މިދިޔަ އެމްޑީޕީ ސަރުކާރުގައި އިޒްރޭލުން ޑޮކްޓަރުންތަކެއް ގެނެސް ރާއްޖޭގެ ރައްޔިތުންގެ ލޮލުގެ ފަރުވާއަށް އަދި ތަޢުލީމީ ނިޒާމުގެ ތެރެއަށް އިޒްރޭލުގެ މީހުން ގެނެސްގެން މަސައްކަތް ކުރިތަން ދުށް ކަމަށް ރައްޔިތުންގެ މަޖިލީހުގެ ވިލިމާލޭ ދާއިރާގެ މެންބަރު މުޙައްމަދު އިސްމާއިލް ވިދާޅުވެއްޖެ އެވެ.
މިއަދު ބޭއްވުނު މަޖިލީހުގެ ޖަލްސާގައި އިޒްރޭލް ޕާސްޕޯޓް މަނާކުރުމާ ބިލްގެ މަސައްކަތް އަވަސްކުރުމަށް ގޮވާލާ ހުށަހެޅުނު ޤަރާރުގެ ބަހުސްގައި ވާހަކަ ދައްކަވަމުން މެންބަރު އިސްމާއިލް ވިދާޅުވީ، މިކަމާ ގުޅޭ މަޢުލޫމާތު ރާއްޖޭގެ ނޫސްތަކުގައި މިހާރުވެސް ހުރި ކަމަށެވެ.
”5 އަހަރުން 1825 ދުވަސް 60 މަސް މި މަޖިލީހުގައި ސުޕަ މެޖޯރިޓީއެއް އޮވެގެން ދިޔަ، މި އިޒްރޭލްގެ މައްސަލަ އެމްޑީޕީއަށް އެންމެ ހޫނުވެގެން އައި ދުވަސްތަށް، ނިމިދިޔަ ސަރުކާރުގެ ވާހަކަ އަޅުގަނޑު މި ދައްކަނީ،“ މެންބަރު އިސްމާއިލް ވިދާޅުވި އެވެ.
އިތުރަށް ވާހަކަ ދައްކަވަމުން މެންބަރު އިސްމާއިލް ވިދާޅުވީ، އިޒްރޭލް ޕާސްޕޯޓް މަނާކުރުމަށް ބިލެއް ހުށަހަޅައި ގާނޫނަށް އިސްލާހެއް ގެނައުމުގެ ފުރުސަތު އެމްޑީޕީ މެންބަރުންނަށް ލިބުނު ނަމަވެސް އެކަން ނުކުރާ ކަމަށެވެ. އޭގެ ބަދަލުގައި މިހާރު ޕީއެންސީގެ ސަރުކާރު އައުމުން، ރައްޔިތުންނަށް ފަލަސްތީނަށް މާ ހެޔޮއެދޭ ބައެއްގެ ގޮތުގައި ދެއްކުމަށް މަސައްކަތް ކުރަމުންދާ ކަމަށް އޭނާ ފާހަގަކުރެއްވި އެވެ.
މީގެއިތުރުން، އެމެރިކާގެ އިންތިޚާބުގައި މަޖިލީހުގެ 5 މެންބަރުން އެތަން މޮނިޓަރ ކުރުމަށް އެމެރިކާއަށް ފޮނުވި ކަމަށްވެސް މެންބަރު އިސްމާއިލް ވިދާޅުވިއެވެ. އަދި އެމެރިކާއަކީ އިޒްރޭލަށް އެންމެ ބޮޑަށް ފައިސާ ޚަރަދުކުރާ އެއް ގައުމު ކަމަށްވެސް އޭނާ ފާހަގަކުރެއްވި އެވެ.
