ބައިނަލްއަޤްވާމީ ޖިނާއީ ކޯޓު (އައިސީސީ) އިން އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ހައްޔަރުކުރުމަށް ނެރުނު އަމުރު ރާއްޖެއިންވެސް ތަންފީޒުކުރާނެކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.
އެކްސް (ކުރީގެ ޓްވިޓަރ) ގައި ކުރެއްވި ޕޯސްޓެއްގައި އިހުސާން ވިދާޅުވީ ދިވެހިރާއްޖެއަކީ އިންޓަނޭޝަނަލް ކޯޓުތަކުގެ އަމުރުތައް ވަކި މީހަކު އިސްތިސްނާނުކޮށް ތަންފީޒުކުރާނެ ޤައުމެއް ކަމަށެވެ. މިއީ ރާއްޖެ.އެމްވީން ޝާއިޢުކުރި ޚަބަރަކާ ގުޅިގެން މިނިސްޓަރު ދެއްވި ޖަވާބެކެވެ.
އައިސީސީން މި އަމުރު ނެރުނީ ގައްޒާގައި ނިމިދިޔަ އަހަރުގެ ފަހުކޮޅުން ފެށިގެން ހިންގި ހަނގުރާމައިގެ ޖަރީމާތަކުގެ ސަބަބުންނެވެ. މި އަމުރުގައި އިޒްރޭލުގެ ބޮޑުވަޒީރު ނަތަންޔާހޫގެ އިތުރުން، އިޒްރޭލުގެ ކުރީގެ ޑިފެންސް މިނިސްޓަރު ޔޯއަވް ގަލަންޓް އަދި ހަމާސްގެ ލީޑަރު މުހައްމަދު ދެއިފް (އަލް މަސްރީ) ހައްޔަރުކުރުމަށްވެސް އަންގާފައިވެއެވެ.
އައިސީސީން ބުނި ގޮތުގައި މި ޖަރީމާތަކުގެ ތެރޭގައި ”ގައްޒާގައި ކުރާ ހަނގުރާމައިގައި ބަނޑުހައިހޫނުކަމާއި އިންސާނިއްޔަތާ ދެކޮޅަށް ހިންގާ ޖަރީމާތައް ކަމަށްވާ މީހުން މަރާލުމާއި ގޯނާކުރުމާއި އެހެނިހެން ލާއިންސާނީ އަމަލުތައް“ ހިމެނެއެވެ.
މި އަމުރާ ގުޅިގެން އިޒްރޭލުގެ ބޮޑުވަޒީރުގެ އޮފީހުން ވަނީ ބަޔާނެއް ނެރެ، މި އަމުރަކީ ”ޔަހޫދީންނާ ދެކޮޅު“ އަދި ”ތާކުންތާކު ނުޖެހޭ“ އަމުރެއް ކަމަށް ބުނެ، އެ އަމުރަށް ކިޔަމަން ނުވާނެ ކަމަށް ބުނެފައެވެ.
ހަމާސްގެ ލީޑަރު މުހައްމަދު ދެއިފް ހައްޔަރުކުރުމަށް އަމުރު ނެރުނީ 2023 ވަނަ އަހަރުގެ އޮކްޓޯބަރު 7 ވަނަ ދުވަހު އިޒްރޭލަށް ދިން ހަމަލާއާ ގުޅިގެންނެވެ. ދެއިފްއަކީ މި ހަމަލާގެ ފަހަތުގައިވާ އެއް މޭސްތިރިއެވެ.
ހޯމް މިނިސްޓަރު އަލީ އިހުސާން ރާއްޖެ - އިޒްރޭލް ބެންޖެމިން ނަތަންޔާހޫ
