ޒަބީ އަލޮންސޯ ލިވަޕޫލްގެ އެންފީލްޑަށް އެނބުރި އައި މެޗުގައި، ލުއިސް ޑިއާޒްގެ ހެޓްރިކާއެކު ލިވަޕޫލުން ބަޔާ ލެވަކޫސަން ބަލިކޮށްފިއެވެ.
ލެވަކޫސަންގެ ކޯޗު، އަލޮންސޯ އަކީ މިވަގުތުވެސް ލިވަޕޫލްގެ ސަޕޯޓަރުންގެ މެދުގައި މަގުބޫލު މީހެކެވެ. އޭނާ ވަނީ ލިވަޕޫލާއެކު 2005 ވަނަ އަހަރުގެ ޗެމްޕިއަންސް ލީގު ކާމިޔާބުކޮށްފައެވެ. އަދި ލިވަޕޫލްގެ ކުރީގެ ކޯޗު، ކްލޮޕް މަގާމުން ވަކިވުމާ ގުޅިގެން، އަލޮންސޯ ހޯދުމަށް ލިވަޕޫލުން ވަނީ މަސައްކަތް ކޮށްފައެވެ.
މެޗުގެ ފުރަތަމަ ހާފުގައި މޮޅަށް ކުޅެ، ގިނަވަގުތު ބޯޅަ ހިފަހައްޓާފައިވަނީ ލެވަކޫސަނުންނެވެ. ނަމަވެސް، ދެވަނަ ހާފު ފެށިގެން ލިވަޕޫލުން ވަނީ މޮޅު ކުޅުމެއް ކުޅެފައެވެ. އެގޮތުން، ދެވަނަ ހާފު ފެށިގެން މެޗުގެ 61 ވަނަ މިނެޓުގައި ކާޓިސް ޖޯންސް ދިން ޕާހަކުން، ޑިއާޒް ވަނީ ލަނޑު ޖަހައި ލިވަޕޫލަށް ކުރިހޯދަދީފައެވެ. އަދި އޭގެ ދެ މިނެޓު ފަހުން މުހައްމަދު ސަލާހު ނަގައިދިން ހުރަހަކުން، ކޯޑީ ގަކްޕޯ ވަނީ ލަނޑެއް ޖަހައި، ލިވަޕޫލަށް ލީޑު ފުޅާކޮށްދީފައެވެ.
ޑިއާޒް ވަނީ މެޗު ނިމެން ހަތް މިނެޓަށް ވެފައިވަނިކޮށް ލަނޑު ޖަހައި، ލިވަޕޫލަށް ތިން ޕޮއިންޓު ކަށަވަރުކޮށްދީފައެވެ. އަދި އިތުރު ވަގުތުގެ ދެވަނަ މިނެޓުގައި އޭނާ ވަނީ އިތުރު ލަނޑެއް ޖަހައި، ހެޓްރިކް ފުރިހަމަކޮށްފައެވެ.
މި ނަތީޖާއާއެކު ލިވަޕޫލް އެއްވަނައިގައި އޮތީ 12 ޕޮއިންޓާއެކުއެވެ. ޗެމްޕިއަންސް ލީގުގައި މިހާތަނަށް ކުޅުނު ހަތަރު މެޗުން މޮޅުވެވުނީ ހަމައެކަނި ލިވަޕޫލަށެވެ. ލެވަކޫސަން އޮތީ ހަތް ޕޮއިންޓާއެކު 11 ވަނައިގައެވެ.
