ދިވެހިރާއްޖެއިން އެ ޤައުމުގެ ފުރަތަމަ ބައިއެނުއަލް ޓްރާންސްޕޭރަންސީ ރިޕޯޓު (ބީޓީއާރު) އދ. ގެ މޫސުމަށް އަންނަ ބަދަލުތަކާ ބެހޭ އޮނިގަނޑު (ޔޫއެންއެފްސީސީސީ) އަށް ހުށަހަޅައިފި އެވެ.

އެންވާރަމެންޓް މިނިސްޓްރީން ބުނީ މިއީ ޕެރިސް އެއްބަސްވުމުގެ ދަށުން ހަރުދަނާކުރެވިފައިވާ ހާމަކަން ބޮޑު އޮނިގަނޑުގެ ދަށުން ދިވެހިރާއްޖެއިން އަދާކުރަންޖެހޭ ޒިންމާއެއް ކަމަށެވެ.

ރާއްޖެއަކީ މި ރިޕޯޓު ހުށަހެޅި ތިންވަނަ ކުދި ޖަޒީރާ ގައުމެވެ. މި ރިޕޯޓުގައި ރާއްޖޭގެ ގްރީންހައުސް ގޭސް ބޭރުކުރާ މިންވަރާއި، މޫސުމަށް އަންނަ ބަދަލުތަކުގެ އަސަރު ކުޑަކުރުމަށާއި އެ ބަދަލުތަކަށް ހޭނުމަށް ކުރެވޭ މަސައްކަތްތަކުގެ ތަފްސީލީ މަޢުލޫމާތު ހިމެނެއެވެ. މީގެ އިތުރުން، ގައުމީ ފެންވަރުގައި ކަނޑައަޅާފައިވާ އަމާޒުތައް (އެންޑީސީ) ހާސިލުކުރުމަށް ކުރެވޭ މަސައްކަތްތަކުގެ ކުރިއެރުމާއި، މޫސުމަށް އަންނަ ބަދަލުތަކާ ގުޅޭ ޙަރަކާތްތައް ހިންގުމަށް ބޭނުންވާ އެހީއާއި ލިބިފައިވާ އެހީގެ މަޢުލޫމާތުވެސް މި ރިޕޯޓުގައި ހިމަނާފައި ވެއެވެ.

މި ރިޕޯޓު ހުށަހެޅުމާ ގުޅިގެން، ދިވެހިރާއްޖެއަށް ވަނީ ބީޓީއާރު ޗެމްޕިއަން ސެޓްފިކެޓް ލިބިފަ އެވެ. މިއީ މޫސުމަށް އަންނަ ބަދަލުތަކާ ގުޅޭ ގޮތުން ބައިނަލްއަޤްވާމީ ފެންވަރުގައި އަޅަންޖެހޭ ފިޔަވަޅުތައް އެޅުމަށާއި، އެކަމާ ގުޅޭ މަޢުލޫމާތު ހާމަކުރުމަށް ދިވެހިރާއްޖެއިން ދޭ އަހައްމިއްޔަތުކަން ފާހަގަކޮށް ދެވުނު ޝަރަފެކެވެ.

މި ރިޕޯޓު ހުށަހެޅުމަކީ ދިވެހިރާއްޖެއިން މޫސުމަށް އަންނަ ބަދަލުތަކާ ގުޅޭ ގޮތުން ކުރަމުންދާ މަސައްކަތްތަކުގެ މުހިންމު ސަފްހާއެއް ކަމުގައި ސަރުކާރުން ބުނެ އެވެ. އަދި މި ރިޕޯޓުން ރާއްޖެއަކީ މޫސުމަށް އަންނަ ބަދަލުތަކާ ގުޅޭ ގޮތުން އަޅަންޖެހޭ ފިޔަވަޅުތައް އެޅުމުގައި އިސްނަގައިގެން މަސައްކަތްކުރާ ގައުމެއްކަން ދައްކުވައިދޭ ކަމަށްވެސް ބުނެއެވެ.

މި ރިޕޯޓު ތައްޔާރުކޮށްފައިވަނީ މޫސުމަށް އަންނަ ބަދަލުތަކާބެހޭ ޑިޕާޓްމަންޓުގެ އިސްނެގުމުގެ ދަށުން، ސަރުކާރުގެ އެކި މިނިސްޓްރީތަކާއި، އަމިއްލަ ވިޔަފާރިތަކާއި، އަމިއްލަ ޖަމްޢިއްޔާތަކާއި އަދި ބައިނަލްއަޤްވާމީ ބައިވެރިންނާ މަޝްވަރާކުރެވިގެންނެވެ. މި ހުރިހާ ފަރާތްތަކުގެ އެހީތެރިކަމާއެކު، 2024 ވަނަ އަހަރުގެ ޑިސެންބަރު 31 ގެ ސުންގަޑިއަށްވުރެ ކުރިން މި ރިޕޯޓު ހުށަހެޅުމަށް ވަނީ ކާމިޔާބުވެފައެވެ.

”އަޅުގަނޑުމެންގެ ފުރަތަމަ ބީޓީއާރު ހުށަހެޅުމަކީ މޫސުމަށް އަންނަ ބަދަލުތަކާ ގުޅޭގޮތުން އަޅުގަނޑުމެން ކުރަމުންދާ މަސައްކަތުގައި ވަރަށް މުހިންމު މަރުހަލާއެއް. މިއީ މޫސުމަށް އަންނަ ބަދަލުތަކާ ކުރިމަތިލުމުގައި ހާމަކަން ބޮޑު އަދި ޒިންމާދާރު ގޮތެއްގައި މަސައްކަތްކުރުމަށް އަޅުގަނޑުމެން ދޭ އަހައްމިއްޔަތުކަން ދައްކުވައިދޭ ކަމެއް. މި ކާމިޔާބީ ހޯދުމުގައި އެހީތެރިވެދެއްވި އެންމެހާ ފަރާތްތަކަށް އަޅުގަނޑު ވަރަށް ބޮޑަށް ޝުކުރު ދަންނަވަން.“ މޫސުމީބަދަލުތަކާއި ތިމާވެއްޓާ ހަކަތައާއި ބެހޭ ވުޒާރާގެ މިނިސްޓަރު ޠާރިޤު އިބްރާހީމް ވިދާޅުވި އެވެ.

ރާއްޖޭގެ ފުރަތަމަ ބީޓީއާރު އެކުލަވާލުމަށް ފައިސާގެ އެހީތެރިކަން ފޯރުކޮށްދީފައިވަނީ ގްލޯބަލް އެންވަޔަރަންމަންޓް ފެސިލިޓީ (ޖީއީއެފް) އިންނެވެ. މިއީ ”މޫސުމަށް އަންނަ ބަދަލުތަކާބެހޭ އދ. ގެ އޮނިގަނޑަށް ފުރަތަމަ ބައިއެނުއަލް ޓްރާންސްޕޭރަންސީ ރިޕޯޓު ތައްޔާރުކުރުން (މޯލްޑިވްސް ބީޓީއާރު 1 ޕްރޮޖެކްޓް)“ ގެ ދަށުން ކުރެވުނު މަސައްކަތެކެވެ. މީގެ އިތުރުން، އދ. ގެ ފަރާތުންވެސް މި މަސައްކަތަށް އެހީތެރިކަން ލިބިފައި ވެއެވެ.

މި ރިޕޯޓު ތައްޔާރުކޮށްފައިވަނީ މޫސުމަށް އަންނަ ބަދަލުތަކާބެހޭ ޑިޕާޓްމަންޓުގެ އިސްނެގުމުގެ ދަށުން، ސަރުކާރުގެ އެކި މިނިސްޓްރީތަކާއި، އަމިއްލަ ވިޔަފާރިތަކާއި، އަމިއްލަ ޖަމްޢިއްޔާތަކާއި އަދި ބައިނަލްއަޤްވާމީ ބައިވެރިންނާ މަޝްވަރާކުރެވިގެން ނެވެ. މި ހުރިހާ ފަރާތްތަކުގެ އެހީތެރިކަމާއެކު، 2024 ވަނަ އަހަރުގެ ޑިސެންބަރު 31 ގެ ސުންގަޑިއަށްވުރެ ކުރިން މި ރިޕޯޓު ހުށަހެޅުމަށް ވަނީ ކާމިޔާބުވެފަ އެވެ.

މި ރިޕޯޓު ހުށަހެޅުމަކީ މޫސުމަށް އަންނަ ބަދަލުތަކާ ގުޅޭގޮތުން ދިވެހިރާއްޖެއިން ކުރަމުންދާ މަސައްކަތްތަކުގެ ހާމަކަން އިތުރުކޮށް، ބައިނަލްއަޤްވާމީ މުޖުތަމަޢުގައި ދިވެހިރާއްޖޭގެ އިތުބާރު އިތުރުކުރުމަށް މަގުފަހިވެގެންދާނެ ކަމެކެވެ. މީގެ އިތުރުން، މި ރިޕޯޓުގެ ސަބަބުން ދިވެހިރާއްޖެއަށް މޫސުމަށް އަންނަ ބަދަލުތަކާ ގުޅޭގޮތުން ލިބެންޖެހޭ އެހީތެރިކަމާއި އެއްބާރުލުން ހޯދުމަށްވެސް ފަސޭހަވެގެންދާނެ އެވެ.

މި ރިޕޯޓުގައި ހިމެނިފައިވާ މައުލޫމާތުތަކުގެ ތެރޭގައި ރާއްޖޭގެ ގްރީންހައުސް ގޭސް އިންވެންޓަރީ، މޫސުމަށް އަންނަ ބަދަލުތަކާ ގުޅޭގޮތުން އެޅިފައިވާ ފިޔަވަޅުތަކާއި އޭގެ ނަތީޖާތައް، އަދި ކުރިމަގުގައި އަޅަން ރާވާފައިވާ ފިޔަވަޅުތައް ހިމެނެއެވެ. މީގެ އިތުރުން، މޫސުމަށް އަންނަ ބަދަލުތަކާ ގުޅޭގޮތުން ދިވެހިރާއްޖެއަށް ބޭނުންވާ އެހީތެރިކަމާއި ވަސީލަތްތަކުގެ މަޢުލޫމާތުވެސް މި ރިޕޯޓުގައި ހިމަނާފައި ވެއެވެ. އަދި މިކަމުގެ ސަބަބުން ކުރިމަގުގައި މޫސުމަށް އަންނަ ބަދަލުތަކާ ގުޅޭގޮތުން ދިވެހިރާއްޖެއަށް ލިބޭ އެހީތެރިކަން އިތުރުވެގެންދާނެ ކަމަށް އުންމީދުކުރެވޭ ކަމުގައި ތިމާވެށްޓާއި ބެހޭ ވުޒާރާއިން ބުންޏެވެ.

ކޮޕް29 މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ