ގައުމީ ސާފް ލީގުގެ ފަހު މުބާރާތް ކަމަށްވާ ރަންނަމާރި ޗެލެންޖު ކާމިޔާބުކޮށް، ހޫދު އަހުމަދު (ހޫބްސް) ދެވަނަ ފަހަރަށް ސާފް ލީގުގެ ޗެމްޕިއަންކަން ހޯދައިފި އެވެ.

ހޫބްސް ވަނީ މީގެކުރިން 2021 ވަނަ އަހަރުގެ ސާފް ލީގުގެ ޗެމްޕިއަންކަން ހޯދާފަ އެވެ. މިއަހަރުގެ އެންމެ ފަހު އިވެންޓަށް ނިކުތްއިރު ހޫބްސް އޮތީ ލީގުގެ ތިންވަނައިގަ އެވެ. ނަމަވެސް، ރަންނަމާރި ޗެލެންޖް ކާމިޔާބުކޮށް، ހޫބްސް ވަނީ ޖުމްލަ 3320 ޕޮއިންޓާއެކު މިއަހަރުގެ ލީގުގެ ޗެމްޕިއަންކަން ހޯދާފަ އެވެ.

ރަންނަމާރި ޗެލެންޖުގެ ސެމީ ފައިނަލާއި ފައިނަލުގެ ހީޓުތައް ކުރިޔަށް ދިޔައީ މިއަދު އެވެ. އެގޮތުން، ސެމީގެ ފުރަތަމަ ހީޓުގައި ކަޔާން އަބްދުﷲ އަރީފް ނިކުތީ އޭނާގެ ބައްޕަ، އަބްދުﷲ އަރީފް (ފުކޫ) އާ ދެކޮޅަށެވެ. 2.45 ގެ ފަރަގަކާއެކު، ފުކޫ ބަލިކޮށް ފައިނަލުގެ ފުރަތަމަ ޖާގަ ހޯދީ ކަޔާން އެވެ. ކަޔާން ވަނީ ޖުމްލަ 9.20 ހޯދާފަ އެވެ. އޭނާ އަށް އެންމެ މަތިން ސްކޯ ކުރެވުނީ 5.50 އާއި 3.70 އެވެ. ފުކޫ އަށް އެންމެ މަތިން ސްކޯ ކުރެވުނީ 2.50 އާއި 4.25 އެވެ. މިއާއެކު އޭނާ އަށް ޖުމްލަ ލިބުނީ 6.75 އެވެ.

ސެމީގެ ދެވަނަ ހީޓުގައި ހޫބްސް ވާދަކުރީ އަހުމަދު އާގިލް (އައްމަޑޭ) އާއެވެ. އައްމަޑޭގެ މައްޗަށް ހޫބްސް ކުރިހޯދީ އެންމެ ޕޮއިންޓަކުންނެވެ. ހޫބްސް އަށް ޖުމްލަ 14.75 ލިބުނުއިރު، އައްމަޑޭ އަށް ލިބުނީ 13:75 އެވެ. ހޫބްސް އެންމެ މަތިން ސްކޯ ކުރީ 7.00 އާއި 7.75 އެވެ. އަދި އައްމަޑޭ އަށް އެންމެ މަތިން ހޯދުނީ 5.50 އާއި 8.25 އެވެ.

ސެމީ ފައިނަލަކޭ އެއްގޮތަށް، ފައިނަލުގައި ވެސް ހޫބްސް ކުރިހޯދާފައިވަނީ ކުޑަ ތަފާތަކުންނެވެ. ހޫބްސް ވަނީ 5.00 އާއި 6.25 ހޯދައި، ޖުމްލަ 11.25 ސްކޯ ކޮށްފަ އެވެ. ކަޔާން އަށް ސްކޯ ކުރެވުނީ 10.05 އެވެ. އެއީ 4.80 އަދި 5.25 ހޯދައިގެނެވެ.

މިއަދު ވަނީ މަރުހަބާ ކަޕުގެ ހީޓުތައްވެސް ކުރިޔަށްގެންގޮސްފަ އެވެ. ފައިނަލުގައި ރ. ރަސްމާދޫ ބަލިކޮށް، ޗެމްޕިއަންކަން ހޯދީ ކ. މާލެއިންނެވެ. . މާލެ އިން ޖުމްލަ 27.26 ސްކޯކުރިއިރު, ރަސްމާދޫ ޓީމަށް ސްކޯކުރެވުނީ 25.89 އެވެ.

ރަންނަމާރި ޗެލެންޖް ސާފް