5 މިލިއަން ގަސް އިންދުމުގެ ޕްރޮގްރާމުގެ ދަށުން މޯލްޑިވްސް އިސްލާމިކް ބޭންކް (އެމްއައިބީ) އިން ކުޑަގިރީގައި 1000 ގަސް އިންދައިފި އެވެ.
މި ހަރަކާތް ރާވާފައިވަނީ ކްލީން މޯލްޑިވްސް ޖަމިއްޔާއާއި ހައުސިން ޑިވެލޮޕްމެންޓް ކޯޕަރޭޝަން، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ ލިމިޓެޑް، އޭޝިޔާ ފޯވާޑިން، އައިކެއާ އޮޕްޓިކަލްސް، މޯލްޑިވްސް ޕޮލިސް ސާވިސް އަދި ދަ ހޯކްސް ޕްރައިވެޓް ލިމިޓެޑް ކުންފުނިން ޕާޓްނަރުންގެ ގޮތުގައި ބައިވެރިވެގެން ނެވެ.
އެމްއައިބީ އިން ބުނީ މި ހަރަކާތުގައި ގިޔާސުއްދީން ސްކޫލު ދަރިވަރުންނާއި ބެލެނިވެރިންގެ ތެރެއިން ފުދޭވަރެއްގެ ގިނަބަޔަކު ބައިވެރިވެފައިވާ ކަމަށެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މި ދައުރުގެ ތެރޭގައި ފަސް މިލިއަން ގަސް އިންދަވާނެކަމަށް ވެވަޑައިގެންނެވި ވައުދުފުޅާ އެއްގޮތަށް ގަސް އިންދުމުގެ މަޝްރޫއު އިފްތިތާހު ކޮށްދެއްވާފައިވަނީ ޖޫން 5 ގައި ފާހަގަ ކުރި ތިމާވެށީގެ ދުވަހު އެވެ.
ފަސް މިލިއަން ގަސް އިންދުމުގެ މަޝްރޫއު ރައީސް ޑރ. މުހައްމަދު މުއިއްޒު އިއުލާން ކުރައްވާފައިވަނީ ތިމާވެށީގެ ކަންކަމާ ގުޅިގެން ބާއްވާ އެންމެ ބޮޑު ބައްދަލުވުން ކަމަށްވާ ‘ކޮޕް28’ ގައި ތަގުރީރު ކުރައްވަމުންނެވެ. މި މަޝްރޫއަކީ ރާއްޖެ ފެހިކުރުމަށާއި ގަސްތަކުގެ މާހައުލީ ނިޒާމްތައް ރައްކާތެރިކޮށް ދެމެހެއްޓުމާއި އަދި މޫސުމީ ބަދަލުން ދިމާވާ ނުރައްކާތަކަށް ދިވެހިރާއްޖޭގެ ވިލުންތެރިކަން އިތުރުކުރުމަށްޓަކައި ކުރިއަށް ގެންދާ މަޝްރޫއެކެވެ.
ސަރުކާރުގެ 5 އަހަރުގެ ތެރޭގައި 90 އަށް ވުރެ ގިނަ ވައްތަރުގެ ގަސް މި ޕްރޮގްރާމްގެ ދަށުން ރާއްޖޭގެ އެކި ސަރަހައްދުގައި އިންދާނެކަމަށް ތިމާވެއްޓާ ބެހޭ ވުޒާރާއިން ބުނެ އެވެ. އަދި އިންދާ ގަސްތައް މޮނީޓާކޮށް އޭގެ ސިއްހަތު ބަލާ، ކާބަން ނަގާ މިންވަރުވެސް ވަޒަން ކުރާނެކަމަށް ވަނީ ބުނެފަ އެވެ.
މޯލްޑިވްސް އިސްލާމިކް ބޭންކް (އެމްއައިބީ) ފަސް މިލިއަން ގަސް އިންދުން
