ރާއްޖޭގެ އެކި ކަންކޮޅުތަކުގައި ހުރި ކުދި އަދި މެދު ފަންތީގެ ވިޔަފާރިތަކަށް އައު ޚިދުމަތްތަކެއް ތަޢާރަފްކުރުމަށް އުރީދޫ މޯލްޑިވްސް އިން ގޫގުލް ކްލައުޑާ އެކު ޕާޓްނަރޝިޕް އެއްބަސްވުމެއްގައި ސޮއިކޮށްފި އެވެ.
މި އެއްބަސްވުމުގެ ދަށުން، ވިޔަފާރިތަކުގެ އުފެއްދުންތެރިކަމާއި ހަރުދަނާކަން އިތުރުކޮށްދޭ ޑިޖިޓަލް ސޮލިއުޝަންތައް ފޯރުކޮށްދިނުމަށް އުރީދޫއިން ކުރަމުންދާ މަސައްކަތް އިތުރަށް ފުޅާވެގެންދާނެ ކަމަށް އެ ކުންފުނިން މަޢުލޫމާތު ދީފައިވެ އެވެ. ގޫގުލް ވޯކްސްޕޭސްގެ ޚިދުމަތްތަކުގެ ތެރޭގައި ޕްރޮފެޝަނަލް އީމެއިލް، ކްލައުޑް ސްޓޯރޭޖް، އަދި އެހެނިހެން ކޮލަބަރޭޓިވް ޓޫލްސްތައް ހިމެނެ އެވެ.
އުރީދޫ މޯލްޑިވްސްގެ ސީއީއޯ ހާލިދު އަލް ހައްމާދީ ވިދާޅުވެފައިވަނީ، ”ގޫގުލް ވޯކްސްޕޭސް ފަދަ ލީޑިން ޓޫލްސްތައް ރާއްޖޭގެ ކަސްޓަމަރުންނަށް ފޯރުކޮށްދީ، ކުންފުނިތަކުގެ މަސައްކަތްތައް ކުރާ ގޮތް ބަދަލުކޮށް، އެފިޝިއެންސީ އިތުރުކޮށް، ކަނެކްޓިވިޓީ ހަރުދަނާ ކުރަމުން ގެންދަނީ“ ކަމަށެވެ.
މި އެއްބަސްވުމުގެ ދަށުން ވިޔަފާރިތަކަށް ލިބިގެންދާނެ މައިގަނޑު ފައިދާތަކުގެ ތެރޭގައި ޕްރޮފެޝަނަލް އީމެއިލް އެޑްރެސްތައް، ރިއަލްޓައިމް ކޮލަބަރޭޝަން ޓޫލްސް، ސެކިއުރިޓީ ކްލައުޑް މެނޭޖްމަންޓް، އަދި ރިމޯޓްކޮށް މަސައްކަތްކުރުމުގެ ވަސީލަތްތައް ހިމެނެ އެވެ. މީގެ އިތުރުން، އުރީދޫ މެދުވެރިކޮށް ލޯކަލް ބިލިންގ އަދި ޓެކްނިކަލް އެހީތެރިކަން ވެސް ލިބިގެންދާނެ އެވެ.
މި އައު އިނީޝިއޭޓިވްގެ ސަބަބުން ރާއްޖޭގެ ވިޔަފާރިތަކަށް ކުރިއަރަމުން އަންނަ ޑިޖިޓަލް އިކޮނޮމީގައި ވާދަވެރިކަމާއެކު ކުރިއަށް ދިއުމަށް މަގުފަހިވެގެންދާނެ ކަމަށް އުރީދޫއިން ފާހަގަކޮށްފައިވެ އެވެ. އަދި މި ޚިދުމަތް ތަޢާރަފްކުރުމާ ގުޅިގެން ވިޔަފާރިތަކަށް ޚާއްސަ ގޫގުލް ވޯކްސްޕޭސް ޕްލޭންތަކެއް ވެސް ލިބެން ހުންނާނެ އެވެ.
