ދިވެހި ސާފް ލީގުގެ ފަހު މުބާރާތް ކަމަށްވާ ރަންނަމާރި ޗެލެންޖުގެ ޖޫނިއާ ބައިގެ ޗެމްޕިއަންކަން ޔަސީން އަހުމަދު ނާޝިދު ހޯދިއިރު، މުހައްމަދު އިނާން އަބްދުލް ހައްނާން، ސާފް ލީގުގެ ޖޫނިއާ ޗެމްޕިއަންކަން ހޯދައިފި އެވެ.

މި އިވެންޓަށް ނިކުތްއިރުވެސް ތާވަލުގެ އެއްވަނައިގައި އޮތީ އިނާން އެވެ. ރަންނަމާރި ޗެލެންޖުން ފަސްވަނަ ލިބުނު ނަމަވެސް، އިނާން އަށް ވަނީ 3470 ޕޮއިންޓާއެކު ލީގުގެ ޗެމްޕިއަންކަން ލިބިފަ އެވެ. ދެވަނައިގައި ކަޔާން އަބްދުﷲ އަރީފް އަށް ލިބުނީ 3450 ޕޮއިންޓެވެ. އަދި ތިންވަނައިގައި ޔަސީން އަށް ލިބުނީ 3200 ޕޮއިންޓެވެ.

މިއަދު ކުރިޔަށްދިޔަ ސެމީ ފައިނަލުގެ ފުރަތަމަ ހީޓުގައި ވާދަކޮށްފައިވަނީ ކަޔާން އަބްދުﷲ އަރީފް އާއި ޔޫސުފް ކަޔާން ހަމްދާން ޒަކީ އެެވެ. މި ހީޓުން ކަޔާން އަބްދުﷲ އަށް 12.00 ލިބުނުއިރު، ޔޫސުފް ކަޔާން އަށް ލިބުނީ 9.00 އެވެ. ސެމީގެ ދެވަނަ ހީޓުގައި ވާދަކުރީ ޔަސީން އާއި ސައްޔިދު ސަލާހުއްދީން އެވެ. ޔަސީން 11.50 ހޯދިއިރު، ސައްޔިދަށް ލިބުނީ 8.25 އެވެ.

ފައިނަލުގައި ޔަސީން ވަނީ ޖުމްލަ 11.00 ހޯދާފަ އެވެ. އޭނާ އެންމެ މަތިން ސްކޯ ކޮށްފައިވަނީ 5.00 އާއި 6.00 އެވެ. އަދި ކަޔާން އަށް ލިބުނީ ޖުމްލަ 9.70 އެވެ. އޭނާ އަށް އެންމެ މަތިން ހޯދުނީ 5.00 އާއި 4.70 އެވެ.

ކަޔާން ވަނީ މިއަހަރުގެ މުބާރާތުގެ މެންސް އޯޕަންގެ ފައިނަލުގައިވެސް ވާދަކޮށްފަ އެވެ. ހޫދު އަހުމަދު (ހޫބްސް) އާ ވާދަކޮށް، އެ ޑިވިޝަނުންވެސް ކަޔާން އަށް ލިބުނީ ދެވަނަ އެވެ.

މިދިޔަ ހަފުތާގައި ކުރިޔަށްދިޔަ ޖޫނިއާ ސާފިން ޗެމްޕިއަންޝިޕުގެ 18 އަހަރުން ދަށުގެ ޗެމްޕިއަނަކީ އިނާން އެވެ. އަދި 14 އަހަރުން ދަށުގެ ޗެމްޕިއަނަކީ ޔަސީން އެވެ.

ރަންނަމާރި ޗެލެންޖް ސާފިން