ލެބަނަންގެ ހިޒްބުﷲ ޖަމާޢަތުން އިޒްރޭލުގެ 17 ސިފައިން މަރާލައިފިކަމަށް ބުނެފި އެވެ.
މި މަޢުލޫމާތު ހާމަކޮށްފައިވަނީ އެ ޖަމާޢަތުގެ ރަސްމީ ޓެލެގްރާމް ޗެނަލް މެދުވެރިކޮށް ނެރުނު ބަޔާނެއްގަ އެވެ.
ހިޒްބުﷲ ގެ ބަޔާނުގައި ބުނެފައިވާ ގޮތުގައި، އެ ޖަމާޢަތުގެ ހަނގުރާމަވެރިންނާއި އިޒްރޭލު ސިފައިންނާ ދެމެދު ހިނގި ހަނގުރާމައިގައި 17 އިޒްރޭލު ސިފައިން މަރުވެފައިވެ އެވެ. މި މަޢުލޫމާތު ކަށަވަރުކޮށްފައިވަނީ އެ ޖަމާޢަތުގެ އިސްލާމީ ދިފާޢީ އޮޕަރޭޝަންސް ރޫމުގެ އިތުބާރުހުރި މައިދާނީ އަދި ސަލާމަތީ މަޞްދަރުތަކުން ނެވެ.
ނަމަވެސް، އިޒްރޭލުގެ ސިފައިންގެ ފަރާތުން މިހާތަނަށް އެއްބަސްވެފައިވަނީ އެންމެ 9 ހަނގުރާމަވެރިން މަރުވެފައިވާ ކަމަށެވެ. މިއީ އިޒްރޭލުގެ ސިފައިން ބުދަ ދުވަހު ދެކުނު ލެބަނަންއަށް އެއްގަމު މަގުން އަރައިގަތް ފަހުން، މަރުވެފައިވާކަމަށް އެ ފަރާތުން ބުނާ އަދަދެވެ.
ހިޒްބުﷲ އިން އިތުރަށް ބުނެފައިވާ ގޮތުގައި، އުތުރު އިޒްރޭލުގައި ހުރި ކަފްރު ގިލާދީ އާބާދީގައި ތިބި އިޒްރޭލީ ސިފައިންނަށް ރޮކެޓް ހަމަލާއެއް އަމާޒުކުރެވިފައިވެ އެވެ. އަދި މެޓުލާގައި ހުރި އަސްކަރީ މަރުކަޒަކާއި އާބާދީއަކަށް 100 ކަޓިއުޝާ ރޮކެޓާއި 6 ފަލަޤް ރޮކެޓް ޖަހާފައިވާ ކަމަށާއި، ސަފަދު ސިޓީއަށްވެސް ރޮކެޓް ހަމަލާއެއް ދީފައިވާ ކަމަށް ބުނެފައިވެ އެވެ.
މި ހަމަލާތަކަކީ އިޒްރޭލާއި ހިޒްބުﷲ އާ ދެމެދު ހިނގަމުންދާ ހަނގުރާމައިގެ ތެރެއިން ދީފައިވާ ހަމަލާތަކެކެވެ. މި ހަނގުރާމައިގެ ސަބަބުން ދެ ފަރާތުގެ މެދުގައި އިތުރަށް ގެއްލުން ލިބެމުންދާކަން ފާހަގަކުރެވެ އެވެ.
