ރަސްމީ ދަތުރެއްގައި ފޮރިން މިނިސްޓަރު ޑރ. އަބްދުﷲ ހަލީލް ސައުދީ އަރަބިއާއަށް މިއަދު ފުރާވަޑައިގެންފި އެވެ.
މިނިސްޓަރ މިކަން ހާމަކޮށްފައި ވަނީ އެކްސްގައި ކުރެއްވި ޕޯސްޓެއްގަ އެވެ.
އެ ޕޯސްޓުގައި ބުނެފައި ވަނީ، ސައުދީ އަރަބިއާ އަށް ފުރާވަޑައިގެންނެވީ އެ ގައުމުގެ ސަރުކާރުގެ އިސްނެންގެވުމާއެކު ބާއްވާ އެކްސްޓްރާ އޯޑިނަރީ ޖޮއިންޓް އަރަބް-އިސްލާމިކް ސަމިޓާއި، އެ ސަމިޓަށް ތައްޔާރުވުމުގެ ބައްދަލުވުންތަކުގައި ބައިވެރިވެވަޑައިގަތުމަށް ކަމަށެވެ.
މިނިސްޓަރގެ މި ދަތުރުފުޅުގައި ފަލަސްތީނުގެ ރައްޔިތުންނާއި އިސްލާމީ އުއްމަތުގައި މިހާރު ކުރިމަތިވެފައިވާ ގޮންޖެހުންތަކަށް ހައްލު ހޯދައިދެއްވުމާއި ގުޅިގެން އިސްލާމީ ގައުމުތަކާއެކު މަޝްވަރާ ކުރައްވާނެ ކަމަށް ވެސް މިނިސްޓަރ ވިދާޅުވި އެވެ.
”އިސްލާމީ އުންމަތުގެ ހިތްދަތިކަން ފިލުވައި، އިސްރާއީލު ޖަވާބުދާރީ ކުރުވުމަށް އެންމެން އެކުގައި މަސައްކަތް ކުރަންޖެހޭ. އަނިޔާވެރި ހަނގުރާމައާއި ޖަރީމާގެ އަމަލުތައް މިހާރު ހުއްޓާލަން ޖެހޭ،“ މިނިސްޓަރުގެ ޕޯސްޓުގައި ވިދާޅުވެފައިވެ އެވެ.
އަރަބް-އިސްލާމިކް ސަމިޓް ބޭއްވުމަށް ހަމަޖެހިފައި ވަނީ އަންނަ ހޯމަ ދުވަހު އެވެ.
