ރައީސް ޑރ. މުޙައްމަދު މުޢިއްޒު، ސަރުކާރަށް 1 އަހަރު ފުރުމާ ގުޅިގެން ރޭ ބޭއްވެވި ޖަލްސާގައި ދެއްކެވި ވާހަކަފުޅަކީ ދިވެހިރާއްޖޭގެ ރައީސަކު ޤައުމުގެ ހާލަތު އެންމެ ސާފުކޮށް ރައްޔިތުންނަށް ހާމަކޮށްދެއްވި ޚިޠާބު ކަމަށް މާލެ ސިޓީ ކައުންސިލްގެ ޑެޕިއުޓީ މޭޔަރ އަހުމަދު ނަރީޝް ވިދާޅުވެއްޖެ އެވެ.
އެކްސް ގައި ކުރެއްވި ޕޯސްޓެއްގައި ނަރީޝް ވިދާޅުވެފައިވަނީ، ގިނަ ރައީސުންނާއި ސިޔާސީ ވެރިންނަށް އެންމެ ކެރިވަޑައިނުގަންނަވާ ކަމަކީ ވެރިކަން ނުވަތަ ތާއީދު ގެއްލިދާނެތީ ޤައުމުގެ ހަޤީޤީ ހާލަތު ރައްޔިތުންނަށް ހާމަކުރުން ކަމަށެވެ. ނަމަވެސް ރޭގެ ޖަލްސާގައި ފެނިގެންދިޔައީ ރައްޔިތުން އިންތިޚާބުކުރެއްވި ވެރިޔަކު ރައްޔިތުންގެ ފަޅީގައި ހުންނަވައިގެން ހަޤީޤަތް ސާފުކޮށްދެއްވަމުން ގެންދެވި މަންޒަރު ކަމަށް އޭނާ ފާހަގަކުރެއްވި އެވެ.
ނަރީޝް އިތުރަށް ވިދާޅުވެފައިވަނީ ރައްޔިތުން މި ކަން އުފަލާއި ހިނިތުންވުމާއެކު ބަލައިގަތް ކަމަށެވެ. އަދި މިއަދު ދިވެހިންގެ ރައީސެއް ހަޤީޤީ މާނައިގައި ހުރިކަމުގެ އިހްސާސް ޤައުމުގައި ކުރެވޭ ކަމަށް އޭނާ ފާހަގަކުރެއްވި އެވެ.
ރޭގެ ޖަލްސާގައި ވާހަކަފުޅުދައްކަވަމުން ރައީސް ޑރ. މުއިއްޒު ވިދާޅުވީ މި ސަރުކާރު ކުރިއަށްދާނީ ރައްޔިތުންގެ ޚިޔާލާ މަޝްވަރާއާ އެއްކޮށްކަމަށާއި، މި ސަރުކާރު އޮންނާނީ 100 އިންސައްތަ ރައްޔިތުންގެ ފަޅީގައި ކަމަށެވެ. މިެގޮތުން ޒުވާނުންގެ މަޒުކަޒުގެ ހޯލްގައި ކުރިއަށްދިޔަ މި ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ ޑޮލަރުގެ މައްސަލައަށް މި ސަރުކާރުން ގެންނަން ބޭނުންވާ ޙައްލުގެ ތަފުޞީލު ބަޔާންކޮށްދެއްވާ ފައެވެ. އެގޮތުން މިހާރު ފަތުރުވެރިކަމުގެ ސެކްޓަރއިން ލިބޭ އާމްދަނީއިން ބޭންކުތަކަށް މާރުކުރަމުންދަނީ ޖުމްލަކޮށް، 1.5 އިންސައްތަކަމުގައި އެމަނިކުފާނު ވިދާޅުވި އެވެ. އަދި މިކަމަށް ޙައްލު ހޯދުމަށް، އެމް.އެމް.އޭއިން ޤަވާއިދު ބަދަލުކޮށް، މިހާރު ހަދާފައިވާ ޤަވާއިދުގެ ތެރެއިން އަމަލުކުރަމުންދާނަމަ އަންނަ ޖަނަވަރީ މަހުން ފެށިގެން ފަތުރުވެރިކަމުގެ ދާއިރާއިން ލިބޭ ޑޮލަރުގެ 20 އިންސައްތަ ބޭންކުތަކަށް މާރުކުރާނެކަމަށް ބެލެވޭކަމުގައި އެމަނިކުފާނު ވިދާޅުވި އެވެ. އަދި މިހާރު ކުރާ މަސައްކަތުގެ ނަތީޖާއެއްގެ ގޮތުން ސަރުކާރުގެ ކުންފުނިތަކަށް ބޭނުންވާ ޑޮލަރު ބޭންކް ރޭޓުން ލިބުމަށް މަގުފަހިވާނެކަމުގައި އެމަނިކުފާނު ވިދާޅުވި އެވެ.
ހަމަ އެއާއެކު 2026 ވަނަ އަހަރުގެ ފުރަތަމަ ކުއާޓަރ ތެރޭގައި، ރާއްޖެއިން ބޭރަށް ފުރާ ދިވެހި ރައްޔިތުންނަށް 1000 ޑޮލަރު ބޭންކް ރޭޓުގައި ގަތުމަށް ފުރުޞަތު ދިނުމަށް މަގުފަހިވެގެންދާނެކަމުގައި އެމަނިކުފާނު ވިދާޅުވިއެވެ. މީގެ އިތުރުންވެސް ކްރެޑިޓް ކާޑުގެ ލިމިޓްވެސް 1400 ޑޮލަރާ ހަމައަށް ބޮޑުކޮށްދެއްވާނެކަމުގައި އެމަނިކުފާނު ވިދާޅުވި އެވެ. އަދި ދިވެހި ވިޔަފާރިވެރިންނަށް ތަކެތި އިމްޕޯޓުކުރުމުގައި ބޭންކުތަކުން ޓީޓީ ހެދުމަށް ދޫކުރާ ޑޮލަރުގެ ނިސްބަތްވެސް ޖުލައިމަހުން ފެށިގެން އިތުރުކުރުމަށް ނިންމަވާފައިވާކަން އެމަނިކުފާނު ހާމަކުރެއްވި އެވެ.
މީގެ އިތުރުންވެސް މި ސަރުކާރު ހަވާލުވިއިރު ޤަވާއިދާ ޚިލާފަށްއުޅޭ ބިދޭސީންގެ އަދަދު ނުވެސް އެނގޭކަމުގައި ފާހަގަކުރައްވައި އެކަމަށް ޙައްލު ހޯދުމަށް ސަރުކާރުން ކުރައްވާ މަސައްކަތްޕުޅުތަކަށް އަލިއަޅުވާލެއްވި އެވެ. އެގޮތުން ޤަވާޢިދާ ޚިލާފަށް އުޅެމުންދިޔަ 5012 ބިދޭސީން ފޮނުވާލާފައިވާކަން ފާހަގަކުރައްވައި، މިއީ ފާއިތުވި 3 އަހަރަށް ބަލާއިރުވެސް އެފަދަ ބިދޭސީން ބޭރުކުރެވިފައި ނުވާ މިންވަރެއް ކަމުގައި އެމަނިކުފާނު ހާމަކުރެއްވި އެވެ. ހަމައެއާއެކު، ބިދޭސީންގެ މައްސަލައާއި ގޭންގު ކުއްތަކާއި މަސްތުވާތަކެތީގެ މައްސަލަތައް ޙައްލުކުރުމަށް ކަމާގުޅޭ ހުރިހާ މުވައްސަސާއެއް އެއް ކުޑައެއްގެ ދަށަށް މިސަރުކާރުން ގެންނަވާފައިވާކަމުގައި އެމަނިކުފާނު ވިދާޅުވި އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަހުމަދު ނަރީޝް ދިވެހިންގެރާއްޖެ365
