20 ވަނަ ގަރުނުގައި ދިވެހިން ދުށް ހުވަފެން ހަގީގަތަކަށް ވަމުންދާ ކަމަށް ދިވެހި ބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހިމް ވިދާޅުވެއްޖެ އެވެ.
މިނިސްޓަރ މިހެން ވިދާޅުވީ، މިރޭ ދަރުބާރުގޭގައި ބޭއްވުނު ޖުމްހޫރީ ދުވަހުގެ ރަސްމީ ޖަލްސާގައި ވާހަކަ ދައްކަވަމުންނެވެ.
މިނިސްޓަރ ނަސީރު ވިދާޅުވީ، ރައީސް ޑރ. މުހައްމަދު މުއިއްޒުގެ ހިތްޕުޅުގައި ދިވެހި ގައުމާއި ދިވެހިންނާ މެދު އޮތް ވިސްނުންފުޅު ހުށަހެޅުއްވީ ވަރަށް ތަރުތީބުން، ސާފުކޮށް އަދި ހާމަކޮށް ކަމަށެވެ. އަދި ރައްޔިތުން އެކަމަށް އިތުބާރު ކުރައްވައި، އެ އަމާނާތް ރައީސް މުއިއްޒާ ހަވާލު ކުރެއްވި ކަމަށް ވެސް ވިދާޅުވި އެވެ.
”ރައީސް ޑރ. މުއިއްޒު އަބަދުވެސް ވިދާޅުވަމުން ގެންދަވާ ދެ އިބާރާތެއް އަޅުގަނޑު ދަންނަވާލާނަން. އެއް ކަމަކީ އެމަނިކުފާނު އަބަދުވެސް ރައްޔިތުންގެ ފަޅީގައި ހުންނަވާނެ ކަމާއި، ވެރިކަން ކުރައްވަން ބޭނުންވަނީ ގައުމުގެ ހުރިހާ ފަށަލަތަކެއް ޝާމިލްވާ ގޮތަށް ކަމަށް. ދެވަނަ ކަމަކީ އެމަނިކުފާނު ތިރިން މައްޗަށް ވެރިކަން ކުރައްވަން ބޭނުންފުޅުވާ ކަމަށް،“ މިނިސްޓަރ ނަސީރު ވިދާޅުވި އެވެ.
މީގެއިތުރުން، ރައީސް ޑރ. މުއިއްޒު، އޭރު ވެވަޑައިގެންނެވި ވައުދުތައް ފުއްދެވުމަށް މަސައްކަތް ކުރަމުންދާ ކަމަށް މިނިސްޓަރ ފާހަގަކުރެއްވި އެވެ. އެގޮތުން ކުރިއަށް އޮތް 20 އަހަރު ދުވަހުގެ ގައުމީ ތަރައްގީއާ ގުޅޭ ޕްލޭން ތައްޔާރުކުރުމުގެ މަސައްކަތް ފަށާފައިވާ ކަމަށްވެސް މިނިސްޓަރ ވިދާޅުވި އެވެ.
”މި ޕްލޭން ފުރިހަމަވެގެން އަންނައިރު ހުރިހާ ރައްޔިތުންގެ ހިޔާލުތައް އެ ޕްލޭންގައި އޮތުމަކީ ރައީސް ބޭނުންފުޅުވާ ގޮތް ކަމަށް ތަކުރާރުކޮށް ވިދާޅުވަމުން ގެންދަވާ،“ މިނިސްޓަރ ނަސީރު ވިދާޅުވި އެވެ.
މި ޖަލްސާގައި ސަރުކާރުގެ އިސް ބޭފުޅުންނާއި، ރައްޔިތުންގެ މަޖިލީހުގެ މެންބަރުން އަދި އެހެނިހެން އިއްޒަތްތެރިން ބައިވެރިވެ ވަޑައިގެންނެވިއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިނިސްޓަރު އާދަމް ނަސީރު އިބްރާހިމް ދިވެހިބަހާއި ސަގާފަތާއި ތަރިކައާ ބެހޭ ވުޒާރާ ޖުމްހޫރީ ދުވަސް
