އާސަންދަ ނިޒާމު ފުރިހަމަކޮށް، ރައްޔިތުން ސަލާންޖަހަން ނުޖެހޭ މިންވަރަށް އިޖުތިމާޢީ ރައްކާތެރިކަން ކަށަވަރުކޮށްދޭނެ ކަމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވަޢުދުވެވަޑައިގެންފި އެވެ.
”ހަފުތާ 52- ރައްޔިތުންނާއެކު ކުރިއަށް“ މި ނަމުގައި ބޭއްވުނު ޚާއްޞަ ރަސްމިއްޔާތުގައި ރައީސް މުޢިއްޒު ވިދާޅުވީ ސަރުކާރުގެ އަމާޒަކީ ހުރިހާ ރައްޔިތުންނަށްވެސް އެއް ފެންވަރެއްގެ ރަނގަޅު ޚިދުމަތްތައް ފޯރުކޮށްދިނުން ކަމަށެވެ. މިގޮތުން، ރާއްޖޭގެ އުތުރާއި ދެކުނުގައި މަތީ ފަންތީގެ ޚިދުމަތްތަކާއެކު އަރބަން ރީޖަން ތަޢާރަފުކޮށް، ރާއްޖޭގެ އެކި ކަންކޮޅުތަކުގައި 7 އާރބަން ސެންޓަރު ތަރައްޤީކުރެވިގެންދާނެކަން އެމަނިކުފާނު ހާމަކުރެއްވި އެވެ.
އިތުރު މުހިންމު ވަޢުދުތަކުގެ ތެރޭގައި:
- އޭޓީއެމް ނެތް ހުރިހާ ރަށްތަކުގައި އޭޓީއެމް ޚިދުމަތް ފެށުން
- ކޮންމެ ރަށަކުން އެސް.ޓީ.އޯ ރޭޓުގައި ތެޔޮ ލިބޭނެ އިންތިޒާމު ހަމަޖެއްސުން
- ހުރިހާ އަތޮޅަކަށް އާރް.ޓީ.އެލްގެ ޚިދުމަތް ފުޅާކުރުން
- ސިވިލް ސަރވަންޓުންގެ މުސާރަ އަންނަ އަހަރު ބޮޑުކުރުން
- 2026 ގެ ނިޔަލަށް ޖުޑިޝަރީގައި މަސައްކަތްކުރާ ހުރިހާ މުވައްޒަފުންގެ މުސާރަ ބޮޑުކުރުން
ޞިއްޙީ ދާއިރާއަށް ޚާއްޞަ ސަމާލުކަމެއް ދެއްވާނެކަމަށް ރައީސް ވިދާޅުވި އެވެ. މިގޮތުން، ކެންސަރ، ތެލެސީމިޔާ، އަދި މެންޓަލް ހެލްތުގެ ސްޕެޝަލްޓީ ހޮސްޕިޓަލުގެ އިތުރުން ރާއްޖޭގެ އެކި ހިސާބުތަކުގައި 5 ހޮސްޕިޓަލު ޤާއިމުކުރުމަށް ރޭވިފައިވާ ކަމަށް އެމަނިކުފާނު ހާމަކުރެއްވި އެވެ. އަދި މިއަހަރުގެ ބާކީ އޮތް މުއްދަތުގައި ޖީޕީ ނުވަތަ ޢާންމު ބަލިތަކުގެ ކްލިނިކްތައް ޤާއިމުކުރުމުގެ މަސައްކަތްތައް ފެށޭނެކަމަށްވެސް ވިދާޅުވި އެވެ.
ރައީސް މުޢިއްޒު ވިދާޅުވީ މި ހުރިހާ މަސައްކަތެއްގެ ނަތީޖާއަކަށް ވާނީ ރާއްޖޭގެ ސަރަޙައްދީ ތަރައްޤީގެ އާ ބާބެއް ފެށިގެން ދިއުން ކަމަށެވެ. އަދި މި ހުރިހާ ކަމެއްގައިވެސް ރައްޔިތުންގެ ބަސް ހޯއްދަވާނެކަމުގެ ޔަޤީންކަން އެމަނިކުފާނު ދެއްވި އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާސަންދަ ދިވެހިންގެރާއްޖެ365
