އަނިޔާގެ ސަބަބުން އާސެނަލްގެ ބުކާޔޯ ސަކާ ހަތަރު ހަފުތާއަށް ކުޅުމާ ދުރަށް ދާން ޖެހިއްޖެއެވެ.
މިދިޔަ ހޮނިހިރު ދުވަހު ލީޑްސް ޔުނައިޓެޑު އަތުން މޮޅުވި މެޗުގައި އުމުރުން 23 އަހަރުގެ ސަކާގެ ފަލަމަސްގަނޑަށް އަނިޔާވުމާ ގުޅިގެން އޭނާ ވަނީ ބަދަލުކޮށްފައެވެ. އަނިޔާގެ ސަބަބުން އޭނާ އަށް ލިވަޕޫލާ ދެކޮޅަށް ކުޅޭ މެޗާއި އަންނަ މަހު ވޯލްޑް ކަޕް ކޮލިފައިންގައި އެންޑޯރާ އާއި ސާބިއާ އާ ދެކޮޅަށް ކުޅޭ މެޗުތަކުގައި ނުކުޅެވޭނެއެވެ.
ލީޑްސް އާ ދެކޮޅަށް ކުޅުނު މެޗުގައި ކޮނޑުހުޅަށް އަނިޔާވި އާސެނަލްގެ ކެޕްޓަން، މާޓިން އޮޑިގާޑް އަށްވެސް ލިވަޕޫލް މެޗުގައި ކުޅުމުގެ ޔަގީން ކަމެއް ނެތެވެ.
ލިވަޕޫލް މެޗުގައި އޮޑިގާޑް އަށް ނުކުޅެވޭކަން އަދި ކަށަވަރުނުވާއިރު، ސަކާވެސް ދިގު މުއްދަތަކަށް ކުޅުމާ ދުރުގައި ހުންނަން ޖެހޭނެ ކަމަކަށް ނުބެލެވެއެވެ. މިދިޔަ ސީޒަނުގައިވެސް ސަކާގެ ފަލަމަސްގަނޑަށް އަނިޔާވުމާ ގުޅިގެން އޭނާ ވަނީ ތިން މަސް ދުވަހަށް ކުޅުމާ ދުރަށް ދާން ޖެހިފައެވެ.
ސަކާ އަށް އަނިޔާވުމުން، މި ސީޒަނުގައި އާސެނަލް އާ ގުޅުނު އެޓޭކިންގ ކުޅުންތެރިން ކަމަށްވާ ވިކްޓާ ޔޯކަރޭސް އާއި ނޯނީ މަޑުއޭކޭގެ އިތުރުން އެބެރެޗީ އެޒޭގެ މުހިންމުކަން އިތުރުވާނެއެވެ. މީގެއިތުރުން، ގަބްރިއެލް މާޓިނެލީ، ލިއަންޑްރޯ ޓްރޮސާޑް، އީތަން ންވަނޭރީ އަދި މެކްސް ޑޯމަން ފެނުންވެސް އެކަށީގެންވެއެވެ.
