5 އަހަރުގެ ވެރިކަމެއް ކޮށްފައިދިޔައިރު މިއަށްވުރެ ދައުލަތުގެ މުވައްސަސާތަކުގެ ކޮރަޕްޝަންގެ އަމަލުތަށް ހިންގާފައި އޮތް އެހެން ސަރުކާރެއް ތާރީހުން ފެންނާކަށް ނެތް ކަމަށް މަޖިލީހުގެ ވިލިމާލޭ ދާއިރާގެ މެންބަރު މުހައްމަދު އިސްމައިލް ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވިލިމާލޭ ދާއިރާގެ މެންބަރު މުޙައްމަދު އިސްމާއިލް ވިދާޅުވެފައިވަނީ، އެމްޑީޕީގެ ފަސް އަހަރުގެ ވެރިކަމުގައި ދައުލަތުގެ މުއައްސަސާތަކުގައި ހިންގާފައިވާ ކޮރަޕްޝަންގެ އަމަލުތަކަށްވުރެ ބޮޑަށް ކޮރަޕްޝަން ހިންގާފައިވާ ސަރުކާރެއް ތާރީޚުން ފެންނަން ނެތް ކަމަށެވެ.
މެންބަރު އިސްމާއިލް ވިދާޅުވީ، ނިމިދިޔަ ސަރުކާރުން ދައުލަތުގެ އެކިއެކި ކުންފުނިތައް ބަނގުރޫޓުވާ ހިސާބަށް ގެންގޮސްފައިވާ ކަމަށެވެ. އޭނާ ވިދާޅުވި ގޮތުގައި، ދައުލަތުގެ ކުންފުނިތަކުން ”ހެސްކިޔާފައި“ ބޭންކްރަޕްސީއާ ހަމައަށް ދާވަރަށް ދަރަނިވެރިވެފައިވެ އެވެ.
”ދަރަނިވެރި ނުވާ ދައުލަތުގެ އެންމެ މުއައްސަސާއެއްވެސް ނެތް,“ އިސްމާއިލް ވިދާޅުވި އެވެ. އޭނާ އިތުރަށް ވިދާޅުވި ގޮތުގައި، އެމްޓީސީސީގައިވެސް ދަރަނިވީނުވީ ނޭނގޭ ގޮތަށް ޚަރަދުކޮށްފައިވާ ކަމަށާއި، މިކަންކަން ބަލަންޖެހޭ ކަމަށެވެ.
އިސްމާއިލް ފާހަގަކުރެއްވި ގޮތުގައި، އޭސީސީ ފަދަ މިނިވަން މުއައްސަސާތައް ހެދިފައި ހުންނަނީ ދައުލަތުން ގެއްލޭ ފައިސާއާއި ދައުލަތުގެ މުއައްސަސާތަކުން އެކި ގޮތްގޮތަށް ހިންގާ ކޮރަޕްޝަންގެ އަމަލުތައް ބެލުމަށް ކަމަށެވެ. އަދި އޭނާ ވިދާޅުވީ، އެމްޑީޕީ އެކުލެވޭ ކައުންސިލްތައް ރާއްޖޭގެ އެކި ކަންކޮޅުތަކުގައި ދެމިފައި އޮތްއިރު، އެ ކައުންސިލްތަކުން މާލިއްޔަތު ޤާނޫނާ ޚިލާފަށް ބޮޑެތި ކަންތައްތައް ކޮށްފައިވާ ކަމަށާއި، މިއީ ބަލަންޖެހޭ ކަންކަން ކަމަށެވެ.
”އޭސީސީ ހޭއަރަން އެބަޖެހޭ. މިއަދުގެ ރައީސުލްޖުމްހޫރިއްޔާ ބޭނުންވަނީ އޭސީސީ ހޭ ލައްވަން. ދައުލަތުގެ ފައިސާއިން ޚިޔާނާތްތެރިވާ ބޭފުޅުންނަށް ޤާނޫނުގެ ތެރެއިން އެ ބޭފުޅުންނަށް އަދަބުތައް ލިބިގެންދާން,“ އިސްމާއިލް ވިދާޅުވި އެވެ.
ރައްޔިތުންގެ މަޖިލިސް ވިލިމާލެ ދާއިރާގެ މެންބަރު މުހައްމަދު އިސްމާއިލް
