ފަސް މިލިއަން ގަސް އިންދުމުގެ ޕްރޮގްރާމްގެ ދަށުން ލ. ގަމުގައި ގަސް އިންދުމަށް ހާއްސަ ދެ ނާސަރީ ހެދުމުގެ މަސައްކަތް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާ ހަވާލުކޮށްފި އެވެ.

އެންވަޔަރްމެންޓް މިނިސްޓްރީން މިއަދު ނެރުނު ބަޔާނެއްގައި ބުނީ މި މަސައްކަތް ކުރިއަށް ގެންދިއުމަށް އެޗްޑީސީއާ އެކު އެމްއޯޔޫއެއްގައި މިހާރު ސޮއިކޮށްފައިވާ ކަމަށެވެ.

މި ދެ ނާސަރީއަކީ، ފަސް މިލިއަން ގަސް އިންދުމުގެ ޕްރޮގްރާމް އެކިކަންކޮޅުތަކުގައި ފުޅާކޮށް، ބާރު ސްޕީޑްގައި ކުރިއަށް ގެންދިއުމަށްޓަކައި ހަދާ ތަންތަނެވެ. މިނިސްޓްރީން ބުނި ގޮތުގައި އެއީ 20,000 އަކަފޫޓުގެ ނާސަރީއަކާއި 100,000 އަކަފޫޓުގެ ނާސަރީއެކެވެ. އެ ނާސަރީ ހަދަން ބޭނުންވާ ބިން ގަމު ކައުންސިލުން މިދިޔަ ފެބްރުއަރީ މަހު ވަނީ ހަމަޖައްސައިދީފަ އެވެ.

ފަސް މިލިއަން ގަސް އިންދުމުގެ ޕްރޮގްރާމާ ހަވާލުވެ ހުންނެވި ޑެޕިއުޓީ މިނިސްޓަރު އަހްމަދު އަތީފް ވަނީ މި 2 ނާސަރީގެ ތެރެއިން ފުރަތަމަ ނާސަރީ މި އަހަރު ނިމުމުގެ ކުރިން ނިންމާ އޮޕަރޭޝަނަށް ގެނެވޭނެކަމަށް އުންމީދު ކުރައްވާކަމަށް ވިދާޅުވެފަ އެވެ. އަދި 2 ވަނަ ނާސަރީ އަންނަ އަހަރުގެ ޖުލައި މަހުގެ ތެރޭގައި ނިންމޭނެކަމަށް ޑެޕިއުޓީ މިނިސްޓަރު އަތީފް ވިދާޅުވި އެވެ.

ފަސް މިލިއަން ގަސް ޕްރޮގްރާމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅެކެވެ. މިއީ މިދިޔަ އަހަރުގެ ތިމާވެށީގެ ދުވަހު ރައީސް އިއުލާން ކުރެއްވި މަޝްރޫއެކެވެ.

ގަމުގައި އަޅާ 2 ނާސަރީގެ އިތުރުން ހުޅުމާލޭގައިވެސް ސަރުކާރުން އަންނަނީ ނާސަރީއެއް ގާއިމު ކުރަމުންނެވެ. ޗައިނާ ސަރުކާރުގެ ހިލޭ އެހީގެ ދަށުން ހުޅުމާލެ ފޭސް 2 ގައި ގާއިމު ކުރާ 55,000 އަކަފޫޓުގެ މި ނާސަރީއަކީ މީޓިން ރޫމަކާއި ލެބޯޓަރީއަކާއި އޮފީސް އަދި ލޭބާ އެކޮމޮޑޭޝަން ހިމެނޭހެން ގާއިމު ކުރާ ނާސަރީ އެކެވެ.

ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓް ފަސް މިލިއަން ގަސް އިންދުން ތިމާވެށި