ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ސެންޓަ ފޯ ހަޔަ ސެކަންޑްރީ އެޑިއުކޭޝަން – މާލެ، ހުޅުވާދެއްވައިފި އެވެ.
ކުރިން ހަމައެކަނި މާލޭގައި ކިޔަވައިދެމުން ގެންދިޔަ ސީއެޗްއެސްއީގެ ކިޔެވުން ހުޅުމާލެއަށް ބަދަލުކޮށްފައިވަނީ މާލޭގައި ކިޔަވައިދެމުން ދިޔަ އިމާރާތް ބާވުމުގެ ސަބަބުންނެވެ. ރޭ ބޭއްވި ރަސްމިއްޔާތެއްގައި ސީއެޗްއެސްއީ މާލޭގައި އަލުން ހުޅުވާފައިވަނީ އެ ސްކޫލުގެ އިމާރާތުގެ އާބާތުރަ ފިލުވުމަށްފަހު އެވެ.
ރޭ ބޭއްވި ރަސްމިއްޔާތުގައި ސީއެޗްއެސްއީން ވަނީ އެހާރާއި މިހާރުގެ ހަނދާނީ ރަމްޒެއް ރައީސް މުއިއްޒަށް ވެދުމަށް އަރުވާފަ އެވެ. އަދި ރައީސް މުއިއްޒު ވަނީ ސީއެޗްއެސްއީގެ ފަސް ދަރިވަރެއްގެ ބައިވެރިވުމާއެކު ބޭއްވި ”ޤައުމުގެ މުސްތަޤުބަލާމެދު ދަރިވަރުންގެ އުންމީދު“ ފޯރަމް ބައްލަވާލައްވާފަ އެވެ.
ސީއެޗްއެސްއީއަށް 45 އަހަރު ފުރުމާއި ޖުލައި 3 ވަނަ ދުވަހު އެ ސްކޫލުން ބޭއްވި ހާއްސަ އެސެމްބްލީގައި ރައީސް މުއިއްޒު ވަނީ މަތީ ސާނަވީ ކިޔެވުމުގެ އިންތިޒާމު މާލޭގައި މިއަހަރު ސަރުކާރުން އަލުން ހަމަޖެއްސެވުމަށް ނިންމަވާފައިވާކަމަށް ވިދާޅުވެފަ އެވެ. އެހެންކަމުން ރޭ މާލޭގައި ސީއެޗްއެސްއީ އަލުން ހުޅުވިގެން ދިޔުމުން މާލޭގައި މަތީ ސާނަވީއަށް ކިޔެވުމުގެ ފުރުސަތު ވަނީ ފަހިވެގެން ގޮސްފަ އެވެ.
މި ރަސްމިއްޔާތުގައި ވާހަކަދައްކަވަމުން އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވީ މާލޭގެ ސީއެޗްއެސްއީ އުވި، ހުޅުމާލޭގައި ސީއެޗްއެސްއީ އުފެދި، ގިނަ ދަރިވަރުންތަކެއް މާލެއިން ހުޅުމާލެއަށް ދަތުރުކުރަން ޖެހުމަކީ ވަރަށް ބޮޑު ތަކުލީފަކަށް ވެގެން ދިޔަ ކަމަށެވެ. އަދި އެކަމުގެ އުނދަގޫކަން ގިނަ ރައްޔިތުންނަށް އިހުސާސުވި ކަމަށާއި މިކަމުގެ ޝަކުވާތައް އަޑުއައްސަވާ، މާލޭގައި އަލުން ސީއެޗްއެސްއީ ހުޅުވާ، ގާތުން ތައުލީމް ދިނުމުގެ ސިޔާސަތު ކަށަވަރު ކުރުމަށް ރައީސް މުއިއްޒު ނިންމެވި ނިންމެވުމަކީ ޝުކުރުވެރިކަމާއެކު މުޅި ތައުލީމީ ދާއިރާގެ އެންމެހާ ބޭފުޅުން ފާހަގަކުރައްވާ ކަމެއްކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ ސަރުކާރުގެ އެންމެ ބޮޑު އެއް އަމާޒަކީ އޯ ލެވެލް ނިންމާ ދަރިވަރުންނަށް އިތުރު ފުރުސަތުތައް ފަހިކޮށްދިނުން ކަމަށެވެ. އަދި ކުރިން އެގާރަ ސަތޭކައެއްހާ ކުދިން އޭ ލެވެލްގައި ބައިވެރިވާ ބައިވެރިވުން މިހާރު ދެހާހާއި ގާތްކުރާ އަދަދަކަށް މަތިކުރެވިފައިވާކަން މިނިސްޓަރު ފާހަގަ ކުރެއްވި އެވެ.
ސީއެޗްއެސްއީ މާލޭގައި މިރޭ އަލުން ހުޅުވިގެންދާއިރު މި ސްކޫލުގައި މިހާރު 424 ދަރިވަރުން ދަނީ ތައުލީމު ހާސިލްކުރަމުންނެވެ. ސީއެޗްއެސްއީ އެންމެ ފުރަތަމަ ހުޅުވާފައިވަނީ 3 ޖުލައި 1979 ވަނަ އަހަރު އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ސެންޓަރ ފޯ ހަޔަރ ސެކަންޑަރީ އެޑިއުކޭޝަން (ސީއެޗްއެސްއީ)
