ދިރާގަށް މި މަހު އާމްދަނީގެ ގޮތުގައި ދެ ބިލިއަން ރުފިޔާ ލިބުނުއިރު ޓެކުހުގެ ގޮތުގައި ދައްކާފަައި ވަނީ 114.2 މިލިއަން ރުފިޔާކަން އެ ކުންފުނީގެ މާލީ ހިސާބުތަކުން ދައްކައިފި އެވެ.
ދިރާގުން އާންމުކޮށްފައިވާ އާމްދަނީގެ ހިސާބުތަކަށް ބަލާއިރު އެ ކުންފުންޏަށް ފާއިތުވި 3 ކުއާޓާގައި އެންމެ ބޮޑު އާމްދަނީއެއް ލިބުނީ މޯބައިލް ހިދުމަތްތަކުންނެވެ. އެގޮތުން، މޯބައިލް ހިދުމަތްތަކުން އާމްދަނީގެ ގޮތުގައި 1 ބިލިއަން ރުފިޔާއަށްވުރެ ބޮޑު އާމްދަނީއެއް ލިބިފައިވެ އެވެ.
ދެވަނައަށް އެންމެ ބޮޑު އާމްދަނީއެއް ދިރާގަށް ލިބިފައިވަނީ އިންޓަނެޓު ހިދުމަތްތަކުންނެވެ. އެގޮތުން ފިކްސްޑް އަދި ބްރޯޑްބޭންޑާއި އެންޓަޕްރައިސް ހިދުމަތްތަކުން އެ ކުންފުންޏަށް 914.5 މިލިއަން ރުފިޔާގެ އާމްދަނީއެއް ލިބުނެވެ. އަދި އެހެނިހެން ހިދުމަތްތަކުން 63.3 މިލިއަން ރުފިޔާގެ އާމްދަނީއެއް ލިބިފައިވެ އެވެ.
ދިރާގުގެ ހިންގުމުގެ ހަރަދުތައް 893 މިލިއަނަށް އަރަ އެވެ. އަދި އެ މުއްދަތުގައި ފައިނޭންސްގެ ހަރަދުތަކަށް ޖުމްލަ 79.1 މިލިއަން ރުފިޔާ ހަރަދުވެފައިވެ އެވެ. ކުންފުނީގެ ހިންގުމުގެ ހަރަދުތަކާއި ފައިނޭންސް ހަރަދުތައް އުނިކުރުމަށްފަހު 814.1 މިލިއަން ރުފިޔާގެ ފައިދާއެއް އެ ކުންފުންޏަށް ލިބުނެވެ.
އެ ކުންފުނީގެ މާލީ ހިސާބުތައް ދައްކާ ގޮތުން ސެޕްޓެންބަރު މަހުގެ ނިޔަލަށް އެ ކުންފުނިން ޓެކުހަށް ހަރަދުކުރީ 114.2 މިލިއަން ރުފިޔާ އެވެ. އެއީ އެ މުއްދަތުގައި ލިބުނު އާމްދަނީގެ އެންމެ 5.4 އިންސައްތަ އެވެ.
