މިދިޔަ 5 އަހަރު ނިމިގެން ދިޔައިރު ތަރައްޤީގެ އެއްވެސް މަޝްރޫޢެއް އެއްވެސް ރަށެއްގައި ހިނގާފައި ނެތް ކަމަށް މަޖިލީހުގެ ވިލިމާލެ ދާއިރާގެ މެންބަރު މުޙައްމަދު އިސްމާއިލް ވިދާޅުވެއްޖެ އެވެ.
މެމްބަރު އިސްމާއިލް މިހެން ވިދާޅުވީ، އަންނަ އަހަރަށް ލަފާކުރާ ދައުލަތުގެ ބަޖެޓަށް ބަހުސްކުރަމުން ނެވެ.
”އެހެންނަމަވެސް ކޮންމެވެސް ވަރެއްގެ މަރާމާތުތަކެއް، ބަނދަރެއް މަރާމާތުކުރުން، ސްކޫލެއް މަރާމާތުކުރުން މިކަހަލަ ކަންތައްތަކެއް ނުހިނގާ ވާހަކައެއް ނޫން މި ދަންނަވަނީ،“ އިސްމާއިލް ވިދާޅުވި އެވެ.
އިސްމާއިލް ވިދާޅުވީ ގޮތުގައި ނިމުނު މަޖިލީހުން، މި އަހަރަށް ފާސްކޮށްފައި އޮތް ބަޖެޓަކީ މި ސަރުކާރު ބަނގުރޫޓުކޮށްލަން ހަދާފަ ދިޔަ ބަޖެޓެކެވެ. އެގޮތުން މި އަހަރަށް ފާސްކޮށްފައި އޮތް ބަޖެޓަކީ، އެމްޑީޕީގެ ސަރުކާރުން ހުށަހަޅައި، އެމްޑީޕީގެ ސުޕަރމެޖޯރިޓީ އޮތް މަޖިލީހަކުން ފާސްކުރި ބަޖެޓެއްކަން މެމްބަރު ފާހަގަކުރެއްވި އެވެ.
އޭގެއިތުރުން މުހައްމަދު އިސްމާއިލް ވިދާޅުވީ ސަރުކާރުން ހުށަހެޅި 2025 ވަނަ އަހަރުގެ ބަޖެޓާ ބެހޭ ގޮތުން އިދިކޮޅު ފަރާތްތަކުން ވާހަކަތައް ދައްކަމުންދާއިރު ރައްޔިތުންނަށް އޮޅޭގޮތަށް ވަރަށް ގިނަ ވާހަކަތަކެއް ދައްކަމުންދާ ކަމަށެވެ.
”އަޅުގަނޑަކީވެސް ވިލިމާލެއަށް ނިސްބަތްވާ މެންބަރަކަށް ވީތީވެ ވިލިމާލޭގެ ތަރައްޤީއަށްވެސް ވަރަށް ބޮޑެތި އަދަދުތަކެއް ބަޖެޓުގައި އެބަހުރި،“ އިސްމާއިލް ވިދާޅުވި އެވެ.
އިސްމާއިލް ވިދާޅުވީ، ޤަބޫލުކުރަންޖެހޭ ޙަޤީޤަތަކީ މިހާރުގެ ރައީސް ޑރ. މުޙައްމަދު މުޢިއްޒު ވެރިކަމާ ޙަވާލުވިއިރު ޤައުމު އޮތް ޙާލަތު ވަރަށް ބޮޑަށް ވިސްނާލަން ޖެހޭ ކަމަށެވެ. އަދި ޤައުމު ދަރަނިވެފައި އޮތް ޙާލަތުވެސް ވިސްނާލަންޖެހޭ ކަމަށެވެ.
ރައީސް ޑރ. މުޙައްމަދު މުޢިއްޒު އެ ގެންދަވަނީ ހަރުދަނާ ސިޔާސަތުތަކެއް ކަނޑައަޅައި ދައުލަތް ދަރާފައި އޮތް ނިސްބަތް ކުޑަކޮށް އާމްދަނީ އިތުރުކޮށް ރައްޔިތުންނަށް ފައިދާހުރި މަސައްކަތްތަކެއް ކޮށްދިނުމުގެ މާތް މަޤްޞަދުގައި ކަމަށްވެސް އިސްމާޢީލް ވިދާޅުވި އެވެ.
ރައްޔިތުންގެ މަޖިލިސް މުހައްމަދު އިސްމާއިލް ދައުލަތުގެ ބަޖެޓް
