މޯލްޑިވްސް މީޑިއާ ކައުންސިލް (އެމްއެމްސީ) އަދި ބްރޯޑްކާސްޓިން ކޮމިޝަން އުވާލައި، ”މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން“ ގެ ނަމުގައި ހުށަހެޅިފައިވާ ބިލް އޮތީ މީޑިއާގެ މިނިވަންކަން ވަރަށް ބޮޑަށް ހަނިކުރެވި، ރާއްޖޭގެ މީޑިއާގެ މިނިވަންކަން އެތަށް އަހަރެއް ފަހަތަށް ސޮއްސާލައިގެން ދާނެ ގޮތަށް ކަމަށް މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން މިއަދު ބުނެފި އެވެ.

ތުޅާދޫ ދާއިރާގެ އަމިއްލަ މެމްބަރު އަބްދުލްހަންނާން އަބޫބަކުރު ހުށަހަޅުއްވާފައިވާ މި ބިލުގައި ވަނީ މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ނަމުގައި އާ ކޮމިޝަނެއް އުފައްދަން ހުށަހަޅުއްވާފަ އެވެ.

މި ބިލާ މެދު ކަންބޮޑުވުން ފާޅުކޮށް އެމްޖޭއޭއިން މިއަދު ނެރުނު ނޫސްބަޔާނެއްގައި ބުނެފައިވަނީ މި ބިލުގެ ސަބަބުން ގާނޫނުއަސާސީން ލިބިދީފައިވާ ނޫސްވެރިކަމުގެ މިނިވަންކަމުގެ ހައްގު ވަރަށް ބޮޑަށް ހަނިވެ، މި މަސައްކަތަށް ބޮޑެތި ހުރަސްތައް އެޅޭނެ ކަމަށެވެ. އަދި ބިލާއެކު އަލަށް އެކުލަވާލެވޭ ކޮމިޝަންގެ އޮނިގަނޑު އެކުލަވާލުމުގައި ސަރުކާރުގެ ނުފޫޒު ބޮޑުވުމާއި، ކޮމިޝަން ހިންގުމުގެ ބާރު ކޮމިޝަންގެ ރައީސަށް ދީފައިވުމާއި، މީޑިއާތަކާއި ނޫސްވެރިންނަށް ބޮޑެތި ޖޫރިމަނާތަކެއް ކުރެވޭނެ ގޮތަށް ބިލް އެކުލަވާލާފައިވުމަކީ ބޮޑެތި ކަންބޮޮޑުވުންތަކެއް ކަމަށް އެ ބަޔާނުގައި ބުނެފައިވެ އެވެ.

އެމްޖޭއޭއިން ބުނެފައިވަނީ މި ބިލަކީ ހުރިހާ އުސޫލުތައް މުގުރިގެންދާނެ ފަދަ، މިނިވަން ނޫސްވެރިކަމާއި މީޑިއާއަށް އޮތް ނުރައްކަލެއް ކަމަށެވެ. އަދި ނޫސްވެރިންކަމާއި މީޑިއާތައް ރެގިއުލޭޓް ކުރަން ސަރުކާރުގެ ބާރުގެ ދަށަށް ގެނައުމަކީ އެ ޖަމްއިއްޔާއިން އެއްވެސް މިންވަރަކަށް ބަލައިގަންނާނެ ކަމެއް ނޫން ކަމަށާއި، އެކަމާ ދެކޮޅަށް މަސައްކަތް ކުރާނެ ކަމަށް ބުނެފައިވެ އެވެ.

މި ބިލުގައިވާ ގޮތުން، އާ ކޮމިޝަނުގައި ތިބޭނީ ޖުމްލަ ހަތް މެމްބަރުން ނެވެ. އޭގެ ތެރެއިން ހަތަރު މެމްބަރުންނަކީ ރައްޔިތުންގެ މަޖިލީހުގެ ރުހުން ލިބިގެން ރައީސުލްޖުމްހޫރިއްޔާ އައްޔަންކުރާ މެމްބަރުން ނެވެ. އަނެއް ތިން މެމްބަރުންނަކީ މީޑިއާތަކުން އައްޔަންކުރާ މެމްބަރުން ނެވެ.

މީޑިއާ ތަމްސީލުކުރާ ތިން މެމްބަރުން އިންތިޚާބު ކުރުމަށް ވޯޓުލެވޭނީ، ގާނޫނުތަކުގެ ދަށުން ރަޖިސްޓަރީ ކޮށްގެން ހިންގާތާ ފަސް އަހަރު ވެފައިވާ ބްރޯޑްކާސްޓަރުންނާއި މީޑިއާތަކާއި އެ ތަންތަނުގައި މަސައްކަތް ކުރާ ނޫސްވެރިންނަށެވެ. އަދި ކޮމިޝަނުގެ ރައީސާއި ނައިބު ރައީސް އައްޔަން ކުރުމުގެ ބާރު، ބިލުގައި ދީފައިވަނީ މަޖިލީހުގެ ރުހުމާ އެކު ރައީސުލްޖުމްހޫރިއްޔާ އަށެވެ.

މީގެ އިތުރުން، މި ބިލުގައި މީޑިއާތަކުން އަމަލު ކުރަން ޖެހޭ ސުލޫކީ މިންގަނޑާ ތަކުރާރުކޮށް ޚިލާފު ވެއްޖެ ނަމަ 5،000 ރުފިޔާއާއި 50،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް ބަޔާންކޮށްފައިވެއެވެ. އަދި ވަކިވަކި ނޫސްވެރިން 5،000 ރުފިޔާއާއި 10،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށްވެސް ބިލުގައި ބަޔާންކޮށްފައިވެއެވެ.

އެމްޖޭއޭއިން ބުނެފައިވަނީ އެ ޖަމިއްޔާއިން އަބަދުވެސް ގަބޫލުކުރާ ހަމައަކީ މީޑިއާ ރެގިއުލޭޓް ކުރުމުގެ އިޚްތިޔާރު އޮންނަން ވާނީ މީޑިއާތަކަށް އަމިއްލައަށް އެކަން ކުރާ ގޮތް ނުވަތަ ސެލްފް ރެގިއުލޭޓްރީ މެކޭނިޒަމްއަކަށް ބުރަވާ ގޮތަށް ކަމަށެވެ.

”އަދި މީޑިއާތައް އެ މީހުން އަމިއްލައަށް ރެގިއުލޭޓް ކުރުން ނުވަތަ ސެލްފް ރެގިއުލޭޓް ކުރުމަށް މިހާރު އޮތް ބާރު ގެއްލި، އޭގެ ބަދަލުގައި ސަރުކާރުގެ ނުފޫޒާއި ބާރު މީޑިއާ ތެރެއަށް ވަރަށް ބޮޑަށް ވަދެ، ރާއްޖޭގެ މީޑިއާގެ މިނިވަންކަން އެތައް އަހަރެއް ފަހަތަށް ސޮއްސާލައިގެން ދާނެ“

މި ބިލަކީ މިނިވަން ނޫސްވެރިކަމާއި މީޑިއާއަށް އޮތް ނުރައްކަލެއް ކަމަށް ދެކޭކަމަށް ބުނެ އެމްޖޭއޭއިން ވަނީ މި ބިލާ ދެކޮޅަށް މަސައްކަތް ކުރާނެ ކަމަށް ބުނެފަ އެވެ.

ރައްޔިތުންގެ މަޖިލިސް މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ)