އޭޑީކޭ ހޮސްޕިޓަލުން މެޑިކަލް އިންޓާންޝިޕް ޕްރޮގްރާމަށް ހުޅުވާލައިފި އެވެ.
މި ޕްރޮގްރާމުގައި ބައިވެރިވާ ފަރާތްތަކުން މަހަކު 14،500 ރުފިޔާ ދައްކަންޖެހޭ ގޮތަށް ހަމަޖައްސާފައިވާކަމަށް އެ ހޮސްޕިޓަލުން މަޢުލޫމާތު ދީފައިވެ އެވެ.
އޭޑީކޭއިން މި މަހުގެ 26 ވަނަ ދުވަހު ނެރުނު އިޢުލާނެއްގައި ބުނެފައިވާ ގޮތުން، މި އިންޓާންޝިޕް ޕްރޮގްރާމްތައް ފެށުމަށް ހަމަޖެހިފައިވަނީ އަންނަ އަހަރުގެ ޖެނުއަރީ މަހުގައެވެ. އަދި މި ޕްރޮގްރާމުގެ ފުރަތަމަ ބުރުގައި 20 ޖާގަ ދިނުމަށް ވަނީ ހަމަޖެހިފައެވެ.
އޭޑީކޭއިން މި ޕްރޮގްރާމް ތަޢާރަފުކޮށްފައިވަނީ، އައިޖީއެމްއެޗްގައި އިންޓާންޝިޕަށް އޮތް ޑިމާންޑު އިތުރުވެފައިވާ ދަނޑިވަޅެއްގައެވެ. އައިޖީއެމްއެޗްގައި އިންޓާންޝިޕް ޕްރޮގްރާމް ފެށިފައިވަނީ 2018 ވަނަ އަހަރުއެވެ. އޭގެ އަހަރެއް ފަހުން، 2019 ގައި، ދިވެހިރާއްޖޭގެ ޤައުމީ ޔުނިވަރސިޓީގައި ސްކޫލް އޮފް މެޑިސިން ޤާއިމުކޮށް، ރާއްޖޭގައި މެޑިކަލް ދަރިވަރުންނަށް ކިޔަވައިދޭން ފަށާފައިވެއެވެ.
މިހާރު އެމްއެންޔޫ އާއި ބޭރުގެ ޔުނިވަރސިޓީތަކުން ތަޢުލީމު ހާސިލުކޮށްފައިވާ ގިނަ އަދަދެއްގެ ޑޮކްޓަރުން އައިޖީއެމްއެޗްގައި އިންޓާންޝިޕް ޕްރޮގްރާމް ފުރިހަމަކުރަމުން ގެންދެއެވެ. އޭޑީކޭގެ މި އައު ޕްރޮގްރާމާއެކު، ރާއްޖޭގައި މެޑިކަލް އިންޓާންޝިޕް ފުރިހަމަކުރުމުގެ ފުރުޞަތުތައް އިތުރުވެގެންދާނެ ކަމަށް ބެލެވެއެވެ.
