ސަރުކާރުން މަޝްރޫއުތައް ހަވާލުކުރި ކޮންޓްރެކްޓަރުންނަށް އުސޫލާއި ހިލާފަށް ފައިސާ ދޫކުރަމުންދާ ކަމަށް ދެކެވެމުންދާ ވާހަކަތައް ރަސްމީކޮށް ބޭންކު އޮފް މޯލްޑިވްސް (ބީއެމްއެލް) އިން ދޮގުކޮށްފި އެވެ.

ސަރުކާރުން މިދިޔަ ހަފްތާގައި ވަނީ ރާއްޖެ އެކި ކަންކޮޅުގައި 206 މަޝްރޫއެއް ކުރިއަށްގެންދިއުމަށް އަމިއްލަ ކުންފުނިތަކާއި ހަވާލުކޮށްފަ އެވެ. ހަވާލުކުރި ޖުމްލަ ޕްރޮޖެކްޓުތަކުގެ އަގު 2.7 ބިލިއަންއަށް އަރަ އެވެ. އެއާއެކު އެ މަޝްރޫއުތަކަށް ފައިނޭންސްކުރަނީ ބީއެމްއެލްގެ ތެރެއިންކަމަށް ބުނެ، ބޭންކަށް ވަނީ ފާޑުކިޔުންތައް އަމާޒުވެފަ އެވެ. އެގޮތުން ލޯނު ދޫކުރަނީ ބޭންކްގެ އުސޫލުތަކާއި ހިލާފަށް، ބޯޑުގެ ހުއްދެއް ނެތިކަމަށް ބުނެ އެވެ.

އެ ވާހަކަތަކަށް ރައްދުދީ ބީއެމްއެލް އިން ނެރުނު ބަޔާނެއްގައި ބުނެފައިވަނީ، ރާއްޖޭގެ ބައެއް އަމިއްލަ ކުންފުނިތަކާއެކު ސަރުކާރުން ސޮއިކުރި މަޝްރޫޢުތަކުގެ ކޮންޓްރެކްޓަރުންނަށް ބޭންކުގެ ބޯޑުގެ ހުއްދައާއި ނުލައި އަދި ލޯނުދިނުމުގެ އުސޫލާ ޚިލާފަށް ފައިސާ ދޫކުރަމުންދާކަމަށް ތުހުމަތުކޮށް ދައްކަމުންދާ ވާހަކަތަކުގެ އެއްވެސް ހަގީގަތެއް ނެތް ކަމަށެވެ. އަދި ބޭންކުގެ ބޯޑާއި މެނޭޖްމަންޓް މަސައްކަތްކުރަނީ ފުރިހަމަ ޕްރޫޑެންސްއާއި މިނިވަންކަމާއެކު ކަމަށާއި، ބީއެމްއެލް އިން ދަނީ ކޯޕަރޭޓް ގަވަރނަންސާއި ބައިނަލްއަގްވާމީ މިންގަނޑުތައް ހިފަހައްޓަމުން ކަމަށް ބޭންކުން ބުންޏެވެ.

ބީއެމްއެލް އިން ބުނީ

• ބޭންކުގެ އޮނިގަނޑުތައް ގާއިމުކުރެވިފައި ވަނީ:
  • ރާއްޖޭގެ ބޭންކިންގ ޤާނޫނާއި ގަވާއިދުތަކާ އެއްގޮތަށެވެ.
  • އެމް.އެމް.އޭ އިން ކަނޑައަޅުއްވާފައިވާ ޕްރޫޑެންޝަލް ރެގިއުލޭޝަންތަކާއި ސްޓޭންޑަރޑްތަކުގެ މަތީންނެވެ.
  • ބާސެލް III އަދި IFRS 9 ފަދަ ބައިނަލްއަގުވާމީ ހަރުދަނާ ސްޓޭންޑަރޑްތަކަށް ބިނާކޮށެވެ.
• ބައިނަލްއަގުވާމީ އޮޑިޓް ފަރމްތަކުން ދަނީ ގަވައިދުން ބޭންކު އޮޑިޓް ކުރަމުންނެވެ.
• މި މިނިވަން އޮޑިޓްތަކުން ބޭންކުގެ ހިންގުން ހަރުދަނާކަން ކަށަވަރުކުރެވެއެވެ.

ބީއެމްއެލް އިން ބުނިގޮތުގައި އެ ބޭންކުން ލޯނު ދޫކުރަނީ ބޭންކުގެ ބޯޑުން ފާސްކުރާ ސްޓެރެޓެޖީގެ މައްޗަށް އަދި ހިންގުމުގެ އެކި ދާއިރާތަކަށް ބޯޑުން ކަނޑައަޅާ ޕޮލިސީތަކާ އެއްގޮތަށެވެ. އަދި ބޭންކުން ދޫކުރާ ލޯނުތަކަކީ ބޭންކުގެ ކްރެޑިޓް ޕޮލިސީތަކާއި އެއްގޮތަށް އަދި އެމްއެމްއޭއިން ކަނޑައަޅާފައިވާ ގަވާއިދުތަކާ އުސޫލުތަކާ އެގޮތަށް ދޫކުރާ ލޯނުތަކެއް ކަމަށް ބީއެމްއެލް އިން ބުންޏެވެ. ލޯނު ދިނުމުގައި ލޯނު ދެއްކުމުގެ ގާބިލުކަން ހުރި ނެތް މިންވަރާއި، ސިންގަލް ބޮރޯވަރ އެކްސްޕޯޝަރ އަދި ގްރޫޕް ބޮރޯވާ އެކްސްޕޯޝަރ އަށް ބަލާނެކަން ފާހަގަކޮށް ބީއެމްއެލް އިން ބުނި ގޮތުގައި ކޮންމެ ހާލަތެއްގައި ވެސް ލޯނު ދޫކުރާނީ އަންޑަރ ރައިޓިން އުސޫލާ އެއްގޮތަށް ކަމަށެވެ.

ބީއެމްއެލް އިން ހާމަކުރި ގޮތުގައި، ސަރުކާރުގެ ޕްރޮޖެކްޓްތައް ލިބުނު ކުންފުނިތަކަކީ ބޭންކުގެ ކަސްޓަމަރުންކަމަށްވާނަމަ، ބޭންކުން މިހާރުވެސް އަމަލުކުރަމުންދާ އުސޫލުގެ ތެރެއިން ލޯނަށް އެދެމުގެ ފުރުސަތު އެ ފަރާތްތަކަށް ވެސް އޮންނާނެއެވެ. ވިޔަފާރީގެ އުސޫލުން މި ލޯނުތައް ދޫކުރުމުގައި ވެސް ކްރެޑިޓް ޕޮލިސީތަކުގައި ކަނޑައަޅާފައިވާ އެންމެހާ ކަންކަމަށް ބޭންކުން ވަރަށް ބޮޑަށް ބަލާނެކަމަށް ބޭންކުން ބުންޏެވެ.

ބީއެމްއެލް