މޯލްޑިވްސް މީޑިއާ ކައުންސިލްގެ ރައީސްކަން ކުރައްވަމުން ގެންދަވާ އަހްމަދު މުސްތަފާ، ޕަބްލިކް ސާވިސް މީޑިއާ (ޕީއެސްއެމް) ގެ ވަޒީފާ އިން ވަކިކޮށްފި އެވެ.
މުސްތަފާ ވަޒީފާއިން ވަކިކުރެވުނީ ބުދަ ދުވަހުގެރޭ ބޭއްވުނު ނޫސްވެރިކަމުގެ އިނާމު ދިނުމުގެ ހަފްލާގައި ޕީއެސްއެމްގެ އެޑިޓޯރިއަލް ޕޮލިސީއާ ޚިލާފު ކޮންޓެންޓެއް ދެއްކުމުގެ ތުހުމަތުގަ އެވެ. އެ ހަފްލާ ޕީއެސްއެމްއިން ވަގުތުން ވަނީ ލައިވްކޮށް ދައްކާފަ އެވެ. އެގޮތުން އެރޭގެ އެވޯޑް ނައިޓްގައި އަދަދު ނޫހުން ތައްޔާރުކުރި ޑޮކިއުމެންޓްރީއަކަށް އެވޯޑްދީ، އެ ޑޮކިއުމެންޓްރީގެ މަންޒަރުތައް ދައްކާފައިވެ އެވެ.
އެ މައްސަލާގައި ޕީއެސްއެމް އިން ނެރުނު ބަޔާނެއްގައި ބުނެފައިވަނީ ”އަދަދު“ ނޫހުން މިދިޔަ އަހަރު ގެނެސްދިން ތަހުގީގީ ޑޮކިއުމެންޓްރީ ”ސްކީލާން“ ދެއްކި މައްސަލަ ރައްޔިތުންގެ މަޖިލީހަށް ހުށަހަޅާނެ ކަމަށެވެ.
ޕީއެސްއެމްއިން ބުނެފައިވަނީ، އެވޯޑް ލިބޭ ކެޓަގަރީތަކާއި ނޮމިނޭޓްވެފައިވާ ފަރާތްތަކާއި އެވޯޑް ލިބޭ ފަރާތްތައް ދުރާލާ މީޑިއާ ކައުންސިލުގެ އިސްވެރިންނަށް އެނގޭނެ ކަމަށެވެ. އަދި މި އެވޯޑް ހަފްލާ އިންތިޒާމްކުރެއްވިއިރު މީޑިއާ ކައުންސިލުގެ ރައީސްގެ މަގާމުގައި ހުންނެވީ ޕީއެސްއެމް ނިއުސްރޫމްގައި މަސައްކަތްކުރެއްވި ދުވަސްވީ މުވައްޒަފެއް ކަމަށްވެސް ފާހަގަކޮށްފައިވެއެވެ.
ޕީއެސްއެމްއިން ބުނެފައިވަނީ، މި ޑޮކިއުމެންޓްރީ ދެއްކުމަކީ ގަސްތުގައި ދުރާލާ ރާވައިގެން ޕީއެސްއެމްގެ އެޑިޓޯރިއަލް އުސޫލާ ޚިލާފު ކޮންޓެންޓު ދެއްކުމަށް މީޑިއާ ކައުންސިލުން ކުރި ކަމެއް ކަމަށް ދެކޭތީ، އެކަން އެންމެ ހަރުކަށި އިބާރާތުން ކުށްވެރިކުރާ ކަމަށެވެ.
އަހްމަދު މުސްތަފާއަކީ ޕީއެސްއެމްގައި 30 އަހަރަށްވުރެ ގިނަ ދުވަހު ޚިދުމަތްކުރައްވާފައިވާ ފަރާތެކެވެ. އޭނާގެ ދިގު މުއްދަތުގެ ޚިދުމަތަށްފަހު މިފަދަ ގޮތަކަށް ވަޒީފާއިން ވަކިކުރުމާ ގުޅިގެން ނޫސްވެރިންގެ ތެރެއިން ގިނަ ފާޑުކިޔުންތަކެއް އަމާޒުވަމުން އަންނަކަން ފާހަގަކުރެވެ އެވެ.
