އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫ ހައްޔަރުކުރުމަށް ބައިނަލްއަގްވާމީ ކޯޓް، އައިސީސީ އިން ހައްޔަރު ކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަރުހަބާ ވިދާޅުވެއްޖެ އެވެ.
ރައީސް، އައިސީސީގެ ނިންމުމަށް މަރުހަބާ ވިދާޅުވީ ރޭ އެކްސްގައި ކުރެއްވި ޕޯސްޓެއްގަ އެވެ.
ފަލަސްތީނުގެ ދައުލަތުގެ ހާލަތާއި ގުޅިގެން އައިސީސީން އިއްުޔެ ނިންމި ނިންމުމަށް ރާއްޖެ އިން މަރުހަބާ ކިޔާ ކަމަށް ވިދާޅުވެފައި ވެއެވެ. މިއީ ހަނގުރާމައިގެ ޖަރީމާތަކާއި އިންސާނިއްޔަތާ ދެކޮޅަށް ހިންގާ ޖަރީމާތަކުގެ ޖަވާބުދާރީވުން ކަށަވަރުކުރުމަށް އެޅޭ ވަރަށް މުހިންމު ފިޔަވަޅެއްގެ ގޮތުގައި ރައީސް ސިފަކުރައްވާފައި ވެއެވެ.
އެއާއެކު، ރާއްޖެ އިން އައިސީސީގެ ނިންމުންތަކަށް އިހުތިރާމްކޮށް، ކޯޓުގެ ހުކުމްތަކަށް އިހުތިރާމްކޮށް ތަންފީޒުކުރުމުގެ މުހިންމުކަން ފާހަގަކުރާ ކަމަށް ރައީސްގެ ޓްވީޓްގައި ވެއެވެ. އަދި ބައިނަލްއަގްވާމީ ގާނޫނުތައް ނަގަހައްޓައި، ފަލަސްތީނުގެ ރައްޔިތުންނަށް އިންސާފު ހޯދައިދިނުމަކީ، އެ ސަރަހައްދުގައި އަމާންކަން އަލުން އާލާކުރުމަށް ކޮންމެހެން ބޭނުންތެރި ކަމެއް ކަމަށްވެސް ޓްވީޓްގައި ވެއެވެ.
ނަތަންޔާހޫގެ އިތުރުން އިޒްރޭލުގެ ކުރީގެ ޑިފެންސް މިނިސްޓަރު ޔޯއަވް ގަލަންޓް އަދި ހަމާސްގެ ލީޑަރު މުހައްމަދު ދެއިފް (އަލް މަސްރީ) ހައްޔަރުކުރުމަށް އައިސީސީ އިން އަމުުރު ނެރެފައި ވެއެވެ.
އަލްޖަޒީރާ އިން ރިޕޯޓުކުރި ގޮތުގައި، މި ތިން މީހުން ހައްޔަރުކުރުމަށް އައިސީސީން އަމުރު ނެރުނީ ގައްޒާގައި ނިމިދިޔަ އަހަރުގެ ފަހުކޮޅުން ފެށިގެން ހިންގި ހަނގުރާމައިގެ ޖަރީމާތަކުގެ ސަބަބުން ނެވެ. . އައިސީސީން ބުނި ގޮތުގައި މި ޖަރީމާތަކުގެ ތެރޭގައި “ގައްޒާގައި ކުރާ ހަނގުރާމައިގައި ބަނޑުހައިހޫނުކަމާއި އިންސާނިއްޔަތާ ދެކޮޅަށް ހިންގާ ޖަރީމާތައް ކަމަށްވާ މީހުން މަރާލުމާއި ގޯނާކުރުމާއި އެހެނިހެން ލާއިންސާނީ އަމަލުތައް” ހިމެނެ އެވެ.
ހަމާސްގެ ލީޑަރު މުހައްމަދު ދެއިފް ހައްޔަރުކުރުމަށް އަމުރު ނެރުނީ 2023 ވަނަ އަހަރުގެ އޮކްޓޯބަރު 7 ވަނަ ދުވަހު އިޒްރޭލަށް ދިން ހަމަލާއާ ގުޅިގެންނެވެ. ދެއިފްއަކީ މި ހަމަލާގެ ފަހަތުގައިވާ އެއް މޭސްތިރިއެވެ. މި ހަމަލާއަށްފަހު އިޒްރޭލުން ވަނީ ހަމަ އެދުވަހު ގައްޒާގައި ހަނގުރާމަ ފަށާފަ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބެންޖެމިން ނަތަންޔާހޫ އިޒްރޭލް
