ރާއްޖޭގެ މުވާސަލާތީ ޚިދުމަތް ފޯރުކޮށްދޭ ކުންފުނިތަކުގެ އަތުން އަންނަ އަހަރުން ފެށިގެން އިތުރު ފީއެއް ނެގުމަށް ސަރުކާރުން ނިންމައިފި އެވެ.
މި ނިންމުމަކީ ދައުލަތުގެ އާމްދަނީ އިތުރުކުރުމަށް އަޅާ ފިޔަވަޅުތަކުގެ ތެރެއިން އެއް ފިޔަވަޅެވެ.
އަންނަ އަހަރަށް ލަފާކުރާ ދައުލަތުގެ ބަޖެޓުގައިވާ ގޮތުން، ފިސްކަލް އަދި ދަރަނި މެނޭޖްކުރުމަށްޓަކައި އާމްދަނީ އިތުރުކުރުމަށް މުހިންމު ފިޔަވަޅުތަކެއް އެޅުމަށް ސަރުކާރުން ވަނީ ނިންމާފަ އެވެ. މި ގޮތުން އެޅުމަށް ނިންމާފައިވާ އެއް ފިޔަވަޅަކީ ރާއްޖޭގެ ރޭޑިއޯ ފްރިކުއެންސީ ސްޕެކްޓްރަމް ހަރުދަނާކަމާއެކު ބެލެހެއްޓުމަށްޓަކައި ފްރިކުއެންސީ ސްޕެކްޓްރަމް ޗާޖެއް ނެގުމެވެ.
މި އާ ފީ ތަޢާރަފުކުރުމަށް ހަމަޖެހިފައިވަނީ 2024 ވަނަ އަހަރުގެ ތެރޭގަ އެވެ. މިކަން ތަންފީޒުކުރުމަށްޓަކައި، ކަމާ ގުޅޭ ޤާނޫނުތަކާއި ގަވާއިދުތަކަށް ބަދަލު ގެނައުމަށް ވެސް ވަނީ ނިންމާފަ އެވެ. ނަމަވެސް، މި އާ ފީ ނެގުމުން ދައުލަތަށް ލިބޭނެ ކަމަށް ލަފާކުރެވޭ އާމްދަނީގެ އަދަދެއް މިހާތަނަށް ބަޖެޓުގައި ހިމަނާފައެއް ނުވެ އެވެ.
މި ނިންމުމަކީ ދައުލަތުގެ މާލީ ހާލަތު ރަނގަޅުކުރުމަށް އަޅަމުންދާ ފިޔަވަޅުތަކުގެ ބައެއްކަމަށް ބެލެވެއެވެ. ނަމަވެސް، މި ފީ ނެގުމުގެ ސަބަބުން މުވާސަލާތީ ޚިދުމަތްތަކުގެ އަގަށް އަންނާނެ ބަދަލުތަކާ ގުޅޭގޮތުން އަދި އިތުރު މަޢުލޫމާތެއް ސަރުކާރުން ހާމަކޮށްފައެއް ނުވެ އެވެ. މި ނިންމުމާ ގުޅޭގޮތުން އިތުރު މަޝްވަރާތަކެއް ކުރިއަށް ދާނެކަމަށް ބެލެވެ އެވެ.
އަންނަ އަހަރުން ފެށީގެން ދައުލަތުގެ އާމްދަނީ އިތުރު ކުރުމަށް ސަރުކާރުން ވަނީ ގިނަ ފިޔަވަޅުތަކެއް އަޅާފަ އެވެ. އެގޮތުން ޓީޖީއެސްޓީއާއި ގްރީން ޓެކްސް އާއި އެއާޕޯޓް ޓެކްސްވެސް ވަނީ ބޮޑު ކުރަން ނިންމާފަ އެވެ. މީގެ އިތުރުން ދުންފަތުގެ ބާވަތްތަކުން ނަގާ ޑިއުޓީވެސް ސަރުކާރުން ވަނީ ބޮޑުކޮށްފަ އެވެ. މިއީ ސަރުކާރުގެ އާމްދަނީ އިތުރު ކުރުމަށް އެޅި ފިޔަވަޅެއް ނޫންކަމަށް ސަރުކާރުން ބުނި ނަމަވެސް މީގެ ސަބަބުންވެސް އާމްދަނީ އިތުރު ވެގެންދާނެ އެވެ.
