ރަޝިޔާގެ ރައީސް ވްލަދިމީރު ޕުޓިން، މިއަދު ތުރުކީގައި ބޭއްވޭ ޔުކްރެއިނާއާއެކު ކުރެވޭ ސުލްހައިގެ މަޝްވަރާތަކުގައި ބައިވެރިނުވާނެ ކަމަށް ރަޝިޔާއިން ހާމަކޮށްފި އެވެ.
އިސްތަންބޫލުގައި ބޭއްވުމަށް ހަމަޖެހިފައިވާ މި މަޝްވަރާތަކުގައި އެމެރިކާގެ ރައީސް ޑޮނަލްޑް ޓްރަމްޕްވެސް ބައިވެރިނުވާނެ ކަމަށް މީޑިއާ ރިޕޯޓުތަކުގައި ވެއެވެ.
ޔުކްރެއިންގެ ރައީސް ވޮލޮޑިމިރް ޒެލެންސްކީ ބުރާސްފަތި ދުވަހު ތުރުކީގެ ވެރިރަށް އަންކަރާގައި ރައީސް ރެސެޕް ޓައިޔިޕް އެރްދޮއާނާ ބައްދަލުކުރައްވާނެ ކަމަށް އިޢުލާނުކުރައްވާފައިވެ އެވެ. ”އިސްތަންބޫލުގައި ރަޝިޔާއާއެކު ކުރެވޭ މަޝްވަރާތަކުގައި ބައިވެރިވާނީ ޕުޓިން އެތަނުގައި ހުރިނަމަ އެކަނި“ ކަމަށް ޒެލެންސްކީ ވިދާޅުވެފައިވެ އެވެ.
ރަޝިޔާގެ ވަފުދުގައި ހިމެނޭ އިސް ބޭފުޅުންގެ ތެރޭގައި ރަޝިޔާގެ ރައީސްގެ ލަފާދޭ ވްލަދިމީރު މެޑިންސްކީ، ޑެޕިއުޓީ ފޮރިން މިނިސްޓަރު މިޚައިލް ގަލުޒިން އަދި ޑެޕިއުޓީ ޑިފެންސް މިނިސްޓަރު އެލެކްސެންޑަރ ފޮމިން ހިމެނެ އެވެ. މީގެ އިތުރުން، ރަޝިޔާގެ މައި އިންޓެލިޖެންސް ޑައިރެކްޓަރޭޓްގެ އިސްވެރިޔާ އިގޯރ ކޮސްޓިއުކޮވްވެސް ހިމެނެ އެވެ.
ޕުޓިންއާއި ޒެލެންސްކީ އެންމެ ފަހުން އަމިއްލަފުޅަށް ބައްދަލުކުރެއްވީ 2019 ގެ ޑިސެމްބަރު މަހުގަ އެވެ. މިފަދަ ދިގު މުއްދަތެއްގެ ފަހުން ދެ ރައީސުން ބައްދަލުކުރައްވާނެކަމުގެ އުންމީދު ގެއްލިފައިވާ ދަނޑިވަޅެއްގައި، މި މަޝްވަރާތަކަކީ ދެ ޤައުމުގެ ދެމެދުގައި އޮތް ހަނގުރާމައިގެ ހާލަތު ނިމުމަކަށް ގެނައުމަށް އެޅޭ މުހިންމު ފިޔަވަޅެއް ކަމުގައި ބައިނަލްއަޤްވާމީ މުޖުތަމަޢުން ދެކެ އެވެ.
