ޔުއެފާ ނޭޝަންސް ލީގުގައި ރޭ ޕޯޗުގަލް ކައިރިން 1-1 ގެ ނަތީޖާއަކުން އެއްވަރުކޮށް، ކްރޮއޭޝިއާ ކުއާޓާ ފައިނަލަށް ދަތުރުކޮށްފިއެވެ.
މެޗަށް ނިކުތްއިރުވެސް ޕޯޗުގަލްއަށް ވަނީ ގުރޫޕުގެ އެއްވަނަ ކަށަވަރުވެފައެވެ. މިއާއެކު، އެ ޓީމުން ވަނީ ކްރިސްޓިއާނޯ ރޮނާލްޑޯ ހިމެނޭހެން ގިނަ ކުޅުންތެރިންތަކަކަށް ރެސްޓް ދީފައެވެ.
މެޗު ފެށިގެން 33 ވަނަ މިނެޓުގައި ޗެލްސީގެ ޖޮއާއޯ ފެލިކްސް ވަނީ ލަނޑެއް ޖަހައި، ޕޯޗުގަލްއަށް ކުރިހޯދަދީފައެވެ. އޭނާ ލަނޑު ޖަހާފައިވަނީ ވިޓީނިއާ ތަނަވަސްކޮށްދިން ރަނގަޅު ފުރުސަތަކުންނެވެ. މިއާއެކު އެ ޓީމުން ފުރަތަމަ ހާފު ނިންމާލީ އެއް ލަނޑުގެ ފަރަގަކާއެކުއެވެ.
ކްރޮއޭޝިއާ ކުއާޓާއަށް ދިއުމަށް މި މެޗުން ޕޮއިންޓެއް ބޭނުންވެއެވެ. އެ ޓީމުން ވަނީ ނަތީޖާ ހަމަހަމަ ކުރުމަށް ގިނަ މަސައްކަތްތަކެއް ކޮށްފައެވެ. އެގޮތުން، އަންޑްރެޖް ކްރެމަރިޗް ޖެހި ބޯޅައެއް ވަނީ ދަނޑިއަށް އަމާޒުވެފައެވެ.
ކްރޮއޭޝިއާއިން ނަތީޖާ ހަމަހަމަ ކުރުމަށް ކުރި މަސައްކަތް ކާމިޔާބުވީ މެޗުގެ 65 ވަނަ މިނެޓުގައެވެ. ކްރިސްޓިއަން ޖަކިޗް ނަގައިދިން ހުރަހަކުން، އެ ޓީމަށް ލަނޑު ޖަހައިދިނީ މެންޗެސްޓާ ސިޓީގެ ޑިފެންޑަރު، ޖޮސްކޯ ގްވާޑިއޮލްއެވެ.
ކްރޮއޭޝިއާއަށް ވަނީ ލީޑު ނެގުމަށްވެސް ރަނުގެ ފުރުސަތެއް ލިބިފައެވެ. ކްރެމަރިޗަށް ލިބުނު ފުރުސަތުގައި އޭނާ ފޮނުވާލި ބޯޅަ، ޕޯޗުގަލްގެ ކީޕަރު ޖޯސޭ ސާ ވަނީ ދިފާއުކޮށްފައެވެ.
މި ގުރޫޕުގެ ތިންވަނަ ލިބުނީ ސްކޮޓްލޭންޑަށެވެ. އެ ޓީމުން ވަނީ 2-1 ގެ ނަތީޖާއަކުން ޕޮލެންޑް ބަލިކޮށްފައެވެ.
