ މެނޭޖިންގ ޑިރެކްޓަރ އަބްދުލް މަތީން ވިދާޅުވެއްޖެ އެވެ.
މަތީން މިހެން ވިދާޅުވެފައިވަނީ މިއަދު އެކްސްގައި ކުރެއްވި ޕޯސްޓެއްގަ އެވެ. އޭނާ ވިދާޅުވި ގޮތުގައި، ރާއްޖެއަށް އަންނަ 2 މިލިއަން ފަތުރުވެރިންގެ ފަރާތުން 5 ބިލިއަން ޑޮލަރުގެ އާމްދަނީއެއް ލިބޭއިރު، ކޮންމެ ބޮލަކަށް 500 ޑޮލަރު މާރު ކުރާނަމަ، އެއީ ޑޮލަރުން ލިބޭ އާމްދަނީގެ 20 އިންސައްތަ ނުވަތަ 1 ބިލިއަން ޑޮލަރެވެ.
މީގެ އިތުރުން، މަތީން ފާހަގަކުރެއްވި ގޮތުގައި މި އަދަދު 3 ރުފިޔާގެ ފައިދާއެއް ލާފައި (18.45 ރުފިޔާގެ ރޭޓުން) ކަޅުބާޒާރަށް ނެރެ މާރު ކޮށްލައިފިނަމަ، އެއީ 3 ބިލިއަން ދިވެހި ރުފިޔާ އެވެ. އަދި ޑޮލަރުގެ ކަޅުބާޒާރަކީ އެތައް ބިލިއަން ރުފިޔާގެ ނަފާ ނެރެވޭ ވިޔަފާރިއަކަށް ވާއިރު، އެކަން ހުއްޓާލަން އެއްބަޔަކު ބޭނުން ނުވާނެ ކަމަށްވެސް އޭނާ ވިދާޅުވި އެވެ.
ނަމަވެސް، މަތީން ވިދާޅުވި ގޮތުގައި މިކަމަކީ އާންމު ރައްޔިތުންނާއި ޚިދުމަތްތައް ފޯރުކޮށްދޭ ފަރާތްތަކަށް ލިބިގެންދާނެ ވަރަށް ބޮޑު ލުޔެކެވެ. އެހެންކަމުން، ޑޮލަރުގެ މައްސަލައަށް ހައްލު ހޯދުމަށް މިހާރު ކުރެވޭ މަސައްކަތަށް ހުރަސް އެޅުމުގެ ބޭނުމެއް ނެތް ކަމަށް އޭނާ ވިދާޅުވި އެވެ.
ޑޮލަރުގެ މައްސަލަ ހައްލުކުރުމަށް ސަރުކާރުން ފެށި މަސައްކަތަށް ރިސޯޓުތައް ހިންގާ ކުންފުނިތަކުން ވަނީ ދެކޮޅު ހަދާފަ އެވެ.
