އެގްރިކަލްޗަރަލް އިކޮނޮމިކް ޒޯންގެ އަމަލީ މަސައްކަތްތައް 2026 ވަނަ އަހަރުގެ ކުރީކޮޅު ފަށާނެ ކަމަށް ސްޓޭޓް ޓްރޭޑިން އޮގަނައިޒޭޝަން (އެސްޓީއޯ) އާއި މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީޒޯން ކޮމްޕެނީ (އެމްއައިޑީއެފްޒެޑް)ގެ މެނޭޖިން ޑިރެކްޓަރު ޝިމާދު އިބްރާހިމް ވިދާޅުވެއްޖެ އެވެ.
ޝިމާދު މިގޮތަށް ވިދާޅުވީ ދައުލަތުގެ މީޑިއާއަށް ދެއްވި ހާއްސަ އިންޓަވިއުއެއްގަ އެވެ.
މި މަޝްރޫއަކީ ދަނޑުވެރިކަމުގެ އިގްތިސާދީ ސަރަހައްދެއް ގާއިމްކޮށްގެން ރާއްޖޭގައި ކާބޯތަކެތީގެ ރައްކާތެރިކަން ކަށަވަރުކުރުމުގެ މަގުސަދުގައި އެމްއައިޑީއެފްޒެޑާއި ޗައިނާ ހާބަރ އިންޖިނިއަރިން ކޮމްޕެނީ ލިމިޓެޑާ ދެމެދު 2024 ވަނަ އަހަރުގެ މާޗް މަހު ސޮއިކުރި އެއްބަސްވުމަކަށްފަހު ފެށި މަޝްރޫއުއެކެވެ. މި މަޝްރޫއު އަށް ބޭނުންވާ ޖާގަ އުފެއްދުމަށްޓަކައި 100 ހެކްޓަރުގެ ބިން ހޯދުމުގެ މަސައްކަތް ހިމެނެ އެވެ.
ޝިމާދު ވިދާޅުވީ ބިން ހިއްކުމުގެ މަސައްކަތް ހިޔާރުކުރީ މަޝްރޫއުގެ ފައިދާ އެންމެ ފުރިހަމައަށް ހޯދުމަށްޓަކައި ބޮޑު ސަރަހައްދެއް ބޭނުންވާތީ ކަމަށެވެ. އޭނާ ވިދާޅުވީ ރާއްޖޭގައި ކުދި ޖަޒީރާތައް ހުރިއިރު، ބޮޑު އެއް ތަނެއްގައި މަޝްރޫއު ފެށުމަކީ މާ ފައިދާހުރި ކަމެއް ކަމަށް ބެލެވުނު ކަމަށެވެ. ދަނޑުވެރިކަމުގެ ހަރަކާތްތަކުގެ އިތުރުން މި ޒޯނުގައި ޓްރެއިނިން ސެންޓަރަކާއި އެކޮމޮޑޭޝަން ބްލޮކްތައް ވެސް ހުންނާނެ އެވެ.
އެގްރިކަލްޗަރަލް އިކޮނޮމިކް ޒޯނުގައި ތަފާތު ތަރުކާރީ އާއި މޭވާ އިންދުމުގެ އިތުރުން ޕޯލްޓްރީ އާއި ކުކުޅު ބިސް ވެސް އުފައްދާނެ އެވެ. ޝިމާދު ފާހަގަކުރެއްވި ގޮތުގައި މި މަޝްރޫއުގެ ސަބަބުން ރާއްޖެ އިން ކާބޯތަކެތި އެތެރެކުރުމަށް ބޮޑު އަސަރެއް ކުރާނެ ކަމަށާއި، ބޭރުގެ މާކެޓްތަކަށް ބަރޯސާވުން ކުޑަވާނެ ކަމަށެވެ. އޭނާ ވަނީ އެ ޒޯނުން ގައުމުގެ ކާބޯތަކެތީގެ ބޭނުންތަކުގެ ބޮޑު ބައެއް ހައްލުކޮށް، ކޮންސިއުމަރ އަގު ހެޔޮކުރުމަށް އެހީތެރިވެދޭނެ ކަމަށް އުންމީދު ކުރައްވާ ކަމަށެވެ.
މި އެއްބަސްވުމުގެ ދަށުން އުތުރު ތިލަފަޅު (ޔޫޓީއެފް) ގެ ބިން ހިއްކުމާއި، އިންފްރާސްޓްރަކްޗާ ތަރައްގީކުރުމާއި، އެގްރިކަލްޗަރަލް އިންޑަސްޓްރިއަލް ޕާކާއި، ފަސިންޖަރުންނާއި މުދާ އުފުލާ ޓާމިނަލްތަކާއި، ބޭނުންވާ އެހެނިހެން ވަސީލަތްތައް ހިމެނޭނެ އެވެ. އެމްއައިޑީއެފްޒެޑުން ބުނީ މި މަސައްކަތުގެ މަގްސަދަކީ އިންވެސްޓަރުން ޝައުގުވެރިކޮށް، ރާއްޖޭގެ އުފެއްދުންތެރިކަން އިތުރުކޮށް، ރާއްޖެއިން ލިބެން ހުންނަ ކާބޯތަކެތީގެ ބާވަތްތައް އިތުރުކޮށްގެން ދިވެހިންގެ ދަނޑުވެރިކަމުގެ ދާއިރާ އާލާކުރުމެވެ. އަދި މި މަޝްރޫއުގެ ސަބަބުން އިމްޕޯޓަށް ބަރޯސާވުން މަދުވެ، ބޭރު ފައިސާގެ އައުޓްފްލޯ ކުޑަކުރެވޭނެ ކަމަށް ބެލެވެ އެވެ.
މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުޙައްމަދު ސަޢީދު ސިފަކުރެއްވި ގޮތުގައި މިއީ ރާއްޖޭގައި އާންމުކޮށް ބޭނުންކުރާ ގާތްގަނޑަކަށް 15 ވައްތަރެއްގެ ތަރުކާރީއާއި މޭވާގެ 80 އިންސައްތަ އިންދުމަށް އެޅި މުހިންމު ފިޔަވަޅެކެވެ. މީގެ އިތުރުން މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއާ ޑރ. އައިޝަތު ރަމީލާ ވަނީ ސަރުކާރުން އުފައްދަންޖެހޭ ވަކި ބާވަތްތައް ދެނެގަނެ، މަޝްރޫއު ހިންގުމާ ގުޅިގެން އިމްޕޯޓް މަދުކުރެވޭނެ ކަމަށް ވިދާޅުވެފަ އެވެ.
މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީޒޯން ކޮމްޕެނީ (އެމްއައިޑީއެފްޒެޑް) ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)
