ނުހައްގު މުއްސަނދިކަން ހޯދައި ލިބިގަތުމުގެ މައްސަލަތަކުގައި ދައުވާ ކުރުމަށް ފަސޭހަވާނެ ގޮތަށް ދިވެހިރާއްޖޭގެ ޤާނޫނުލްއުޤޫބާތަށް ހުށަހެޅި އިސްލާހުގެ ފުރަތަމަ ކިޔުން އިއްވައިފި އެވެ.
ދިވެހިރާއްޖޭގެ ޤާނޫނުލްއުޤޫބާތަށް ސަރުކާރުގެ ފަރާތުން އިސްލާހު ހުށަހެޅުއްވީ މާފުށި ދާއިރާގެ މެންބަރު ހުސައިން ރިޟާ އާދަމް އެވެ. ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ މި އިސްލާހުގެ ފުރަތަމަ ކިޔުން އިއްވާފަ އެވެ.
މި އިސްލާހު ހުށަހަޅާ ސަބަބުގެ ގޮތުގައި ބުނެފައިވަނީ ޤާނޫނުލްއުޤޫބާތުގެ 515 ވަނަ މާއްދާގައި ނުހައްޤު މުއްސަނދިކަން ހޯދައި ލިބިގަތުމުގެ ކުށް ކަނޑައަޅާފައި އޮތްގޮތުން ޤާނޫނު މާނަކުރުމުގައި އޮޅުންއަރާތީ އެ މާއްދާ އިސްލާހު ކުރުމަށް ކަމަށެވެ.
ސަރުކާރުން ހުށަހަޅާފައިވާ އިސްލާހުގައި ބުނެފައިވަނީ، ދައުލަތުުގެ މުވައްޒަފަކަށްވެ ހުރެ ލިބެމުންދާ، ނުވަތަ ދައުލަތުގެ މުވައްޒަފެއްގެ ގޮތުގައި ވަޒީފާ އަދާކުރިއިރު ލިބެމުންދިޔަ އާމްދަނީއާ ނުބައްދަލު ދިރިއުޅުމުގެ ފެންވަރެއް ގާއިމްކޮށްފައިވުން ނުވަތަ އެފަދައިން ގާއިމްކުރާ ދިރިއުޅުމުގެ ފެންވަރު ދެމެހެއްޓުމަކީ ކުށެއް ކަމަށެވެ. އަދި ދައުލަތުގެ މުވައްޒަފަކަށް ހުރިއިރު ލިބެމުންދިޔަ ނުވަތަ ދައުލަތުގެ މުވައްޒަފަކަށްހުރެ ލިބެމުންދާ އާމްދަނީއާ ނުބައްދަލު މިންވަރަކަށް އޭނާގެ ނަމުގައި ނުވަތަ އާއިލީ ނުވަތަ ޒާތީ ނުވަތަ ވިޔަފާރީގެ ގުޅުމެއް އޮތް މީހެއްގެ ނަމުގައި މުދާ ނުވަތަ ފައިސާ ހޯދައި މިލްކު ކުރުމަކީ ކުށެއް ކަމަށެވެ. އަދި އެ ދިރިއުޅުމުގެ ފެންވަރު އޭނާ ގާއިމްކޮށް ހިފަހައްޓާފައިވަނީ ގާނޫނީ ގޮތުން ހުއްދަކޮށްފައިވާ ގޮތުގެ މަތިންކަން ސާބިދުކޮށް ނުދެވުން ނުވަތަ އޭނާއާ އާއިލީ ނުވަތަ ޒާތީ ނުވަތަ ވިޔަފާރީގެ ގުޅުމެއް އޮތް މީހަކަށް އެ މުއްދަލެއް ނުވަތަ ފައިސާ ލިބިފައިވަނީ ގާނޫނު ހުއްދަކުރާ ގޮތުގެ މަތިންކަން ސާބިތުކޮށް ނުދެވޭ ހާލަތުގައި އެއީ ކުށެއް ކަމަށެވެ.
މި އިސްލާހުގައި ބުނެފައިވަނީ އެ މީހަކަށް ނުވަތަ އާއިލާ ނުވަތަ ޒާތީ ވިޔަފާރީގެ ގުޅުމެއް އޮތް މީހަކަށް އެ މުދަލެއް ނުވަތަ ފައިސާ ލިބިފައިވަނި ޤާނޫނު ހުއްދާކުރާ ގޮތުގެ މަތިން ކަމުގައިވާނަމަ އެ ހާޅަތުގައި ކުރަނީ ކުށެއް ނޫން ކަމަށެވެ.
ސަރުކާރުން ޤާނޫނުލްއުޤޫބާތަށް ހުށަހަޅާފައިވާ އިސްލާހުގައި ބުނެފައިވަނި މި ކުށް ކުރި ފަރާތަކީ ރައީސުލްޖުމްހޫރިއްޔާ، ވަޒީރު، މަޖިލީހުގެ މެންބަރު ނުވަތަ ފަނޑިޔާރުކަމުގެ މަގާމެއްގައި ހުރި މީހެނަމަ އެ ކުށަކަކީ ޖިނާޔަތުގެ 2 ވަނަ ދަރަޖައިގެ ކުށެއް ކަމަށެވެ. އަދި އެނޫން ހާލަތްތަކުގައި އެއީ ޖިނާޔަތުގެ 3 ވަނަ ދަރަޖައިގެ ކުށެއް ކަމަށެވެ.
