ކުރީގެ ޕްރޮސިކިއުޓާ ޖެނެރަލް ހުސައިން ޝަމީމަށް ހަމަލާދިން މައްސަލައިގައި ދައުވާ ލިބޭ މީހުން ދައުވާތަކަށް އިންކާރު ކޮށްފި އެވެ.
ޝަމީމަށް ހަމަލާދިން މައްސަލައިގައި ދައުވާ ކޮށްފައިވަނީ ރ. އަލިފުށި، ރިވެލި، މިދުހަތު އާދަމް، ލ. ގަން، ތުނޑި، ޖަވާހިރުވިލާ، މުހައްމަދު ޖަޒްލާން، ދަފްތަރު ނަންބަރު ދރ 2247، އަހުމަދު މައިސާން ހާޝިމް، ލ. މާމެންދޫ، މުރިނގު، ރަޖުވާން ލަތީފް، ތ. ގާދިއްފުށި، މުސްތަރީގެ، ޝަމާލް ހުސައިން، ތ. ދިޔަމިގިލި، ރުވާ، އަބާން އަބްދުލްހަންނާނު އަދި އދ. މާމިގިލި، ކެމީހިޔާ، ޒަޔާން ނަސީރުގެ މައްޗަށެވެ.
މީހުންގެ މައްޗަށް ކޮށްފައިވަނީ ޤަސްދުގައި މީހަކު މަރާލަން އުޅުމުގެ ކުށުގެ ދައުވާ އެވެ.
މި މައްސަލައިގައި އިއްޔެ ބޭއްވި އަޑުއެހުމުގައި މި މީހުން ވަނީ ދައުވާތަކަށް އިންކާރު ކޮށްފަ އެވެ. ދައުވާތަކަށް އިންކާރުކުރުމުން ޕީޖީގެ ވަކީލް ވަނީ މިމައްސަލައިގައި ހިމެނޭ ހެކި ހާމަކޮށްފަ އެވެ.
ޝަމީމަށް ހަމަލާދިން މައްސަލައިގައި ޕީޖީ އޮފީހުން މީގެކުރިން ބުނެފައިވަނީ، މި މައްސަލައިގައި ހިމެނޭ މިދުހަތު އާދަމްގެ މައްޗަށް ދައުވާ ކޮށްފައިވަނީ އިތުރު ބަޔަކާއެކު ޝަމީމަށް ހަމަލާދިނުމަށް ރާވައި އަދި މީނާ ޝަމީމުގެ ބޮލަށް ހަމަލާދިނުމަށް މަސައްކަތްކޮށް، ޝަމީމުއާ މެދު މާރާމާރީ ހިންގައި އަތުގެ މުލައްދަނޑި ޒަހަމްކޮށްލާފައިވާތީއެވެ. މުހައްމަދު ޖަޒްލާންގެ މައްޗަށް ދައުވާ ކޮށްފައިވަނީ މިކަން ރާވައި އަދި ހަމަލާދިން މިދުހަތު އާދަމް ގޮވައިގެން އެ ސައިކަލުގައި އެތަނަށް ގޮސް، ހަމަލާދިނުމުން މިދުހަތު ގޮވައިގެން އެތަނުން ގޮސްފައިވާތީއެވެ. އަހުމަދު މައިސާން ހާޝިމްގެ މައްޗަށް ދައުވާ ކޮށްފައިވަނީ ޝަމީމަށް ހަމަލާދިނުމަށް ރާވައި، މިކަމުގައި ބޭނުންކުރި ސައިކަލު ހޯދައިދީ އެކަމަށް މަގުފަހިކޮށްދީފައިވާތީއެވެ.
މިމައްސަލައިގައި ދެން ހިމެނޭ ރަޖުވާން ލަތީފް، ޝަމާލް ހުސައިން، އަބާން އަބްދުލްހަންނާނު އަދި ޒަޔާން ނަސީރުގެ މައްޗަށް ދައުވާ ކޮށްފައިވަނީ ޝަމީމަށް ހަމަލާދިނުމަށް ރާވައި، ހަމާދިން އިރު ކާރެއްގައި އެތަނުގައި މަޑުކޮށްގެން އިނދެފައިވާތީއާއި، ހަމަލާދީ ނިމުމުން، ހަމަލާދިން މީހުންނާއެކު އެސަރަހައްދުން ގޮސްފައިވާތީއެވެ.
ޝަމީމަށް ހަމަލާދީފައިވަނީ 31 ޖަނަވަރީ 2024 ދުވަހުގެ ހެނދުނުގެ ވަގުތެއްގައި ނޫރު މިސްކިތް ކައިރީ މަގުމަތީގައި ހުއްޓައެވެ. މަރުތޭލައެއް ބޭނުންކޮށްގެން ޝަމީމްގެ ބޮލަށް ހަމަލާދިނުމަށް މަސައްކަތް ކުރިނަމަވެސް ހަމަލާ އަމާޒުވީ ޝަމީމްގެ މުލައްދަނޑިއަށެވެ.
ކުރީގެ ޕްރޮސެކިއުޓާ ޖެނެރަލް ހުސައިން ޝަމީމް ކްރިމިނަލް ކޯޓު
