އިންޑިއާގެ ދެކުނުގައި ބަހަކާއި ސައިކަލެއް ޖެހި ހިނގި ނުރައްކާތެރި އެކްސިޑެންޓެއްގައި ބަހުގައި ރޯވެ 25 މީހުން މަރުވެ، އިތުރު ބަޔަކަށް އެކިވަރުގެ އަނިޔާ ލިބިފައިވާކަމަށް ފުލުހުން ބުނެފިއެވެ.
މި ހާދިސާ ހިނގާފައިވަނީ އަންދްރާ ޕްރަދޭޝް ސްޓޭޓްގެ ކުރްނޫލް ޑިސްޓްރިކްޓް ކައިރީ ހައިވޭއެއްގަ އެވެ.
ފުލުހުންގެ އިސް އޮފިޝަލެއް ކަމަށްވާ ވިކްރަންތު ޕާޓީލް ވިދާޅުވި ގޮތުގައި، މި ބަހުގައި ދަތުރުކުރި ގިނަ އަދަދެއްގެ މީހުން ތިބީ ނިދާފައި ކަމަށްވާއިރު، އެކްސިޑެންޓަށްފަހު މިނިޓެއްގެ ތެރޭގައި ބަހުގައި ރޯވެ، ދަތުރުކުރި ގިނަ ބަޔަކު މަރުވެގެން ދިޔަ އެވެ. އެސޯސިއޭޓެޑް ޕްރެސް (އޭޕީ) އަށް މަޢުލޫމާތު ދެއްވަމުން ޕާޓީލް އިތުރަށް ވިދާޅުވީ، ބަހުގެ ބައެއް ފަސިންޖަރުންނަށް ކުޑަކުޑަ އަނިޔާތަކާ އެކު ދޮރުތައް ތަޅާލައިގެން ސަލާމަތްވެވުނު ނަމަވެސް، އެހީތެރިކަން ލިބުމުގެ ކުރިން އަނެއް ބައި މީހުން އަނދާ ހުލިވެ މަރުވީ ކަމަށެވެ.
ފުލުހުން ބުނި ގޮތުގައި މި އަލިފާނުގެ ހާދިސާގައި ބަހުން 18 ފަސިންޖަރުންނަށް ސަލާމަތްވެވުނު ކަމަށާއި، މިހާރު އެމީހުންނަށް ދަނީ ފަރުވާ ދެމުންނެވެ. ނަމަވެސް ބަހުގައި ތިބި އެހެން ފަސިންޖަރުންވެސް ސަލާމަތްވީތޯ ނުވަތަ ނޫންތޯ އަދި ސާފެއް ނުވެ އެވެ. ޕާޓީލް ވިދާޅުވި ގޮތުގައި، ސައިކަލް ދުއްވާފައި ފަހަތުން އައިސް ބާރު ސްޕީޑުގައި ދިޔަ ބަހުގައި ޖެހި، ސައިކަލް ބަހުގެ ތެރޭގައި ތާށިވި އެވެ. އަދި ސައިކަލް ތާށިވެ، އަލިފާނުގެ ހުޅުގަނޑެއް ހިފާގަނެ ބަހުގެ ތެޔޮ ޓޭންކަށް އަރާ، ހުޅުގަނޑު ވަރުގަދަވީ އެވެ.
މި އެކްސިޑެންޓުގައި ސައިކަލް ދުއްވަން އިން މީހާ ވެސް މަރުވެފައިވާ ކަމަށް ޕާޓީލް ވިދާޅު ވިއެވެ. މި ހާދިސާގެ ތަޙްޤީޤު ކުރުމަށް ފޮރެންސިކް މާހިރުންގެ ޓީމެއް ދަނީ މަސައްކަތް ކުރަމުންނެވެ. ބަހުގައި ޖުމްލަ 44 ފަސިންޖަރުން ތިއްބެވެ. އެމީހުން ދަތުރުކުރަނީ ތެލަންގަނާ ސްޓޭޓްގެ ހައިދަރުއާބާދުން ކަރްނާޓަކާ ސްޓޭޓްގެ ބެންގަލޫރާ، ދެމެދުގަ އެވެ. މި ހާދިސާ ހިނގާފައިވަނީ ހައިދަރުއާބާދުން ގާތްގަނޑަކަށް 210 ކިލޯމީޓަރު (130 މޭލު) ދެކުނުގައިވާ، ކުރްނޫލް ކައިރީގެ ޗިއްނާޓޭކޫރު އަވަށަށެވެ.
ބޮޑުވަޒީރު ނަރެންދުރަ މޯދީ އާއި އަންދްރާ ޕްރަދޭޝްގެ އެންމެ މަތީ ދަރަޖައިގެ އޮފިޝަލް އެން. ޗަންދްރަބާބޫ ނައިޑޫ ވަނީ ހިތާމަ ފާޅުކޮށް، އާއިލާތަކަށް ތައުޒިޔާ ވިދާޅުވެފަ އެވެ.
މި ނުރައްކާތެރި އަލިފާނުގެ ހާދިސާއަކީ ވެސް އިންޑިއާގައި ދެ ހަފްތާއަށް ވުރެ ކުރު މުއްދަތެއްގެ ތެރޭގައި ހިނގި ދެވަނަ ހާދިސާ އެވެ. މި މަހުގެ ކުރީކޮޅު އުތުރު އިންޑިއާގެ ރާޖަސްތާން ސްޓޭޓްގައި ބަހެއްގައި ޝޯޓް ސަރކިޓެއްގެ ސަބަބުން އަލިފާނުގެ ހާދިސާއެއް ހިނގާ، އޭގައި ދަތުރުކުރި 20 މީހުން މަރުވެފައިވެ އެވެ.
