ގާނޫނުއަސާސީގެ މުހިންމު މާއްދާތަކަށް އިސްލާހު ގެނައުމުގައި ރައްޔިތުންގެ ހިޔާލު ހޯދުން ލާޒިމްކުރާ މާއްދާ އިސްލާހުކުރުމަށް ވެސް ރައްޔިތުންގެ ހިޔާލު ހޯދަންޖެހޭ ގޮތަށް ބަދަލުކުރުމަށް ހުށަހަޅައިފި އެވެ.
މި ގޮތަށް ހުށަހަޅާފައިވަނީ ސަރުކާރުގެ ފަރާތުން ޕީއެންސީގެ ޕާލިމަންޓްރީ ގްރޫޕުގެ ޑެޕިއުޓީ ލީޑަރު، ހުޅުދޫ ދާއިރާގެ މެންބަރު މުހައްމަދު ޝާހިދު (ޝާޑު) ހުށަހެޅުއްވި، ދިވެހިރާއްޖޭގެ ގާނޫނުއަސާސީއަށް އިސްލާހު ގެނައުމުގެ ބިލުގަ އެވެ.
މި ބިލު މަޖިލީހަށް ހުށަހަޅާފައިވަނީ ރޭގެ ވަގުތެއްގަ އެވެ. އަދި މި ބިލުގެ ފުރަތަމަ ކިޔުން މިއަދު އިއްވުމަށްފަހު ބިލުގެ އިބްތިދާއީ ބަހުސްވެސް މިއަދު ފެށުމަށް ތާވަލުކޮށްފައިވެ އެވެ.
ގާނޫނުއަސާސީގެ 262 ވަނަ މާއްދާގެ (ށ) އަށް އިސްލާހު ގެނައުމަށް މި ބިލުގައި ހުށަހަޅާފައިވާއިރު މިއީ އަސާސީ ހައްގުތަކާއި މިނިވަންކަމުގެ ބާބު، ރައްޔިތުންގެ މަޖިލީހުގެ އުމުރު، އަދި ރިޔާސީ ދައުރާއި ރައީސް އިންތިޚާބުކުރާ ގޮތަށް އިސްލާހު ގެނައުން ފަދަ މުހިންމު މާއްދާ އެކެވެ. ނަމަވެސް މި މާއްދާއަށް ބަދަލު ގެނައުމުގެ އިހުތިޔާ ރައްޔިތުންގެ މަޖިލީހަށް އޮވެ އެވެ. ސަރުކާރުން މި މާއްދާއަށް ހުށަހެޅި އިސްލާހުގެ ސަބަބުން މި މާއްދާއަށް ބަދަލެއް ގެންނެވޭނީވެސް ރައްޔިތުންގެ ހިޔާލު ހޯދުމަށް ފަހު އެވެ.
މި އިސްލާހު ފާސްވެއްޖެނަމަ، ގާނޫނުއަސާސީގެ މުހިންމު މާއްދާތަކަށް ބަދަލު ގެނައުމުގައި ރައްޔިތުންގެ ބައިވެރިވުން އިތުރުވެގެންދާނެ އެވެ.
ހުޅުދޫ ދާއިރާގެ މެންބަރު މުހައްމަދު ޝާހިދު ރައްޔިތުންގެ މަޖިލިސް ކޮންގްރެސް ޕާޓީ
