ރާއްޖޭގައި މިހާރު ކުރިއަށްދާ ހަތްވަނަ ކެރަމް ވޯލްޑް ކަޕްގައި ވާދަކުރި ރާއްޖޭގެ އަންހެން ޓީމު، ޓީމު އިވެންޓްގެ ފައިނަލުގައި ވާދަކޮށް ދެ ވަނަ ހޯދައި، ރިހި މެޑަލް ކާމިޔާބުކޮށްފި އެވެ.
މި ކާމިޔާބީއަކީ މިފަހަރުގެ މުބާރާތުގައި ރާއްޖެއަށް ލިބުނު ފާހަގަކޮށްލެވޭ ކާމިޔާބީއެކެވެ. އަދި މިއީ ރާއްޖޭގެ ކެރަމް ތާރީހުގައިވެސް ލިބުނު އެންމެ ބޮޑު އެއް ކާމިޔާބީ އެވެ. ރާއްޖޭގެ އަންހެން ޓީމުގައި ހިމެނެނީ އައިމިނަތު ވިދާދް، އައިޝަތު ނަހުފާ، ފާތިމަތު ރަޔާނާ، އައިޝަތު ފައިނާޒް އަދި އާމިނަތު ވިޝާމާ އެވެ.
ފައިނަލް މެޗުގައި ރާއްޖޭގެ އަންހެން ޓީމު އިއްޔެ އިންޑިއާ އަތުން ބަލިވީ އެއްވެސް ގޭމެއް ނުލިބި ސީދާ ތިން ގޭމުންނެވެ. ފުރަތަމަ ޑަބަލްސް މެޗަށް ބަލާއިރު، އައިޝަތު ނަހުފާ އާއި ފާތިމަތު ރަޔާނާގެ ޕެއާ ވަނީ މިތްރާ އާއި ކާޖަލް ކުމާރީގެ ޕެއާ އަތުން 2-1 ސެޓުން ބަލިވެފަ އެވެ.
ސިންގަލްސްގެ ފުރަތަމަ މެޗުގައި އިންޑިއާގެ ހާޒިމާ މޮޅުވީ ދިވެހިރާއްޖޭގެ އާމިނަތު ވިދާދާ އާ ވާދަކޮށް ސީދާ ދެ ސެޓުންނެވެ. މީގެ އިތުރުން، އައިޝަތު ފައިނާޒް އަތުން ކީރްތަނާ ވެސް މޮޅުވީ ސީދާ ދެ ސެޓުންނެވެ، އެއީ ރާއްޖޭގެ ޓީމަށް ލިބުނު ބަލިވުމެކެވެ.
މި މުބާރާތުގެ ފިރިހެނުންގެ ޓީމް އިވެންޓްގައި ވެސް ރާއްޖެ ވާދަކުރިއިރު، ތިންވަނަ ހޮވާ މެޗުން ބަންގްލަދޭޝް އަތުން ރާއްޖެ ވަނީ ބަލިވެފަ އެވެ. ފިރިހެނުންގެ ޓީމް އިވެންޓުގެ ގްރޫޕް ސްޓޭޖުގެ ހުރިހާ މެޗެއް ރާއްޖޭގެ ފިރިހެން ޓީމުން ކާމިޔާބުކޮށްފައިވާއިރު، ތިންވަނަ ހޮވުމަށް ކުޅުނު މެޗުގައި ވާދަވެރި ކުޅުމެއް ފެނިގެންދިޔަ އެވެ.
ޑަބަލްސް މެޗުގައި ރާއްޖޭގެ އާދަމް އަދީލް އާއި އިސްމާއިލް އަޒްމީންގެ ޕެއާ ވަނީ ބަންގްލަދޭޝްގެ ޓީމަކާ ވާދަކޮށް ސީދާ ދެ ސެޓުން ބަލިވެފަ އެވެ. ނަމަވެސް، ސިންގަލްސް އިވެންޓުގައި ރާއްޖޭގެ ހަސަން ނާޒިމް ވަނީ ބަންގްލަދޭޝްގެ ކުޅުންތެރިޔާ ހެމްއަތު މޮއްލާ އަތުން ސީދާ ދެ ސެޓުން މޮޅުވެ، ރާއްޖެއަށް މޮޅެއް ހޯދާދީފަ އެވެ.
އެންމެ ވާދަވެރިކޮށް ދިޔައީ ސިންގަލްސް ދެވަނަ މެޗެވެ. ތިން ސެޓަށް ދިގުދެމިގެންދިޔަ މި މެޗުގައި ރާއްޖޭގެ އިބްރާހިމް ހުޖާން އަލީ އަތުން ބަންގްލަދޭޝްގެ ހަފީޒުއްރަހުމާން މޮޅުވީ 2-1 ސެޓުންނެވެ. މި މެޗުގެ ފުރަތަމަ ސެޓު ހަފީޒުއްރަހުމާން ކާމިޔާބުކުރީ 20-19 ޕޮއިންޓުންނެވެ. ނަމަވެސް، ދެވަނަ ސެޓު ވަރަށް ފޯރިގަދަކޮށް 24-23 ޕޮއިންޓުން ހުޖާން ކާމިޔާބުކުރިއެ ވެ. ނަތީޖާ ކަނޑައެޅުމަށް ކުޅުނު ތިންވަނަ ސެޓުގައި، ވަރުގަދަ ވާދަވެރިކަމަށްފަހު ހަފީޒުއްރަހުމާން 18-13 ޕޮއިންޓުން މޮޅުވި އެވެ.
މި މުބާރާތުގެ ފިރިހެނުންގެ ޓީމް އިވެންޓްގެ ޗެމްޕިއަންކަން ހޯދީ ފައިނަލްގައި ސްރީ ލަންކާ ބަލިކޮށް އިންޑިއާއިންނެވެ.
ބާސެލޯ ނަސަންދުރާގައި ބާއްވާ މި ފަހަރުގެ ކެރަމް ވޯލްޑް ކަޕްގައި މުޅި ދުނިޔޭގެ އެކި ބައްރުތަކުން 17 އަށް ވުރެ ގިނަ ޤައުމުން ގާތްގަނޑަކަށް 150 އަށްވުރެ ގިނަ އެތުލީޓުން ވާދަކުރެ އެވެ. ކެރަމް ވޯލްޑް ކަޕްގެ ތާރީޚުގައި ބާއްވާ ހަތްވަނަ މުބާރާތް ނިމިގެންދާއިރު، މިދިޔަ އަހަރު އެމެރިކާގައި ބޭއްވުނު ހަވަނަ ވޯލްޑް ކަޕްގައި، ދިވެހިރާއްޖޭގެ ޓީމުތަކުން ވަނީ ފިރިހެން އަދި އަންހެން ޓީމު އިވެންޓުން ވެސް ބްރޯންޒް މެޑެލް ހޯދާފަ އެވެ. އެހެންކަމުން، އަންހެން ޓީމުގެ މިފަހަރުގެ ރިހި މެޑަލަކީ ރާއްޖޭގެ ކެރަމް ކުޅުންތެރިންގެ ފެންވަރު ރަނގަޅުވަމުންދާކަން ހާމަކޮށްދޭ ކާމިޔާބީއެކެވެ.
