އަންނަ އަހަރުގެ ބަޖެޓްގައި 1.5 ބިލިއަން ރުފިޔާ ގެދޮރު އެޅުމުގެ އަމަލީ މަސައްކަތަށް ހާއްސަކޮށްފައިވާ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މިގޮތަށް ވިދާޅުވީ ޖުމްހޫރީ ދުވަހުގެ މުނާސަބާއާއި ގުޅުވައިގެން ރޭ ބޭއްވި ޖަލްސާގަ އެވެ.

މި ދައުރުގައި ގެދޮރުވެރިކަމުގެ ރަންޒަމާނެއް ގެނެސްދެއްވާނޭ ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެފައި ވެއެވެ.

އިންތިހާބެއް ގާތްވީމާ ރައްޔިތުންގެ ބޯހިޔާވަހިކަން މަތިން ހަނދާންކުރާކަށް މި ސަރުކާރުން މަޑެއް ނުކުރައްވާނޭކަމަށް ވިދާޅުވެ ރައީސުލްޖުމްހޫރިއްޔާ ވަނީ، މި ސަރުކާރުގެ އަމިއްލަ ބާރާއެކު އެކުލަވާލި ފުރަތަމަ ބަޖެޓުވެސް ޚާއްޞަކޮށްފައިވާނީ ގެދޮރުވެރިކަމާއި ބޯހިޔާވަހިކަމަށް އަމާޒުކުރައްވައިގެން ކަމުގައި ފާހަގަކުރައްވާފަ އެވެ. މިއީ ރާއްޖޭގެ ތާރީހުގައިވެސް، ބޯހިޔާވަހިކަމަށް މިހާ ބޮޑު އަދަދެއް ހާއްސަކުރެވުނު ފުރަތަމަ ފަހަރުކަމަށާއި، މީގެ ތެރެއިން 1.5 (އެކެއް ޕޮއިންޓް ފަހެއް) ބިލިޔަން ރުފިޔާ، ގެދޮރު އެޅުމުގެ އަމަލީ މަސައްކަތަށް ހާއްސަކުރައްވާފައިވާނޭ ކަމުގައި އެމަނިކުފާނު ވިދާޅުވި އެވެ. އަދި އަންނަ އަހަރުން ފެށިގެން ކޮންމެ އަހަރަކު، ގެދޮރުވެރިކަމުގެ ލޯނުތަކަށް ހާއްސަކޮށް، 1000 (އެއްހާސް) މިލިޔަން ރުފިޔާ ބަޖެޓުކުރައްވާނޭ ކަމަށްވެސް އެމަނިކުފާނު ވިދާޅުވި އެވެ. އަދި ސަރުކާރުގެ އަމާޒަކީ، މި ދައުރު ނިމޭއިރު، ދިވެހި ހުރިހާ ރައްޔިތުންނަށް ހިޔާވަހިކަން ކަށަވަރުކޮށްދިނުމަށްކަމަށް ރައީސުލްޖުމްހޫރިއްޔާ ވިދާޅުވި އެވެ.

”އިހަށްދުވަހު މި ލޯންޗްކުރި، މިހާރު ތިޔަބޭފުޅުންނަށް އެޕްލައި ކުރެއްވޭ، ފަސް ޕަސެންޓް ސަރވިސް ޗާޖަށްވުރެ ބޮޑުނޫން ހައުސިންގ ލޯނު. އެއީ، އިސްލާމިކް ފައިނޭންސް، އިސްލާމިކް ލޯން ސްކީމެއް، ޝަރީޢާ ކޮމްޕްލެއިންޓް ލޯން ސްކީމެއް އެއީ. ފަސް ޕަސެންޓަށްވުރެ ބޮޑުނޫން ސަރވިސް ޗާޖެއް ހިމެނޭ. ޢާންމުކޮށް ބޭންކްތަކުން ދިހަ ބާރަ ޕަސެންޓްގައި ހުންނަނީ. މި ލޯން ސްކީމަށް އެކަނި، މި އަންނަ އަހަރުން ފެށިގެން، ކޮންމެ އަހަރެއްގެ ބަޖެޓުގައި، އެއްހާސް މިލިއަން ރުފިޔާ، އެއް ބިލިއަން ރުފިޔާ ހިމެނިފައި ވާނެ. އެހެންވީމާ، އެއް ބިލިއަން ރުފިޔާގެ މި ލޯން ސްކީމް، އިފެކްޓިވްލީ ބޭންކްތަކުން އެ ލޯނު ލިބިގެންދާއިރުގައި، ޙަޤީޤަތުގައި ދެ ބިލިއަނަށްވުރެ ގިނަ ރުފިޔާގެ ލޯނު، މި އަންނަ އަހަރުވެސް ތިޔަބޭފުޅުންނަށް ނެންގެވޭނެ. އެއީ، އިންޓްރެސްޓް ރޭޓް، ނޫނީވިއްޔާ ސަރވިސް ޗާޖްގެ ޑިފަރެންސް އަޅުގަނޑުމެން ބޭންކްތަކަށް ޕޭކުރާ ނިޒާމެއްވީމަ.“

އުމްރާނީ މަސައްކަތްތަކާއި ބިނާރަށް އަލިއަޅުއްވާލައްވަމުން ރައީސުލްޖުމްހޫރިއްޔާ ވަނީ، ސަރުކާރުގެ އިމާރާތްތަކާއި މިސްކިތްތަކުގެ މަރާމާތަށް އިސްކަންދެއްވާފައިވާ ކަމަށާއި، ވެލާނާ އިންޓަނޭޝަނަލް އެއާޕޯޓާއި، ތިލަމާލެ ބުރިޖު ފަދަ މަޑުޖެހިފައިވާ މަޝްރޫއުތަކުގެ ދުވެލި، މި ސަރުކާރުގެ މަސައްކަތުން އަވަސްކުރައްވާފައިވާކަން ފާހަގަކުރައްވާފަ އެވެ. އަދި މި އަހަރުގެ ބަޖެޓުގެ ތާށިކަމާ އެކުގައިވެސް، މި ސަރުކާރުން ތަރައްޤީގެ 38 މަޝްރޫޢު ނިންމާފައިވާނޭކަމަށާއި، އިތުރު 26 މަޝްރޫއު ކުރިއަށްދާކަން އެމަނިކުފާނު ހާމަކުރެއްވި އެވެ.

މީގެ އިތުރަށްވެސް ރައީސް ވިދާޅުވީ ގާތްގަނޑަކަށް ދެ ބިލިއަން ރުފިޔާގެ ލޯނު، އެއީ، އަލަށް ގޯތީގައި ގެދޮރު އެޅުމަށާއި، ހަދަން ފަށައި ނުނިމިހުރި ގެ ހެދުމަށާއި، އަދި އުޅެމުންދާ ގެ ބާވެގެން މަރާމާތުކޮށްލުމަށް ވިޔަސް، މި ތިން ބާވަތަށްވެސް ލޯނު މީގެއިން ނެގޭނެ ކަމަށެވެ. ކުޑަ އާބާދީއަކަށްވިޔަސް، ބޮޑު އާބާދީއަކަށްވިޔަސް، އެ ކަނޑައެޅިފައި އޮތް އުސޫލުން، ކަނޑައެޅިފައި އޮތް ލެވެލްއަކަށް ލޯނު ނެގޭނެ ކަމަށް ރައީސް ވިދާޅުވި އވެެ.

”މާލޭގައި ވިއްޔާ، ޢާއިލާ ބަހާލާފައި އޮތީމަ، ގޯތި އެއްކޮށްލައިގެންވެސް، ދިހަ މިލިއަނާ ހަމަޔަށް، ބައެއް ބޭފުޅުންނަށް ލޯނު ނެންގެވޭނެ.“

އެހެންވީމާ، މި ލޯން ސްކީމަށްވެސް މިވަނީ އެއްހާސް މިލިއަން ހިމަނާފައި. މިއީ ރަނުގެ ފުރުޞަތެއް، ގެދޮރުވެރިކަން ޔަޤީންކުރުމަށް، މާލޭގެ ރައްޔިތުންވެސް އަދި ރާއްޖޭގެ ލޮބުވެތި ހުރިހާ ރައްޔިތުންވެސް. ގެދޮރުވެރިކަމުގެ ލޯން ސްކީމާއި، މި ދެންނެވި ގެދޮރުއެޅުމަށް ހިމެނި 1.5 ބިލިއަނާ އެކީގައި، 2.5 ބިލިއަން ރުފިޔާ، މި އަންނަ އަހަރުގެ ބަޖެޓުގައި ހިމަނާފައި ވާނެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޖުމްހޫރީ ދުވަސް