ޒުވާނުންނަށް ވަޒީފާގެ ފުރުސަތުތައް ފަހިކޮށްދީ، ރަނގަޅު މިސްރާބަކަށް އެމީހުންގެ ކުރިމަގު ބައްޓަންކުރުވުމަކީ ސަރުކާރުގެ އަމާޒެއް ކަމަށް ޔޫތް މިނިސްޓަރ އިބްރާހީމް ވަހީދު ވިދާޅުވެއްޖެ އެވެ.
މިނިސްޓަރ މިހެން ވިދާޅުވީ ސަރުކާރަށް އެއް އަހަރު ފުރުމާ ގުޅިގެން ”ޖަވިޔަނި“ އަށް ދެއްވި ޚާއްސަ އިންޓަވިއުއެއްގައެވެ.
މި އިންޓަވިއުގައި މިނިސްޓަރ ވަހީދު ވަނީ ފާއިތުވި އެއް އަހަރު ތެރޭގައި ޒުވާނުންނަށް އަމާޒުކޮށްގެން ހިންގި ގިނަ ޕްރޮގްރާމްތަކެއްގެ މަޢުލޫމާތު ހިއްސާކުރައްވާފަ އެވެ. އޭގެ ތެރޭގައި ޔޫތް ހެކަތަން ޕްރޮގްރާމް، ހަފްތާރެސް، ސިވިކް އެޑިއުކޭޝަން ޕްރޮގްރާމްތައް، ޒުވާނުންގެ ހޮޅުއަށި، ބެލެނިވެރިންގެ ހޮޅުއަށި އަދި ފަންނީ އުފާ ފަދަ ޕްރޮގްރާމްތައް ހިމެނެ އެވެ.
މިނިސްޓަރ ވިދާޅުވި ގޮތުގައި ރައީސް ޑރ. މުޙައްމަދު މުޢިއްޒުގެ އަމާޒަކީ ތަފާތު ހުނަރުތަކުގެ ޒުވާނުންނަށް އެމީހުންގެ ހުނަރުތައް ދައްކުވައިދެވޭނެ މަންސަތައް ފޯރުކޮށްދިނުމެވެ. މިގޮތުން ހިންގުނު ޔޫތް ހެކަތަން ޕްރޮގްރާމްގައި 250 ޒުވާނުން ބައިވެރިވެ، ކޯޑިންގ ފަދަ މަސައްކަތްތައް ފުރިހަމަކުރި އެވެ. އަދި އޭގެ ފަހުން ބައެއް ބައިވެރިން އަމިއްލަ މަސައްކަތްތައް ފަށައި، ކުންފުނިތައްވެސް ޤާއިމްކޮށްފައިވާ ކަމަށް މިނިސްޓަރ ފާހަގަކުރެއްވި އެވެ.
އިތުރުން، ނޭޝަނަލް އެޕްރެންޓިސްޝިޕް ޕްރޮގްރާމް (ނެޕް) އަށް ލިބުނު ތަރުހީބާއެކު، މި ޕްރޮގްރާމް އަންނަ އަހަރުވެސް ކުރިއަށް ގެންދިއުމަށް ރައީސް އިތުރު އެހީތެރިކަމެއް ދެއްވާފައިވާ ކަމަށް މިނިސްޓަރ ހާމަކުރެއްވި އެވެ. ނެޕްގެ ޒަރީއާއިން 400 ޒުވާނުން ވަޒީފާއަށް ނެރުމަށް މަސައްކަތްކުރެވުނު ކަމަށްވެސް އޭނާ ވިދާޅުވި އެވެ.
މިނިސްޓަރ ވަހީދު އިތުރަށް ވިދާޅުވީ ޒުވާނުންނަށް ވަޒީފާ ނުލިބުމާއި ދާންވީ ކެރިއަރގެ މިސްރާބު ނޭނގުމުން މަގުދެއްކުން ފަދަ ކަންތައްތައް މިނިސްޓްރީން ކުރިއަށް ގެންދާނެ ކަމަށެވެ. އަދި ޒުވާނުންނާ ބައްދަލުކޮށް، އެމީހުންގެ އަޑުއަހައިގެން ފާގަތި މުސްތަޤުބަލެއް ކުރިއަށް އޮތް ތަނުގައި ލިބޭނެ ކަމުގެ ޔަޤީންކަން މިނިސްޓަރ ދެއްވި އެވެ.
މިނިސްޓަރު އިބްރާހިމް ވަހީދު (އަސްވާޑު) މިނިސްޓްރީ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސް ދިވެހިންގެރާއްޖެ365
