މީހެއްގެ ވައިބާ ހެކްކޮށްގެން ބައެއްގެ އަތުން ފައިސާ ހޯދުމުގައި ފުލުހެއްގެ ބައިވެރިވުމެއް ނުވަތަ ފުލުހަކަށް ތުހުމަތު ކުރެވިދާނެ ފަދަ އެއްވެސް ކަމެއް ފާހަގަކުރެވިފައި ނުވާކަމަށް ފުލުހުންގެ ހިދުމަތުން ބުނެފި އެވެ.

ފުލުހުން މިހެން ބުނީ ނޮވެންބަރު 28، 2024 ވަނަ ދުވަހުގެ ރޭ އެ ހިދުމަތުން ނެރުނު ނޫސް ބަޔާނެއްގަ އެވެ.

ފުލުހުން މަޢުލޫމާތު ދީފައިވާ ގޮތުގައި މި މައްސަލައާ ގުޅުންހުރި ތިން މައްސަލައެއް މިހާރު ތަޙްޤީޤު ކުރަމުންދެއެވެ. މި ސްކޭމްގައި ޖެހި، ފައިސާ ފޮނުވި ތިން މީހުން ފައިސާ ޖަމާކުރި އެއް އެކައުންޓަކީ ފުލުހެއްގެ އަނބިމީހާގެ އެކައުންޓުކަން ފުލުހުން ކަށަވަރުކޮށްދީފައިވެއެވެ. ނަމަވެސް، އެ އެކައުންޓަކީ އެހެން ބައެއްގެ ބާރުގެ ދަށަށް ގެންގޮސްފައިވާ އެކައުންޓެއްކަމަށް ފުލުހުން ބުނެފައިވެއެވެ.

ފުލުހުންގެ އިކޮނޮމިކް ކްރައިމް ޑިޕާޓްމަންޓުން މި މައްސަލަ ތަޙްޤީޤު ކުރަމުންދާ ކަމަށާއި، ތަޙްޤީޤުގެ އެއްވެސް ހިސާބަކުން ފުލުހެއްގެ ބައިވެރިވުމެއް އޮތްކަން ފާހަގަކުރެވިއްޖެނަމަ އެ ފުލުހެއްގެ މައްސަލަ ބަލާނެ ކަމަށް ފުލުހުން ބުނެފައިވެއެވެ.

މި ސްކޭމްގައި ޖެހުނު ތިން މީހުންގެ އަތުން ޖުމްލަ 10،100 ރުފިޔާ އޮޅުވާލައިގެން ހޯދާފައިވާއިރު، އޭގެ ތެރެއިން 5،600 ރުފިޔާ ދައުރުވެފައިވާ އެއް އެކައުންޓް މިހާރު ހިފަހައްޓާފައިވާ ކަމަށް ފުލުހުން މަޢުލޫމާތު ދީފައިވެއެވެ. އަދި ބާކީ ހުރި ފައިސާ ރިކަވަރ ކުރުމުގެ މަސައްކަތް ކުރިއަށްދާ ކަމަށްވެސް ފުލުހުން ބުނެފައިވެއެވެ.

ފުލުހުންގެ ބަޔާނުގައި އެ މުއައްސަސާގެ ނަން ކިލަނބުވާ ގޮތަށް މަޢުލޫމާތު ނުފެތުރުމަށް އިލްތިމާސްކޮށް، އެކަމާމެދު ކަންބޮޑުވުން ފާޅުކޮށްފައިވެއެވެ.

މަކަރާއި ހީލަތް ހެދުން ދިވެހި ފުލުހުންގެ ޚިދުމަތް