ޒަމާނީ ތަފާތު ހަރަކާތްތަކާއިއެކު ލައިބްރެރީގެ ހިދުމަތް މުޅި އަތޮޅުތެރެއަށް ފުޅާކުރުމުގެ މަސައްކަތް ކުރުމަށް ކެބިނެޓަށް ހުށަހަޅާފައިވާ ކަމަށް ޔޫތް މިނިސްޓަރ އިބްރާހީމް ވަހީދު ވިދާޅުވެއްޖެ އެވެ.

މިނިސްޓަރ މިފަދައިން ވިދާޅުވީ ސަރުކާރުން ފާއިތުވީ އެއް އަހަރުގައި ކުރި މަސައްކަތްތަކުގެ މައުލޫމާތު ހިއްސާ ކުރުމަށް ”ޖަވިޔަނި“ އަށް ދެއްވި ހާއްސަ އިންޓަވިއުއެއްގަ އެވެ.

މި އިންޓަވިއުގައި ވާހަކަދައްކަވަމުން މިނިސްޓަރ ވިދާޅުވީ ޒަމާނަށް ފެތޭގޮތަށް، ލައިބްރެރީގައި އެންމެ މުހިންމުކަން ދިނީ ޒުވާނުން ޝައުގުވެރިވާ ގޮތަށް ލައިބްރެރީގެ ނިޒާމް ބަދަލުކުރުމަށް ކަމަށެވެ. ލައިބްރެރީގައި އިންޓާންޝިޕަށް ދިން ތަރުހީބު ފެނިވަޑައިގެން މިނިސްޓަރ އަމިއްލަފުޅަށް ހައިރާންވެވަޑައިގަތް ކަމަށް ވިދާޅުވި އެވެ. މިނިސްޓަރ ވިދާޅުވިގޮތުގައި އުމުރުން 18 އަހަރުގެ ކުދިން ހިމެނޭހެން ތަފާތު އުމުރުގެ ޒުވާނުން ލައިބްރެރީގައި އިންޓާނުން ގޮތަށް މަސައްކަތްކޮށްގެން ލައިބްރެރީ ހިދުމަތް އިތުރަށް ފުރިހަމަކޮށްދޭ ހިޔާލުތައް ހުށަހެޅިކަމަށެވެ. އެކުދިންގެ މަސައްކަތުން ލައިބްރެެރީގައި އިންސްޓަގްރާމްއާއި އެހެނިހެން ސޯޝަލް މީޑިއާތައް އެކްޓިވްކޮށް ބޭނުންކުރަން ފެށި ކަމަށް މިނިސްޓަރ ވިދާޅުވި އެވެ. މިނިސްޓަރ ވިދާޅުވީ ލައިބްރެރީ އިންޓާނުން ޒުވާނުންނާއި ގުޅޭ ތަފާތު ޓިކްޓޮކް ފަދަ ޕޯސްޓްތަކުން ޕްރޮމޯޝަންް ތައްޔާރުވެސް ކޮށްފައިވާ ކަމަށެވެ.

އެތަނަކީ ޒުވާނުންނާއި ގުޅޭ މާހައުލަކަށް ހެދުމަށް މަހަކު އެއްފަހަރު ތަފާތު ގޭމްތައްވެސް ރާވާކަން މިނިސްޓަރ ފާހަގަކުރެއްވި އެވެ. ”މާޑާ މިސްޓްރީ ގޭމް“، ”ބްލައިންޑް ޑޭޓް ވިތް އަ ބުކް“ ފަދަ ތަފާތު ހަރަކާތްތައް އެކުދިން ރާވައިގެން ލައިބްރެރީއަކީ މައުލޫމާތު ދިނުމުގެ އިތުރުން ޝައުގުވެރި ތަނަކަށްވެސް ހަދާފައިވާކަން މިނިސްޓަރ މިސާލަކަށް ނެންގެވި އެވެ. އެއާއެކު، މިހާރު ލައިބްރެރީ ހަމައެކަނި އާކައިވްއެއްގެ ގޮތުގައި އޮތް އޮތުން ބަދަލުކުރެވިފައިވާ ކަމަށް މިނިސްޓަރ ވިދާޅުވި އެވެ.

ޒުވާން އިންޓާނުންގެ އިތުރުން ލައިބްރެރީގައި އެތަކެއް އަހަރުތަކެއް ވަންދެން މަސައްކަތް ކުރަމުންދާ މުވައްޒަފުންވެސް އެތަނުން ދޭ ހިދުމަތް ފުރިހަމަކުރުމަށް މަސައްކަތް ކުރަމުންދާ ކަމަށް ވިދާޅުވި އެވެ. ހީވާގި ކަމާއިއެކީ މަސައްކަތް ކުރާ އެ މުވައްޒަފުން މިހާރު ވަނީ ލައިބްރެރީގައި އޯޑިއޯ ބުކް ރިކޯޑިންގެ ހިދުމަތް ފަށާފައި ކަމަށް މިިނިސްޓަރ ވިދާޅުވި އެވެ.

މިނިސްޓަރ ވިދާޅުވީ މާލޭގެ އިތުރުން ރަށްރަށުގެ ލައިބްރެރީތަކުގައިވެސް ފޮތް ތިބުމަކީ މުހިންމު ކަމެއް ކަމަށް މިނިސްޓްރީން ދެކޭ ކަމަށެވެ.

”ރާއްޖޭގެ ރަށްރަށުގެ ސްކޫލް ލައިބްރެރީތަކާއި ކޮމިއުނިޓީ ލައިބްރެެރީތަކުގައި ރަނގަޅު ފޮތްތައް ހުންނަންޖެހޭ. އެހެންވީމާ، އަޅުގަނޑުމެން އެ މަސައްކަތް އެބަ ކުރަން، ކައުންސިލްތަކަށް އެހީތެރިކަން ފޯރުކޮށްދީގެން. މައުލޫމާތަކީ އެންމެންނަށްވެސް ލިބެންޖެހޭނެ އެއްޗެއް. ފޮރުވާފައި ބަހައްޓަން ޖެހޭނެ އެެއްޗެއް ނޫން ކަމަށް އަޅުގަނޑުމެން ގަބޫލުކުރަނީ. ހުރިހާ އެއްޗެއްވެސް ލިބެންޖެހޭ އާންމު ރައްޔިތުންނަށް“

ލައިބްރެރީގައި ދެން އެންމެ މުހިންމު ކަމަކަށް ހިނގާނީ ކޮންކަންތައްތަކެއްތޯ ބަލަން ސޯޝަލް ކައުންސިލަށް ހުށަހަޅާފައިވާ ކަމަށް މިނިސްޓަރ ހާމަކުރެއްވި އެވެ. ލައިބްރެރީ ޒަމާނީ ފެންވަރަށް ތަރައްގީވެފައިވާ ތަނަކަށް ހެއްދެވުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. މި މަޝްރޫއު އަންނަ އަހަރުގައި ފަށާނެ ކަމަށްވެސް މިނިސްޓަރ ހާމަކުރެއްވި އެވެ. އެގޮތުން ’އައިކޯނިކް ބިލްޑިން‘ އަކަށް ނޭޝަނަލް ލައިބްރެރީ މި ސަރުކާރުން ބަދަލުކުރާނެ ކަމަށް މިނިސްޓަރ ވިދާޅުވި އެވެ. ސޯޝަލް ކައުންސިލުން މިކަމާއި ގުޅުންހުރި ކަރުދާސް ފާސްކުރުމުން އެ މަސައްކަތް ވަރަށް އަވަހަށް ފަށާނެ ކަމަށް މިނިސްޓަރ ވިދާޅުވި އެވެ.

މިއާއިއެކު އާބަން ސެންޓަރުގެ 7 ސަރަހައްދުގައި ޒަމާނީ ލައިބްރެރީ ތަރައްގީކުރުމުގެ މަސައްކަތް ސަރުކާރުން ކުރާނެ ކަމަށްވެސް މިނިސްޓަރ ހާމަކުރެއްވި އެވެ.

އާކައިވްގެ ވާހަކަ ދައްކަވަމުން މިނިސްޓަރ ވިދާޅުވީ ރާއްޖޭގެ ހުރިހާ އުފެއްދުންތައް ޑިޖިޓަލްކޮށް އާކައިވްކޮށްގެން ރައްކާ ކުރުމުގެ މަސައްކަތް މި ސަރުކާރުން ފަށާފައިވާ ކަމަށެވެ. އެތަނުން ޝައުގުވެރި އެތައް މައުލޫމާތަކާއި ތާރީހީ މައުލޫމާތުތައް އެންމެންނަށް ލިބޭނެ ގޮތް ހަދާނެ ކަމަށް މިނިސްޓަރ ވިދާޅުވި އެވެ.

”ކޮން ބޭފުޅެއްތޯ ބަލަން ބޭނުމީ ރާއްޖޭގައި އެންމެ ފުރަތަމަ އައިޑީކާޑާއި ޕާސްޕޯޓް ހެއްދެވި ފަރާތަކީ ކޮބާތޯ ބަލަން؟ މި ޕްރޮޖެކްޓް ނިމޭއިރު އާންމުންނަށް މިފަދަ މައުލޫމާތުތަކަށް އެކްސެސް ވެވޭނެ ގޮތް އަޅުގަނޑުމެން ހަދާނަން“

މިނިސްޓްރީ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސް ދިވެހިންގެރާއްޖެ365