ފުޑް ސެކިއުރިޓީ ގާއިމުވުމުން ބައެއް ބާވަތްތަކުގެ އިމްޕޯޓް ކުރެވޭ ނިސްބަތް އެއްކޮށް ހުއްޓާލެވޭނެ ކަމަށް ބެލެވޭ ކަމަށް ދަނޑުވެރިކަމާއި ބެހޭ ވަޒީރު ޑރ. އާއިޝަތު ރަމީލާ ވިދާޅުވެއްޖެ އެވެ.
މިނިސްޓަރ މިހެން ވިދާޅުވެފައިވަނީ ”ޖަވިޔަނި“ އަށް ދެއްވި ޚާއްޞަ އިންޓަވިއުއެއްގަ އެވެ.
މި އިންޓަވިއުގައި ވާހަކަދައްކަވަމުން މިނިސްޓަރ ވިދާޅުވީ، އެގްރިކަލްޗަރަލް ޒޯނެއް އުފައްދައިގެން އެތަނުގެ ޒަރީއާއިން ފުޑް ސެކިއުރިޓީ ކަށަވަރުކުރުމަކީ މި ސަރުކާރުގެ އަމާރުގެ އަމާޒެއް ކަމަށެވެ. އާންމުކޮށް ދާއިމީކޮށް ބޭނުންކުރެވޭ ބަނބުކެޔޮ ފަދަ ބާވަތްތައް މިހާރުވެސް އުފައްދާ ހެދުމުގައި މިނިސްޓްރީން އެހީތެރިވާ ކަމަށް މިނިސްޓަރ ވިދާޅުވި އެވެ. ފުޑް ސެކިއުރިޓީ ޕްރޮގްރާމް ކުރިއަށްގެންދިއުމަށް ރާވާފައިވަނީ ށ. އަތޮޅުގަ އެވެ. މި ޕްރޮގްރާމްގައި ގޭބީސީތަކަށް ބަނބުކެޔޮ، އަލަ، ފަތްކެޔޮ، މުރަނގަ، ޖަނބުރޯލު ފަދަ ބާވަތްތަކުގެ ގަސް ހަދިޔާ ކުރެވޭނެ ކަމަށް މިނިސްޓްރީ އިން ބުނެފައި ވެއެވެ.
މިނިސްޓަރ ވިދާޅުވީ، މިހާރު އާންމުކޮށް ރާއްޖޭގައި ކެއުން ބުއިމަށް ބޭނުންކުރާ ބާވަތްތައް ގެންނަނީ އިމްޕޯޓް ކޮށްގެން ކަމަށާއި، މި ބާވަތްތައް ރާއްޖޭގައި އުފައްދާ، އެ ތަކެތި އިމްޕޯޓްކުރުން މަދުކުރުމަށް ސަރުކާރުން ޕްރޮޖެކްޓެއް ފަށާފައިވާ ކަމަށެވެ. އެގޮތުން މިއަހަރު ތެރޭ މިނިސްޓްރީން ކުރި މަސައްކަތަށް ބަލާއިރު، އެގްރިކަލްޗަރަލް އިކޮނޮމިކް ޒޯންގައި ހައްދާނެ ތަކެތީގެ ލިސްޓްތައް ފައިނަލްކޮށް، އެކަމަށް ހަދަންވާ ފީޒިބިލިޓީ ސްޓަޑީ ހަދާ ނިމިފައިވާ ކަމަށް މިނިސްޓަރ މަޢުލޫމާތު ދެއްވި އެވެ. އުންމީދަކީ އަންނަ ޖެނުއަރީ މަހުގެ ތެރޭގައި މިކަމުގެ ޢަމަލީ މަސައްކަތް ފެށިގެން ދިއުން ކަމަށް މިނިސްޓަރ ވިދާޅުވި އެވެ.
މީގެއިތުރުން، މިނިސްޓަރ ވިދާޅުވީ މި ޒޯންގައި ދެ ފޭސްއަކަށް ބަހާލައިގެން މަސައްކަތް ކުރުމަށް ހަމަޖެހިފައިވާ ކަމަށެވެ. ފުރަތަމަ ފޭސްގެ ދަށުން ގްރީންހައުސް ބޭނުންކޮށްގެން ގްރީންހައުސްގެ ތެރޭގައި ދަނޑުވެރިކަން ކޮށްގެން ބާވަތްތައް އުފެއްދުން ހިމެނެ އެވެ. ދެވަނަ ފޭސްގައި އޯޕަން ފާމިންގގެ މަސައްކަތް ގްރީންހައުސްއިން ބޭރުގައި (ބިމުގައި) ގަސް އިންދުމަށް ހަމަޖެހިފައިވާ ކަމަށް މިނިސްޓަރ މަޢުލޫމާތު ދެއްވި އެވެ. މިހާރު އެކުލަވާލާފައިވާ ލިސްޓުގައި ފިޔާ އަދި އަލުވިއާއި ބީންސް ކަހަލަ އެއްޗެހި ހެއްދޭނެ ކަމަށް މިނިސްޓަރ ވިދާޅުވި އެވެ.
މިނިސްޓަރ ވިދާޅުވީ، ރާއްޖެއަށް ބޭނުންވާ ޕޯލްޓްރީ ފާމެއްވެސް މި ޒޯންގައި ތަރައްޤީކުރާނެ ކަމަށެވެ. އޭރުން އިމްޕޯޓް ކުރާ ބިހުގެވެސް އަދަދު ވަރަށް ބޮޑަށް ދަށްކުރެވިގެންދާނެ ކަމަށް މިނިސްޓަރ ފާހަގަކުރެއްވި އެވެ. މި ޒޯންގެ ސަބަބުން ހެޔޮ އަގުގައި ކާބޯތަކެތި ރާއްޖެއިން ލިބޭނެ ކަމަށްވެސް މިނިސްޓަރ ވިދާޅުވި އެވެ.
މި މަޝްރޫޢުގެ ސަބަބުން ރާއްޖޭގެ ފުޑް ސެކިއުރިޓީ ކަށަވަރުކުރުމަށް ބޮޑު ކުރިއެރުމެއް ލިބިގެންދާނެ ކަމަށް ބެލެވެއެވެ. އަދި މިހާރު ބޮޑު އަދަދަކަށް އިމްޕޯޓް ކުރަމުންދާ ކާބޯތަކެތީގެ ބާވަތްތައް ރާއްޖޭގައި އުފެއްދުމުގެ ސަބަބުން، ރާއްޖޭގެ އިޤްތިޞާދަށްވެސް ފައިދާތަކެއް ކުރާނެ ކަމަށް ލަފާކުރެވެ އެވެ.
މިނިސްޓަރ އާއިޝަތު ރަމީލާ މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރ
