ބައިނަލްއަގުވާމީ އެކުވެރިކަމުގެ މެޗެއްގައި 1-0 ގެ ނަތީޖާއަކުން ކުރިހޯދައި، ގައުމީ ޓީމުން ފުރަތަމަ ފަހަރަށް ބަންގްލަދޭޝްގައި އެ ޓީމު ބަލިކޮށްފި އެވެ.
ރާއްޖެއިން ވަނީ މީގެކުރިން ފަސް ފަހަރު ބަންގްލަދޭޝާ ދެކޮޅަށް އެ ގައުމުގައި ކުޅެފައެވެ. އޭގެތެރެއިން އެއް މެޗުން އެއްވަރުވިއިރު، އަނެއް ހަތަރު މެޗުން ވަނީ ބަލިވެފަ އެވެ.
ބަޝުންދަރާ އެރީނާގައި ކުޅުނު މެޗު ފެށިގެން، ގިނަ ވަގުތު ބޯޅަ ހިފަހައްޓައި، މޮޅަށް ކުޅެފައިވަނީ ބަންގްލަދޭޝުންނެވެ. އަދި އެ ޓީމުން ވަނީ ލަނޑު ޖަހާނެ ރަނގަޅު ފުރުސަތުތަކެއް ތަނަވަސްކޮށްފަ އެވެ. ނަމަވެސް، ގައުމީ ޓީމުގެ ޑިފެންޑަރުންނާއި ކީޕަރު ހުސައިން ޝަރީފް ވަނީ ރަނގަޅު ކުޅުމެއް ދައްކާފަ އެވެ.
ރާއްޖެއިން ވަނީ މެޗުގެ 18 ވަނަ މިނެޓުގައި ލަނޑު ޖަހައި، ކުރިހޯދާފަ އެވެ. އެއީ ގައުމީ ޓީމަށް ލިބުނު ހިލޭ ޖެހުމެއްގައި، ހަމްޒާ މުހައްމަދު ނަގައިދިން ހުރަހަކުން އަލީ ފާސިރު (ސެންޓޭ) ބޮލުން ޖެހި ލަނޑެކެވެ.
ނަތީޖާ ހަމަހަމަ ކުރުމަށް ބަންގްލަދޭޝަށް ވަނީ ރަނގަޅު ފުރުސަތުތަކެއް ލިބިފަ އެވެ. އެގޮތުން، ސޮހޭލް ރާނާ ފޮނުވާލި ބޯޅައެއް ދަނޑިއަށް އަމާޒުވިއިރު، ދެވަނަ ހާފުގައިވެސް އެ ޓީމަށް ވަނީ ރަނގަޅު ފުރުސަތުތަކެއްލިބި ބޭކާރުވެފަ އެވެ.
ރާއްޖެއަށްވެސް ވަނީ ލީޑު ފުޅާކުރުމަށް ރަނގަޅު ފުރުސަތުތަކެއް ލިބިފަ އެވެ. ދެވަނަ ހާފު ފެށިގެން ހަތަރުވަނަ މިނެޓުގައި އަހުމަދު އައިހަމް (ފަތޯ) ފޮނުވާލި ހަމަލާ ވަނީ ދަނޑިއަށް އަމާޒުވެފަ އެވެ. އަދި އޭގެފަހުން ސެންޓޭއަށްވެސް ވަނީ ރަނގަޅު ފުރުސަތެއް ލިބިފަ އެވެ.
ގައުމީ ޓީމުން މި މޮޅު ހާއްސަކުރީ މީގެ ފަސް މަސް ކުރިން ކުއްލި ގޮތަކަށް ނިޔާވި، ގައުމީ ފުޓްބޯޅަ ޓީމުގެ ކުރީގެ މިޑްފީލްޑަރު، މުހައްމަދު އާރިފް (ބަކާ) އަށެވެ. އެގޮތުން، ޓީމުން ވަނީ މެޗަށްފަހު ”ދިސް އިޒް ފޯ ޔޫ ބަކާ“ ޖަހާފައިވާ ޕޯސްޓަރެއް ދައްކާލައިފަ އެވެ.
