ހޮޓެލް ޓްރެއިނިން ސްކޫލަކާއި 5 ތަރީގެ ރިސޯޓެއް ތަރައްގީ ކުރުމަށް ޓޫރިޒަމް މިނިސްޓްރީއާއި ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ) އާ ދެމެދު އެއްބަސްވުމެއްގައި ސޮއިކޮށްފި އެވެ.
މިއަދު ބޭއްވި ރަސްމިއްޔާތެއްގައި މި އެއްބަސްވުމުގައި ޓޫރިޒަމް މިނިސްޓްރީގެ ފަރާތުން ސޮއިކުރެއްވީ ޓޫރިޒަމް މިނިސްޓަރު އިބްރާހިމް ފައިސަލް އެވެ. އެމްއެންޔޫގެ ފަރާތުން މި އެއްބަސްވުމުގައި ސޮއިކުރެއްވީ އެ ޔުނިވާސިޓީގެ ވައިސް ޗާންސެލަރ، ޑރ، އައިޝަތު ޝެހެނާޒް އާދަމެވެ.
މި އެއްބަސްވުމުގެ ދަށުން ލ. ހުޅިމެންދޫގައި 5 ތަރީގެ ރިސޯޓަކާއި ހޮޓެލް ޓްރެއިނިން ސްކޫލެއް ތަރައްގީ ކުރާނެ އެވެ. މީގެ ސަބަބުން ހޮޓެލް މެނޭޖްމެންޓް ކިޔަވައިގެން ނިކުންނަ ދަރިވަރުންނަށް އަމަލީ ތަޖުރިބާއާއި އިންޓާންޝިޕް ފުރުސަތުރައް ފަހިވެގެން ދާނެކަމަށް ޓޫރިޒަމް މިނިސްޓްރީން ބުނެ އެވެ.
އެއްބަސްވުމުގައި ސޮއި ކުރެއްވުމަށްފަހު އެކްސްގައި ކުރެއްވި ޕޯސްޓެއްގައި މިނިސްޓަރު ފައިސަލް ވިދާޅުވީ މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް ކުރިއަށް ގެންދަވާ މަޝްރޫއެއް ކަމަށެވެ. އަދި މީގެ ސަބަބުން ދަރިވަރުންނަށް އަމަލީ ތަޖުރިބާ ލިބި ދާއިރާއާ ގުޅޭ ހުނަރުތައް ދަސްވެ ފަތުރުވެރިކަމުގެ ދާއިރާއަށް ވަނުމަށް ތައްޔާރުވެގެން ދާނެކަމަށް މިނިސްޓަރު ވިދާޅުވި އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިނިސްޓްރީ އޮފް ޓޫރިޒަމް ދިވެހިރާއްޖޭގެ ގައުމީ ޔުނިވާސިޓީ ޓުއަރިޒަމް މިނިސްޓަރު އިބްރާހީމް ފައިސަލް
