އަޒަރްބައިޖާނުގެ ބަކޫގައި ކުރިއަށްދާ އދ. ގެ މޫސުމަށް އަންނަ ބަދަލުތަކާގުޅޭ މުއާހަދާގެ 29 ވަނަ ބައްދަލުވުމުގެ (ކޮޕް29) ހަވާސާގައި، ފަތުރުވެރިކަމާއި މޫސުމީ ބަދަލުތަކާ ގުޅޭ ފުރަތަމަ މިނިސްޓީރިއަލް ބައްދަލުވުން އިއްޔެ ބާއްވައިފި އެވެ.
އެންވަޔަރަންމަންޓް މިނިސްޓްރީން މަޢުލޫމާތު ދެއްވިގޮތުގައި، މި ބައްދަލުވުމުގައި ދިވެހިރާއްޖޭގެ ފަރާތުން ބައިވެރިވެ ވަޑައިގަތީ ތިމާވެށްޓާބެހޭ ވަޒީރު ޠާރިޤު އިބްރާހީމެވެ. ބައްދަލުވުމުގައި ވާހަކަ ދައްކަވަމުން ވަޒީރު ޠާރިޤު، މޫސުމަށް އަންނަ ބަދަލުތަކާ ދެކޮޅަށް ދެމެހެއްޓެނިވި ފަތުރުވެރިކަން ކުރިއަރުވާ ތަރައްޤީކުރުމަށް ރާއްޖެއިން ކުރަމުންގެންދާ މަސައްކަތްތަކާ ގުޅޭގޮތުން ތަޤުރީރުކުރެއްވި އެވެ.
ވަޒީރުގެ ވާހަކަގައި، ރާއްޖޭގެ ފަތުރުވެރިކަމުގެ ދާއިރާގައި މޫސުމަށް އަންނަ ބަދަލުތަކަށް ހޭނުމަށް ކުރަމުންގެންދާ އަދި ރާވާފައިވާ މަސައްކަތްތަކަށް އަލިއަޅުވާލެއްވި އެވެ. މީގެ ތެރޭގައި ކަނޑޫފާފަދަ ކާބަން ހިފަހައްޓާ މާހައުލުތައް ރައްކާތެރިކުރުމާއި އާލާކުރުމަށް ރާއްޖެއިން ކުރަމުންގެންދާ މަސައްކަތްތައް ހިމެނެ އެވެ. އަދި ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކާއި ރަށު ފެންވަރުގައި ކުރަމުންގެންދާ އެކި މަސައްކަތްތައްވެސް ވަޒީރު ފާހަގަކުރެއްވި އެވެ.
މި ބައްދަލުވުމަކީ ކޮޕް29 ގެ ހަވާސާގައި ފަތުރުވެރިކަމާއި މޫސުމަށް އަންނަ ބަދަލުތަކާ ގުޅޭގޮތުން މިނިސްޓީރިއަލް ފެންވަރުގައި ބޭއްވުނު ފުރަތަމަ ބައްދަލުވުމެވެ. މި ބައްދަލުވުން އިންތިޒާމުކޮށްފައިވަނީ ކޮޕް29 ގެ ރިޔާސަތުންނެވެ.
ކޮޕް29 މިނިސްޓަރ ޠާރިޤު އިބްރާހީމް މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ
