ޣައްޒާއަށް އެހީގެ ތަކެތި ވެއްދުން އިސްރާއީލުން ހުއްޓުވައިފި އެވެ.

އަލްޖަޒީރާ އިން ބުނާ ގޮތުގައި ޣައްޒާއަށް ވަދެވޭ ހުރިހާ މަގެއް ބަންދުކޮށް އިންސާނީ އެހީތައް އިސްރާއީލުން ވަނީ ހުއްޓުވާފަ އެވެ. އިސްރާއީލްގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން ބުނާ ގޮތުގައި ޖެނުއަރީ މަހު އެއްބަސްވެވުނު ހަނގުރާމަ ހުއްޓާލުމުގެ މުއްދަތާއި ފިޔަވަހިތަކަށް މިހާރު އަމަލު ކުރާކަށް ނުޖެހޭނެއެވެ.

އެގޮތުން ޣައްޒާއަށް އެހީގެ ތަކެތި ވެއްދުން ހުއްޓުވަން އިސްރާއީލުން ބަހަނާއެއްގެ ގޮތުގައި ދެއްކީ ހަމަލާތައް މެދުކަނޑާލަން ވެފައި އޮތް އެއްބަސްވުމުގެ ފުރަތަމަ މަރުހަލާގެ މުއްދަތު ހަމަވުމެވެ. އެމެރިކާ އިސްވެ އޮވެ މިހާރު ހުށަހަޅާފައި ވަނީ ފުރަތަމަ މަރުހަލާގެ މުއްދަތު ދިގު ކުރުމަށެވެ. ކުރިން އެއްބަސްވި ގޮތައް ފުރަތަމަ މަރުހަލާއަށްފަހު ދެވަނަ މަރުހަލާ ފަށައި، އިސްރާއީލުން ސިފައިން ޣައްޒާއިން ފައިބަން މިހާރު އެމެރިކާ އާއި އިސްރާއީލުން އަންނަނީ ދެކޮޅު ހަދަމުންނެވެ.

ހަމާސްގެ އިސްވެރިއެއް ކަމަށްވާ މަހްމޫދު މަރްދަވީ ވިދާޅުވީ ސަރަހައްދީ ހަމަޖެހުން ހޯދޭނީ ކުރިން އެއްބަސްވެފައިވާ ހަނގުރާމަ ހުއްޓުމުގެ އެއްބަސްވުމުގެ ދެވަނަ ފިޔަވަހި ފުރިހަމަކުރުމުން ކަމަށާއި، އެއީ އިސްރާއީލުން ޣައްޒާއިން ދާއިމީކޮށް ފައިބައި، ހަނގުރާމަ ނިންމުން ކަމަށެވެ.

ހަމާސްއިން ބުނެފައިވަނީ އިސްރާއީލުގެ ބޮޑުވަޒީރު ނަތަންޔާހޫ ޣައްޒާއަށް އިންސާނީ އެހީ ވެއްދުން ހުއްޓުވުމަށް ނިންމި ނިންމުމަކީ ބްލެކްމެއިލް ކުރުންކަމަށާއި އެއީ ހަނގުރާމަ ހުއްޓާލުމުގެ އެއްބަސްވުމާ ދެކޮޅަށް ކުރާ ބަޣާވާތެއް ކަމަށެވެ. ހަމާސްއިން ނެރުނު ބަޔާނެއްގައި އިސްރާއީލުގެ މި ފިޔަވަޅަކީ ހަނގުރާމައިގެ ކުށެއްކަމަށާއި އަދި އެއްބަސްވުމާ ދެކޮޅަށް ސީދާ ހިންގާ ޖަރީމާއެއް ކަމަށް ބުނެފައި ވެއެވެ. އަދި ޣައްޒާ ހިސޯރު ކޮށްގެން އިސްރާއީލުން ތިބޭ ތިބުން ނިމުމަކަށް ގެނައުމަށް އިސްރާއީލަށް މެދުވެރިން ބާރުއެޅުމަށް ގޮވާލައިފައިވެ އެވެ.

އަނިޔާވެރި އިސްރާއީލް އިޒްރޭލް-ފަލަސްތީން ގައްޒާ